Galego
As partes que subscribiron o acordo lácteo, industrias, cooperativas e Asaja, como única organización agraria asinante, mantiveron unha nova reunión de seguemento do pacto co Ministerio de Agricultura. O encontro, o cuarto desde setembro, serviu para comprobar a evolución dos compromisos e puxo sobre a mesa un asunto clave para o sector. En decembro, a producción de leite medrou en España un 6,6 % en relación ó mesmo mes do ano anterior, continuando así os incrementos de arredor do 5 % de outubro e novembro. “Hai que valorar se é o intre de producir menos leite e sacar máis valor”, cuestiona Francisco Bello, portavoz de Asaja, tras participar na reunión da comisión de seguemento do acordo lácteo.
“Hai cousas que non lle gusta oír á xente, pero con milongas imos directos ó precipicio” (Francisco Bello)
O aumento da producción en toda Europa nun intre de debilidade dos mercados internacionais está a empeorar o escenario de prezos do leite no campo, que en decembro se mantiveron en España nunha media de 31,1 céntimos, similar a novembro. “Temos que vender o que demandan os mercados e agora o mercado está saturado” -valora Francisco Bello.- “Hai cousas que igual non lle gusta oír á xente, pero con milongas imos directos ó precipicio. Estamos nunha época na que temos que falar moito entre todas as partes e, sobre todo, facer números. ¿É mellor producir menos e sacar máis valor ou producir máis e que se pague o leite a 20 céntimos, como xa está a pasar nalgunhas zonas?”.
Límites á producción
O planteamento xenérico de Asaja de debatir posibles límites a producción en intres de crise é compartido en Galicia por organizacións como a OPL e o Sindicato Labrego, que xa veñen facendo propostas concretas desde hai meses para regular os volumes de producción na UE. A medida é defendida en Bruxelas polas coordinadoras gandeiras European Milk Board, na que participa a OPL, e Vía Campesiña, na que está o Sindicato Labrego.
“Se segue entrando leite barato de fóra, é imposible recuperar prezos. A importación é legal pero non é ética”
Outra cuestión é como se debera repartir esa posible limitación da producción por territorios, xa que, por exemplo, en Galicia as entregas están a medrar menos que a media estatal. En Europa, os aumentos de producción están encabezados por Irlanda, que medrou esta campaña un 15%. Holanda e Bélxica sobrepasan o 9% de incremento, en tanto Alemaña está nun 3%, España nun 2,6% e os países veciños, Portugal, nun 3,1 % e Francia nun 1% de crecemento.
Importacións
Asaja advirte de que a saturación do mercado e os prezos á baixa levan a parte das explotacións ó límite. “Coa actual situación de prezos, granxas que fixeron un gran investimento ou que teñen pouca base territorial, por exemplo, están nunha situación moi complicada”, sinala. A organización agraria apunta outro factor que empeora a situación de prezos, como son as importacións de leite. “Se segue entrando leite barato de fóra, é imposible recuperar prezos. Pode ser legal que as industrias traian leite de fóra, pero non é ético nun intre de crise como o actual. As industrias están nun país no que sacan unha conta de resultados e teñen que axudar á economía do país”, demanda Francisco Bello.
“En España debemos seguir o exemplo de Italia. Preocuparnos de ter un prezo sostible e logo decidir canto hai que importar”
O portavoz de Asaja avoga por un pacto de autorregulación das industrias en canto ás importacións, a imaxe do que se fai noutros países europeos. “Os países europeos excedentarios primeiro arranxan o seu mercado interno e logo exportan fóra os excedentes ó prezo que sexa. Aquí en España deberiamos seguir o exemplo de Italia. Preocuparnos de ter un prezo sostible e logo decidir que cantidades hai que importar”, propón.
Como obxectivo de futuro, Bello é partidario de que o sector lácteo español aspire a producir o seu consumo interno, pois historicamente España é deficitaria, pero sinala que ese maior autoabastecemento debe pasar por avances na transformación do leite por parte das industrias e das propias cooperativas, xa que gran parte das importacións españolas son de produtos elaborados como queixos. “O sector ten que mellorar na estruturación e na organización. É fundamental definir un plan estratéxico a medio prazo”, apunta en relación á proposta ó respecto da Consellería do Medio Rural.
En canto ós pasos que se están a dar no marco do acordo lácteo, Francisco Bello valora que hai avances, a pesar das dificultades. “O que non se arranxou en 40 anos non se vai solucionar en 4 meses”, apunta.
Avances en catro meses de acordo lácteo
O Ministerio de Agricultura trasladou na cuarta reunión de seguemento do acordo lácteo o estado dos compromisos lexislativos que asumiu en setembro na sinatura do pacto. Industria e distribución tamén fixeron balance. Estas son as cuestións máis relevantes analizadas onte:
Agricultura pediulle ás industrias que comecen a aportar xa os prezos de cesión do leite á distribución
– Decreto que permitirá coñecer os prezos de cesión do leite da industria á distribución. Logo de trasladarlle o borrador de decreto ás partes, a Administración está á espera dos últimos informes internos que respalden a validez legal do texto. O Ministerio, sen embargo, pediu que as industrias comecen a aportar xa datos, sen agardar a que se publique o decreto no Boletín Oficial del Estado (BOE). Distribución e industria teñen que avanzar tamén na redacción dun contrato tipo que regule a relación entre as partes.
– Contrato tipo de compra venda de leite entre industrias e gandeiros. A ministra asinou onte o decreto polo que se homologa o contrato proposto pola Interprofesional Láctea. Entrará en vigor tras a súa publicación no BOE.
– Decreto de primeiros compradores. Entregaráselle un borrador a cooperativas e organizacións de produtores a comezos de febreiro.
– Identificación da orixe do leite. Actualmente, só se identifica claramente a orixe do leite no 17% dos casos, segundo apunta Asaja. Industria e distribución comprometéronse a mellorar a identificación da orixe.
