Galego
A Estación Fitopatolóxica de Areeiro, centro dependente da Deputación de Pontevedra, acaba de publicar un novo aviso fitosanitario no que alerta da detección de excoriose e de maduración da forma de conservación do fungo do Mildiu nos viñedos da comarca. Os técnicos sinalan que, se ben é posible iniciar os tratamentos para a primeira patoloxía, débese agardar para iniciar a loita contra o Mildiu.
A técnica Rosa Pérez explica que o tratamento fronte á excoriose é o único que con carácter xeral se recomenda ao inicio de campaña, aínda que sinala que é en torno ao estado fenolóxico D (coa saída das follas incipientes) cando resulta máis eficaz. Neste sentido, e debido á irregularidade na brotación incluso dentro da mesma finca, advírtese de que a intervención “debe realizarse cando alomenos haxa un 50% de gromos en emerxencia de folla” na viña.
En canto ao Mildiu, esta semana verificouse a maduración da oospora (forma de conservación invernal do fungo) nos viñedos das comarcas da provincia de Pontevedra que se utilizan por parte de Areeiro para a detección de patóxenos. Pérez subliña que “este momento significa que se iniciou o ciclo, que é o punto de partida dun novo ciclo”, pero “non supón que haxa que iniciar xa os tratamentos”. De feito, destaca que se están a detectar “importantes diferencias de brotación entre zonas e parcelas ou incluso plantas da mesma parcela”, pero que na maior parte dos casos as fincas presentan só unha brotación incipiente que non é suficiente para iniciar as intervencións.
