O Clúster Alimentario de Galicia (Clusaga) vén de presentar o primeiro Programa de Desenvolvemento Directivo para Empresas Alimentarias galegas, unha iniciativa deseñada xunto á Universidade Intercontinental da Empresa (UIE) a prol do talento e a mellora da competitividade do sector alimentario de Galicia que se impartirá de marzo a novembro de 2024. A xornada celebrada esta semana nas instalacións do Centro Obra Social ABANCA de Santiago de Compostela, que acolleu unha Masterclass do consultor do Banco Mundial, Mario Weitz, sobre as perspectivas económicas mundiais e o seu impacto no sector alimentario, e serviu para inaugurar a Formación, contou coa participación de Antonio Basanta, Director Xeral de Pesca, Acuicultura e Innovación Tecnolóxica; Andrés Rodríguez, Presidente de Clusaga; e con representantes de ABANCA, UIE, e empresas socias do Clúster, entre as que a iniciativa tivo gran acollida.

Perspectivas económicas e impacto no sector da alimentación

Tras a benvida aos asistentes, deu comezo o relatorio de Mario Weitz. O economista e experto abordou, en primeiro lugar, unha panorámica da economía actual, incidindo en factores clave como o conflito Ucraína - Rusia, os tipos de xuro ou a inflación. A Masterclass tamén serviu para analizar os mercados internacionais, sinalando Asia e América Latina como emerxentes. Ademáis, Weitz puxo o foco en India e Corea do Sur como os de maiores oportunidades de exportación para os produtos de alimentación, e situou a España como a novena potencia mundial do sector alimentario. A continuación, o experto profundou nas oportunidades da dixitalización, a robótica e a intelixencia artificial. A este respecto, Weitz apuntou que a destrución neta de emprego derivada da cuarta revolución tecnolóxica oscilaría entre o 3 e o 4% para aqueles postos de traballo que requiran baixa cualificación pero que, ao mesmo tempo, isto provocaría un aumento do salario medio. Sobre a transición do sector cara a modelos os meus respectuosos co medio ambiente, o consultor do Banco Mundial apostou por un avance gradual cara á sustentabilidade para que, desde o punto de vista económico, non se vexa afectada a competitividade. Para terminar, Weitz proporcionou unha análise aos asistentes sobre oportunidades de investimento, e abriu un debate sobre as fortalezas e debilidades do sector alimentario en relación coa economía española. O encontro finalizou coa presentación oficial do Programa de Desenvolvemento Directivo para Empresas Alimentarias, na que se avanzaron os aspectos máis destacados do curso, a súa misión e obxectivos, ou as datas propostas, entre outras cuestións. Na súa intervención, o Director Xeral de Pesca sinalou a oportunidade que supón o coñecemento compartido e puxo en valor a alta capacidade de networking do sector alimentario galego. Así, agradeceu a iniciativa de Clusaga de crear este Programa Formativo. “Embarcarse neste proxecto é embarcase no futuro de Galicia”, declarou Basanta. Andrés Rodríguez, pola súa banda, explicou que o Programa “nace do compromiso de Clusaga coa creación de talento, a mellora da capacitación dos traballadores e da competitividade do sector”, e que vai en liña coas actuacións recollidas no Plan Estratéxico 2021-2025 da asociación.

O economista e emprendedor belga Gunter Pauli abordou onte en Santiago de Compostela o concepto de “Economía Sostible e Rexenerativa” ante entidades socias do Clúster Alimentario de Galicia (Clusaga), no marco do relatorio – xantar organizado de maneira conxunta con INSURE.Hub – INnovation in SUstainability and Regeneration. Co obxectivo de prestar apoio ás empresas do sector da alimentación e das bebidas de Galicia para avanzar cara estratexias máis sostibles, Gunter Pauli puxo o foco en buscar solucións económicas e sostibles a través da reutilización de residuos. Tamén salientou, por unha banda, a relevancia da elaborar un inventario de oportunidades existentes na rexión de Galicia que permita potenciar o valor endóxeno e diferencial da rexión e, por outra banda, incidiu na importancia de mudar os modelos de negocio baseados no “core business” cara modelos empresariais multiplicadores centrados na diversificación a través do emprego eficiente de recursos. O experto, cuxo traballo se orienta a deseñar e implementar solucións prácticas, alcanzables e sostibles para un novo modelo económico de sociedades e industrias de cero emisións, animou ás persoas asistentes a “crear riqueza respectando o medio ambiente”.

Crecemento sostible do sector alimentario

O encontro, en liña co compromiso de Clusaga de potenciar e fortalecer o crecemento sostible do sector da alimentación e das bebidas na rexión, serviu para inspirar ás empresas para reducir riscos, aproveitar novas oportunidades e reforzar a súa posición competitiva en materia de sustentabilidade nunha contorna de cambio acelerado e converxencia tecnolóxica. Nese aspecto, Roberto Alonso, director de Clusaga, subliñou que a clave para enfrontar os desafíos e grandes cambios que está a experimentar o sector é “seguir traballando xuntos para abordalos con éxito”. Tamén destacou a importancia de que as empresas “incorporen a sustentabilidade e a economía circular”, unha cuestión que non é só “ética e ambiental”, senón que pode xerar “vantaxes competitivas significativas”, contribuíndo ao seu crecemento e a posicionar Galicia como líder de produción de elementos sostibles de alta calidade.

Colaboración entre entidades da Eurorrexión

No marco desta cita, e en liña co interese de Clusaga en establecer relación con entidades membro da EuroRexión Galicia – Norte de Portugal, tivo lugar unha reunión previa ao coloquio – xantar. Nesta xuntanza, cuxo obxectivo foi estudar futuras oportunidades de colaboración, estiveron presentes representantes de Clusaga, INSURE.Hub, Católica Porto Business Scholl, CBQF Biotechnology da Catholic University of Portugal (ESB) e Planetiers New Generation.

Gunter Pauli

O experto, que traballa a prol da sustentabilidade e a economía circular, é amplamente recoñecido a nivel internacional por desenvolver e promover o concepto de "Economía Azul”, baseado na idea de crear sistemas sostibles e resolver problemas ambientais a través da innovación e a imitación dos procesos naturais. É o fundador de Zero Emissions Research and Initiatives (ZERI) na Universidade das Nacións Unidas en Tokio e da Fundación The Global ZERI Network, entre outras empresas e organizacións relacionadas coa sustentabilidade. Tamén é autor de varios libros e publicacións relacionadas con estes temas, incluíndo "A Economía Azul: 10 anos, 100 innovacións, 100 millóns de empregos”.

A Xunta e o clúster alimentario de Galicia (Clusaga) colaborarán na posta en marcha dun programa de desenvolvemento do sector lácteo e agroalimentario da nosa comunidade. O director xeral de Gandaría, Agricultura e Industrias Agroalimentarias, José Balseiros, e o director da Axencia Galega da Calidade Alimentaria, José Luis Cabarcos, mantiveron unha reunión de traballo con responsables desta entidade para afondar nesta cuestión. A xuntanza dá continuidade a outros encontros mantidos con anterioridade e supón un novo chanzo na cooperación entre a Consellería do Medio Rural e o clúster para impulsar esta iniciativa, que persegue, como obxectivo fundamental, mellorar a competitividade e o posicionamento do sector agroalimentario en xeral e do lácteo en particular. Por parte da Xunta valórase a proposta do Clusaga, que se considera perfectamente aliñada cos obxectivos da Estratexia de dinamización do sector lácteo en aspectos como a necesidade de promover a remuda xeracional, mellorar a profesionalidade do sector produtor, impulsar a I+D+i e a profesionalización da industria ou fomentar a diferenciación e o consumo de produtos lácteos galegos. Tamén se procurará sensibilizar á sociedade sobre a importancia deste eido e mellorar a interlocución e a transparencia entre os diferentes elos da cadea, así como a transferencia de coñecemento ao sector.

Granxas modelo

A proposta do Clusaga, na que tamén participan a Asociación Galega de Cooperativas Agroalimentarias e a Organización Interprofesional Láctea (Inlac), detalla cada un dos contidos do programa consonte a diferentes fases de execución. Así, como medidas concretas, propóñense, entre outras, accións formativas e demostrativas, incluíndo a posta en marcha de granxas modelo, con visitas guiadas ás súas instalacións. Tamén, percorridos por fábricas do sector e un reforzo á comunicación e sensibilización social arredor do consumo de produtos lácteos galegos. Nesta liña, fomentarase ademais a remuda xeracional no sector e porase en valor a preocupación ambiental que mantén este eido produtivo, xunto con actuacións para fomentar o consumo de lácteos entre os consumidores.

O Clúster Alimentario de Galicia (Clusaga) estará presente na Nave 6 do Mercado de Abastos de Santiago xunto a once empresas socias que colaboran coa iniciativa. A finalidade é facer unha promoción conxunta de produtos galegos, nos que o posicionamento das diferentes marcas contribúe a proxectar a marca Galicia e dá continuidade as estratexias de marketing e comercialización destas empresas.  O local inaugurase o vindeiro martes e durante a xornada ofreceranse catas e degustacións dos produtos destas entidades, en horario de 9.30 a 14.30 horas. As persoas que se acheguen aos postos coñecerán de primeira man alimentos e bebidas das diferentes marcas e poderán recibir agasallos ou participar no sorteo de experiencias de turismo industrial ou gastronómico, entre outras actividades. Deste xeito, baixo o reclamo “Na túa despensa, o mellor de Galicia”, Bódegas Martín Códax, Cafés Candelas, Cuevas Marrón Glacé, El Nogal, Granbazán, Larsa, Méndez-Rojo, Pazo do Queixo, Quescrem, Real Conservera Española e Torre de Núñez estarán presentes neste espazo do 12 ao 19 de setembro. Esta primeira acción promocional, organizada dende a Área de Mercados e Internacionalización de Clusaga, conta coa colaboración do Concello de Santiago de Compostela, o Centro Superior de Hostalaría de Galicia, Asociación Hostalaría Compostela e Socivi. Ademais, están involucradas nas outras entidades socias de Clusaga como o Consello Regulador da DOP Arzúa – Ulloa, o Consello Regulador das IXP de Carne de Vacún de Galicia, Lugar Daveiga e Pazo de Vilane. Axenda da Aula – Cociña En paralelo ao posto da Nave 6, e durante esta semana de promoción conxunta, a Aula – Cociña do Mercado será escenario de diversos eventos promovidos polas empresas participantes Cuevas Marrón Glacé, Real Conservera Española e Cafés Candelas, e polas entidades socias de Clusaga IXP Ternera Gallega e Arzúa – Ulloa DOP. Asimesmo, o xoves 14 de setembro celebrarase a presentación da campaña de Clusaga, que reunirá a representantes institucionais de ámbito local e autonómico en materia de gastronomía e turismo para afondar nesta iniciativa e visitar o posto da Nave 6. Ese mesmo día, e tras a celebración dun Showcooking no que o cociñeiro compostelán Alén Tarrío (Pampín Bar) amosará receitas cos produtos participantes, o público da praza poderá probar as elaboracións a partir das 12.45 horas.

Galo Gutiérrez, director da oficina do PERTE Agroalimentario, con Santiago Álvarez, do IGAPE, e Carmen Lence O director da Oficina Técnica do Comisionado para o Programa Estratéxico de Recuperación e Transformación Económica (PERTE) Agroalimentario, dependente do Ministerio de Industria, Galo Gutiérrez, acudiu este xoves á sede do Grupo Lence en Lugo, onde mantivo un encontro cos integrantes do consocio SmarTZ4milk, o proxecto que aspira a captar fondos europeos Next Generation para avanzar na rastrexabilidade produtiva e redución da pegada ambiental da industria láctea. Coordinado polo Clúster Alimentario de Galicia (Clusaga) e liderado polo Grupo Lence, integra a outras 6 industrias lácteas asentadas na comunidade: Clun, Larsa, Leite Celta, Prestes, Queizuar (Bama) e Bico de Xeado. En total prevense case 26 millóns de euros en investimentos nos próximos 2 anos, con dous eixos fundamentais en materia de transición dixital (trazabilidade da produción) e ambiental (redución dun 5% do consumo hídrico no proceso industrial, dun 10% do consumo enerxético e de 95 tm/ano de emisións de CO2).

Trátase do proxecto conxunto entre industrias de maior investimento no sector agroalimentario galego

Ademais de proxectos conxuntos, como a mellora da trazabilidade e a investigación de métodos analíticos baseados en proteómica para o estudo de proteínas do leite, cada empresa levará a cabo investimentos específicos en función das súas necesidades produtivas. O maior volume corresponde a Leite Río, con case 7 millóns de euros. Influencia en toda a cadea láctea O reto de SmarTZ4milk é modernizar a actual cadea de produción, transformación e distribución da industria láctea para dotala de ferramentas de competitividade baseadas na tecnoloxía e a sustentabilidade. O principal obxectivo é dar un impulso esencial á transformación dixital da industria láctea a través da automatización de procesos, sensórica avanzada e xestión eficiente, así como desenvolver unha nova ferramenta de rastrexabilidade integral da produción desde a granxa ao consumidor.

A través de intelixencia artificial e big data poderá predicirse a oferta e a demanda: canto leite se vai producir e canto leite se vai demandar

Por iso, aínda que o foco investidor está posto na industria, SmarTZ4milk mira cara arriba e cara abaixo na cadea láctea. “A través de intelixencia artificial e big data poderemos predicir canto leite se vai producir nas ganderías e canto se vai a demandar na distribución”, explicou Hugo Criado, de Medrar Smart Solutions, un dos coordinadores técnicos desta candidatura ao PERTE Agroalimentario. Soberanía alimentaria Carmen Lence destacou que “nun mundo cada vez máis globalizado, é esencial que manteñamos e fortalezamos o noso sector agroalimentario”. “Desde Galicia, onde producimos o 40% do leite en España, contribuímos a manter a soberanía alimentaria do noso país. Coa pandemia pola covid e a guerra de Ucraína vimos as consecuencias de ser dependentes dos produtos doutros países. Nos alimentos é algo fundamental”, asegurou.

Este proxecto é unha oportunidade para transformar o sector lácteo galego

A responsable de Leite Río e Leyma asegurou que os fondos europeos Next Generation supoñen “unha oportunidade para transformar o sector lácteo galego”. “É vital fomentar a innovación e a adopción de novas tecnoloxías que melloren a eficiencia e a sustentabilidade da nosa operativa diaria para que o sector lácteo galego siga liderando a produción e transformación láctea en España e sendo unha potencia a nivel europeo”, insistiu.

Empresas competidoras únense para captar fondos

Público asistente á presentación do proxecto, este xoves na sede de Leite Río A obriga de presentar proxectos conxuntos que involucren a distintas empresas e institucións para poder optar á convocatoria do PERTE Agroalimentario fixo posible que empresas que compiten entre si no mercado unisen forzas para optar a estes fondos. Entre elas están representadas neste proxecto as distintas tipoloxías empresariais existentes no sector lácteo en Galicia, desde grandes compañías como Grupo Lence, cooperativas como Clun ou CAPSA e pemes como Prestes, Queizuar ou Bico de Xeado.

O sector lácteo galego articúlase ao redor de 113 industrias e xera perto do 2% do PIB da comunidade

As 7 industrias lácteas involucradas en SmarTZ4milk recollen diariamente o leite producido por 1.500 ganderías, polo que se espera que o proxecto teña “un impacto positivo en toda a sociedade”. “Chegaremos co diñeiro a toda a cornixa cantábrica e o 45% dos fondos irán parar a municipios de menos de 10.000 habitantes, cun impacto que chegará desde as ganderías ao consumidor”, aseguraron os coordinadores da candidatura presentada. Próxima convocatoria para proxectos individuais Galo Gutiérrez, director da Oficina Técnica do Comisionado para o PERTE Agroalimentario, destacou a aposta que desde o Ministerio de Industria se fixo nesta primeira convocatoria de fondos en favor dos proxectos conxuntos, pero anunciou que os proxectos individuais poderán optar a futuras convocatorias.

Estamos a ver que os proxectos conxuntos conlevan importantes complicacións de xestión e en futuras convocatorias seguramente se permitan proxectos individuais

“Estamos a ver que estes proxectos conxuntos son máis transformadores pero levan aparelladas complicacións importantes de xestión e posiblemente, en función do grao de execución do PERTE actual, haberá unha segunda convocatoria o ano que vén onde se poderán incluír proxectos individuais”, avanzou. Iniciativas no sector do viño e os doces Galo Gutiérrez tamén explicou que o cronograma previsto polo Ministerio inclúe a resolución provisional á volta do verán e o pago antes de que acabe o ano aos distintos proxectos que concorren ao PERTE Agroalimentario. "Nesta primeira convocatoria non houbo máis peticións ca diñeiro, polo que todos os proxectos que estean ben e cumpran coa convocatoria recibirán financiamento", aclarou.

Haberá diñeiro para todos os proxectos que cumpran coas bases da convocatoria

Entre as 22 iniciativas presentadas á actual convocatoria inclúense 7 vinculadas a Galicia. Ademais do proxecto da industria láctea hai 2 centrados no sector do viño (un deles liderado polo Grupo Torres) e outro no da repostería. En total, sumarían case 55 millóns de euros de investimento, dos que case a metade corresponderían a SmarTZ4milk. O encontro co director da Oficina Técnica do PERTE Agroalimentario complementouse con visitas ás instalacións do Grupo Lence e ás fábricas de Clun e Queixerías Bama, onde puido coñecer os procesos produtivos seguidos en cada caso.

A innovación e o compromiso co sector da alimentación volveron ser recoñecidos polo Clúster Alimentario de Galicia, Clusaga, que vén de entregar os IX Premios Galicia Alimentación. Nesta ocasión recaeron en mans de Granja Campomayor, Río de Galicia, CienPorCel, El Nogal e Bico de Xeado. Como vén sendo habitual, a entrega dos premios foi o broche de ouro do VIII Foro Galicia Alimentación e o responsable do peche foi o presidente da Xunta de Galicia, Alfonso Rueda. Por parte de Clusaga, interveu o actual presidente, Juan José de la Cerda, que agradeceu aos patrocinadores e a todos os candidatos a súa participación. O Clúster bateu este ano un récord, con 99 candidaturas: 28 na de Produto Innovador, 36 na de Produto Excelente, 18 na de Estratexia de Mercado e 17 delas na categoría de Proxecto Sectorial. Tras a deliberación do xurado, a relación de galardoados é a que, a continuación, se indica: 1. Premio Galicia Alimentación ao Produto Innovador. Nesta categoría galardóanse produtos caracterizados pola súa innovación, potencial comercial, deseño, posibilidade de agregar valor aos produtores galegos e con especial atención á relación entre nutrición e saúde. Na presente edición resultaron premiadas as seguintes firmas ex aequo: - Granja Campomayor, pola gama de produtos Wovo. Inclúe produtos sorprendentes e únicos no mercado procedentes da clara de ovo. Trátase dunha alternativa aos lácteos e ás bebidas de orixe vexetal, tanto pola súa textura e sabor como polas súas propiedades. De orixe 100% natural, é un alimento saudable e nutritivo. - Río de Galicia, polo seu leite Opti+Plus. É o primeiro leite reducido en azucre do gran consumo nacional. A través do innovador e exclusivo proceso de ultrafiltración, conséguese concentrar en maior cantidade as proteínas e o calcio do leite, á vez que se reducen os seus azucres naturais. 2. Premio Galicia Alimentación ao Produto Excelente. Esta categoría recoñece a incorporación nos produtos de valores tradicionais adaptados ao momento actual, o deseño diferencial ou o uso de materias primas locais na súa elaboración. Resultou gañador: - CienPorCel, polo seu Paté de Porco Celta “Cunca e Cortizo”. Elaborado con fígado e ingredientes de calidade diferenciada de orixe local e aderezado con viño Treixadura da D.O. Ribeiro de Adegas do Rexurdir e coa IXP Mel de Galicia de Doce de Bágoa, o Paté de Porco Celta “Cunca e Cortizo” é un produto sen conservantes nin colorantes engadidos, sen glute e sen lactosa. 3. Premio Galicia Alimentación á Estratexia de mercado. Unha categoría para poñer en valor e premiar o esforzo das organizacións da industria de alimentación e bebidas para acceder, desenvolver e consolidar a súa posición no mercado nacional e internacional. Alzouse co galardón: - El Nogal, pola creación da súa marca de exportación El Nogal Welleness Nuts. A empresa puxo en marcha un plan de exportación, centrado na creación de marca en EE.UU. e Canadá. Grazas á súa estratexia de creación da marca El Nogal Wellness Nuts, lograron entrar no mercado e estar presentes en importantes cadeas de distribución, así como en plataformas en liña dos principais importadores de produtos españois. 4. Premio Galicia Alimentación ao Proxecto sectorial. Esta categoría recoñece, dentro do sector da alimentación, aqueles proxectos destacados ou singulares que se caractericen pola súa innovación na organización, na produción e/ou no modelo de negocio, así como por estar aliñados cos ODS. Este ano resultou gañador: - Cooperativa Agraria Provincial de A Coruña, polo seu proxecto Bico de Xeado. Bico de Xeado merece este recoñecemento pola súa capacidade de engadir valor ao produto final, recuperando a elaboración tradicional do xeado, con leite procedente das granxas que conforman a Cooperativa Agraria Provincial de A Coruña como materia prima. Durante a súa intervención, o presidente da Xunta, Alfonso Rueda, sinalou a importancia dos Premios Galicia Alimentación, que serven de “agradecemento a un sector que move Galicia”. Rueda subliñou o compromiso da Goberno galego con esta actividade, así como coas empresas e produtores, incidindo en que se “a eles lles vai ben, a Galicia tamén lle irá ben”. Pola súa parte, o presidente de Clusaga felicitou aos galardoados, aos que cualificou como proba “da potencialidade e da proxección” do sector da alimentación e das bebidas. De la Cerda incidiu en que esta actividade segue sendo “clave” en Galicia, tanto pola súa dimensión, como pola súa transcendencia económica e social. Unha afirmación que o presidente sustentou en varias cifras: nos 7.100 millóns de euros de valor engadido e nos 165.000 postos de traballo que xera o sector. De la Cerda, por último, concluíu a súa intervención desexándolle “sorte e moitos éxitos” á nova directiva e, en particular, ao novo presidente, Andrés Rodríguez, logo de que fose elixido na Asemblea Xeral de socios de Clusaga esta mañá. VIII Foro Galicia Alimentación Antes da entrega dos galardóns celebrouse o VIII Foro Galicia Alimentación, que este ano se centraba na Alimentación sostible e resiliencia alimentaria: reflexións en torno a unha transición necesaria. Ao redor desta temática reuniuse a expertos e profesionais da industria para analizar e poñer en común as súas reflexións e ideas sobre os retos e o futuro do sector.

O desenvolvemento rural, a resiliencia e a produción sostible serán os temas protagonistas do VIII Foro Galicia Alimentación. Baixo o titulo de “Alimentación sostible e resiliencia alimentaria: Reflexións en torno a unha transición necesaria”, o Clúster Alimentario de Galicia (Clusaga) reunirá a expertos nestas cuestións para abordar os retos de futuro aos que se terá que afrontar o sector. Será o 14 de xuño na Cidade da Cultura de Galicia. Para tratar un tema tan complicado e que afecta a todos os elos da cadea da alimentación, Clusaga reuniu tanto a expertos en medio ambiente e na aplicación da sostibilidade nas empresas como a produtores para, xuntos, afondar nestas problemáticas desde diferentes perspectivas. A xornada comezará coa mesa redonda “Unha transición necesaria”, na que participarán: Antonio Vasconcelos, colíder en Planetiers New Generation e INSURE.Hub, unha iniciativa que, dende Portugal, ten como obxectivo promover o coñecemento, innovación e emprendemento sostible nas empresas e organizacións, de cara a transición verde; e Mila Valcárcel, managing partner de Eatable Adventures, unha compañía internacional que traballa con proxectos foodtech emerxentes do sector para xerar un impacto relevante no sector da alimentación. A mesa complétase coa presenza de Eva Garrell, que desde B Corp Impact Programs Senior Lead de B Lab Spain asesora no deseño e implementación de estratexias de sostibilidade empresarial; e María Coto, directora da liña de desenvolvemento rural e sostibilidade en Red2Red. Na outra mesa redonda, “Do mar e a granxa á mesa”, serán os produtores os que tomen protagonismo da man de nomes destacados en redes sociais e medios, que traballan para pór en valor o sector e a calidade dos seus produtos, coma María Fontán, máis coñecida como “Mariscadora 2.0”, e Ana Corredoira, bióloga e gandeira en Ganados A Cernada. Xunto a elas estará o CEO de Kiwi Atlántico, José Piñeiro, e a xerente da Real Conservera Española, Lucrecia García.  Por último, a conferencia principal do foro impartiraa José María Bonmatí, o director xeral da Asociación de Fabricantes y Distribuidores AECOC, unha das maiores asociacións empresariais do país que representa ao sector de bens de consumo a nivel nacional. Bonmatí ofrecerá un relatorio titulado “Visión do sector e o gran consumo” no que explicará que o consumidor é cada vez máis consciente e, polo tanto, máis esixente cos distintos axentes da cadea de valor da alimentación. De feito, a tendencia vai cara un consumo con atención á ética e a sostibilidade.

Premios Galicia Alimentación

Como xa vén sendo tradición, unha vez rematado o foro, procederase á entrega dos Premios Galicia Alimentación, nos que este ano conseguiuse un récord de participación con 99 candidaturas entre as catro categorías: a Produto Innovador, a Produto Excelente, a Proxecto Sectorial e á Estratexia de Mercado. Tanto o Foro coma os Premios Galicia Alimentación contan co apoio institucional da Xunta de Galicia e co patrocinio ouro de Caixa Rural Galega, Gadis e Vegalsa Eroski e aos mesmos asistirán responsables da administración pública e das principais empresas distribuidoras de Galicia.

A Agrupación industrial Alimentaria de Galicia (Clusaga) convoca por noveno ano consecutivo os Premios Galicia Alimentación que recoñecen iniciativas e accións destacadas no ámbito da industria da alimentación galega. As persoas interesadas en optar a estes galardóns poden presentar os seus proxectos ata o 10 de maio a través dos formularios dispoñibles na web de Clusaga. Este ano, os Premios Galicia Alimentación teñen catro categorías: a Produto Innovador, a Produto Excelente, a Proxecto Sectorial e a Estratexia de Mercado que distingue as seguintes áreas: ◦ Premio Galicia Alimentación ao Produto Innovador. Enfocado a premiar os produtos galegos que destaquen pola súa innovación, potencial comercial, deseño, posibilidade de agregar valor ou pola súa adaptación ás demandas do consumidor. ◦ Premio Galicia Alimentación ao Produto Excelente. Recoñece a incorporación de valores tradicionais adaptados ao momento actual cun deseño diferencial e empregando produtos e materias primas locais, polo que esta categoría diríxese a alimentos e bebidas con calidades organolépticas superiores, poñendo especial atención aos produtos ecolóxicos e gourmet. ◦ Premio Galicia Alimentación ao Proxecto Sectorial. Galardoa proxectos innovadores, institucións, organizacións ou empresas de especial relevancia que se caractericen pola súa innovación na organización, produción e/o modelo de negocio. Tamén que desenvolvan produtos ou servizos innovadores no ámbito da cadea de valor dos alimentos e bebidas, incluíndo o desenvolvemento tecnolóxico cara á fábrica do futuro 4.0 e o cumprimento dos Obxectivos de Desenvolvemento Sostible ou que destaquen polo seu carácter emprendedor e cooperativo e a súa visión estratéxica. ◦ Premio Galicia Alimentación á Estratexia de Mercado. Pon en valor o esforzo de empresas e organizacións da industria de alimentación e bebidas para acceder, desenvolver e consolidar a súa posición no mercado nacional e internacional. Valorarase o seu plan de márketing no posicionamento en novos nichos de mercado e a orientación ao consumidor, así como a implementación de campañas de márketing. Ademais, terase en conta a evolución continua e o dinamismo das exportacións na súa estratexia de internacionalización.

Candidaturas

Poden presentar candidatura aos Premios Galicia Alimentación 2023 persoas físicas, autónomos, micro, medianas e grandes empresas que teñan sede social, centros produtivos ou exerzan a súa actividade comercial ou transformadora en Galicia, así como institucións galegas ou situadas fóra do territorio que desenvolvesen actividades en favor dos produtos alimentarios galegos, tendo estes orixe ou transformación en Galicia ou na frota pesqueira dunha empresa galega. Unha mesma entidade pode presentar candidaturas a máis dunha categoría e mesmo máis dunha candidatura na mesma categoría. As entidades que resultasen galardoadas en edicións anteriores poden volver optar a estes premios. O obxectivo destes galardóns é recoñecer e visibilizar as accións do sector alimentario con impacto na calidade, a excelencia, o emprendemento, a dixitalización, a innovación, a sustentabilidade, o márketing e a internacionalización.

Entrega de premios

Os gañadores daranse a coñecer nunha gala que se celebrará o 14 de xuño, coincidindo co Foro Galicia Alimentación, que cada ano é organizado por Clusaga, co apoio institucional da Xunta de Galicia e co patrocinio de Caixa Rural Galega, Gadis e Vegalsa Eroski. "Este foro supón un espazo de intercambio de experiencias e coñecementos e serve de estímulo para a colaboración entre os diferentes elos da cadea alimentaria: produción, procesamento, distribución e consumo de alimentos", sinalan dende Clusaga.  Entre os gañadores da edición pasada están compañías como Real Conserveira Española, Hijos de Rivera, Leite Río, Alibós, Quescrem, Gadis, Larsa e Pereira Produtos do Mar.

Consulta aquí a documentación para presentar as candidaturas:

- Bases da convocatoria

-Formulario Categoría Produto Innovador

-Formulario Categoría Produto Excelente

-Formulario Categoría Proxecto Sectorial

-Formulario Categoría Estratexia de Mercado

Business Factory Food (BFFood), a aceleradora vertical do sector alimentario galego impulsada pola Xunta de Galicia e dinamizada polo Clúster Alimentario de Galicia (Clusaga) e empresas de referencia na industria alimentaria galega, vén de seleccionar os 14 proxectos que participarán na súa V Edición. Dos seleccionados, 4 accederán ao programa de consolidación e 10 ao de aceleración. A gran maioría deles proceden de startups galegas, pero tamén están presentes iniciativas de País Vasco e Canarias. Todos eles recibirán apoio integral e especializado, durante nove meses no caso del programa de aceleración, e doce no de consolidación, con acceso a mentoría, formación, coaching, servizos técnicos, infraestruturas e medios especificamente concibidos para o seu ámbito de desenvolvemento. O obxectivo é impulsar a súa idea innovadora para facer fronte a los retos do sector alimentario. Ademais, cada startup do programa de consolidación terá a oportunidade de recibir apoio económico, a través dun préstamo participativo por parte da Xunta a través de XesGalicia, que podería conlevar unha opción de capitalización de ata un máximo de 250.000€. No caso no programa de aceleración, os proxectos poderán acceder a financiamento do Goberno galego a través da Axencia Galega de Innovación (Gain), de 25.000€ a fondo perdido, e de XesGalicia, a través de un préstamo participativo que podería conlevar unha opción de capitalización de ata 50.000€. Esta V Edición recibiu un total de 33 candidaturas, tanto a nivel nacional como internacional, e contou co apoio de 22 empresas líderes do sector alimentario galego. Estas buscan, entre as propostas, recibidas solucións innovadoras para os retos plantexados, ao tempo que as apoian e acompañan na súa chegada ao mercado, xerando oportunidades de negocio para ambas partes. Destas empresas, as encargadas do proceso de mentoría dos proxectos seleccionados na V Edición de BFFood serán Grupo Lence, Innolact, Grupo Nueva Pescanova, Grupo Pereira, Viña Costeira, Hijos de Rivera, Bodegas Martín Códax, Congalsa e GADISA. Xunto a estas, as entidades AGACA e Clusaga tamén participan como mentoras nesta edición da aceleradora.

Proxectos seleccionados no programa de Aceleración

YOWUPMILK: Este proxecto propón o desenvolvemento de leite e iogures para cans e para gatos en formatos adaptados ao mercado, cunha vida útil de 18 meses, sen frío e cunha formula adaptada ás súas necesidades nutricionais. GRABITVISION: Esta iniciativa desenvolve solucións de visión artificial para o sector agroalimentario, a través dunha plataforma propietaria baseada en Deep Learning que permite desenvolver de xeito rápido e flexible diversos casos de uso nun hardware de custo reducido. SALMOIRA: Desenvolve produtos semiconservados para o seu consumo directo, produtos de quinta gama ou a salazón de alimentos coma método de conservación para o seu posterior consumo desalado. Tamén desenvolve de xeito industrializado dun novo produto envasado e conservado, destinado a canle HORECA ou alimentación gourmet. ANFOOD: Este proxecto desenvolve un produto plug & play que aprenda de xeito automático a detectar anomalías en imaxes de comida, de tal forma que calquera persoa sen coñecementos en Intelixencia Artificial poda levar a cabo un sistema de detección de corpos estraños de xeito autónomo. GRADHOC: Desenvolve unha plataforma multiprotocolo de intelixencia artificial para a monitorización, optimización e automatización de instalacións e alarmas, con análise preventivo e preditivo. Os principais beneficios para as empresas alimentarias serán a xestión e a optimización da enerxía en instalacións frigoríficas. NIGAL: Proxecto que realiza a xestión de stocks de xeito automatizado e facer predicións de ventas a partir de datos históricos mediante algoritmos de intelixencia artificial para diminuír o impacto da situación actual de incremento do prezo de materias primas e o grao de incerteza nos prazos de entrega TOFU LANDEIRA: Proxecto que fabrica tofu ecolóxico en base soia cunhas calidades organolépticas moi diferenciadas ao existente no mercado, elaborando, ademais, os produtos a partir de cultivo ecolóxico certificado propio. RECARBO: Proxecto que, mediante tecnoloxía blockchain asegura a rastrexabilidade de emisións GEI (gases de efecto invernadoiro) do produto desde a súa orixe, avaliando e acreditando a veracidade das emisións xeradas en toda a cadea de valor a fin de poder certificar un produto neutro en carbono baixo un estándar recoñecido internacionalmente (PAS 2050). BIOCROPS: iniciativa enfocada a desenvolver fertilizantes ecolóxicos a partir de subprodutos da cría de larvas de Tenebrio Molitor, xerando un abono orgánico 100% natural, previndo a degradación do solo de xeito sostible e obtendo quitina como biofortificante, en favor do Urban Farming. SEA 4.0: A proposta de valor de SEA 4.0 é sensorizar os cultivos mariños para poder comprender, con tecnoloxías avanzadas de tratamento de datos, os principais factores que inflúen na obtención de produtos de calidade óptima.

Proxectos seleccionados no programa de consolidación

NSF 4.0: Néboda é unha startup enmarcada no ámbito da agricultura vertical de interior, que ten como misión a produción de vexetais da máis alta calidade, de proximidade, cultivados preto dos puntos de venda e dos consumidores, dun modo sostible, minimizando ao máximo a pegada ecolóxica e independente da estacionalidade. BUFFET WASTE: Proxecto que conta cun sistema intelixente de medición do desperdicio alimentario xerado nos buffets e puntos de restauración dun establecemento hoteleiro. Este aplicativo permitirá cuantificar os residuos de comida do buffet diferenciándoos por tipoloxía, e vinculados ao perfil do tipo de cliente aloxado. ENZICAS: Empresa que levará ao mercado un aditivo alimentario natural que reduce os tempos de maduración de queixos e embutidos conseguindo unha optimización dos custos operativos, reducindo a adición en sales no produto final e as emisións de CO2 producidas ao longo do proceso produtivo. PROVIDE: Servizo de diagnóstico e asesoramento personalizado ao sector vitivinícola para o desenvolvemento de solucións biotecnolóxicas de control de enfermidades e valorización de subprodutos.

Sobre Business Factory Food 

Business Factory Food é a aceleradora do sector alimentario de Galicia, impulsada pola Xunta de Galicia e dinamizada polo Clúster Alimentario de Galicia e empresas de referencia na industria alimentaria. Busca atraer e impulsar proxectos innovadores de emprendemento, tanto nacionais como internacionais, para facer fronte aos retos do sector nunha contorna global.

A Comisión de Innovación do Clúster Alimentario de Galicia (Clusaga) e o Campus Terra da USC organizan o mércores 1 de febreiro, a partir das 10:00 horas, no edificio Cactus da sede universitaria luguesa, a xornada Impulsando a innovación no sector lácteo galego mediante a colaboración universidade-empresa, un foro a través do que se pretenden fomentar as colaboracións no ecosistema galego de innovación agroalimentaria. As empresas participantes nesta xornada, dirixida ao sector primario, principalmente leiteiro, e á industria láctea, terán oportunidade de coñecer de primeira man as capacidades do Campus Terra da USC, un polo de especialización que nace coa intención de transformar a sede universitaria luguesa nun referente científico e social nos ámbitos do coñecemento vencellados coa sustentabilidade económica, social e medioambiental do uso da terra. A delegada do reitor da USC para o Campus Terra, Elvira López Mosquera; o xerente do Clusaga, Roberto Alonso, e o presidente da comisión de innovación do Clusaga, Sergio Martínez, serán os encargados de dar a benvida a todas as persoas participantes neste programa, un foro estruturado en diversas sesións durante as que se presentarán as fortalezas e capacidades de investigación do Campus Terra, ademais de poñelas en relación cos intereses das empresas, ao tempo que se tratarán os diversos programa de financiamento dispoñibles para favorecer a colaboración universidade-empresa. Programa O faladoiro Capacidades do Campus Terra en agroindustria e produción primaria aplicable ao sector lácteo, no que intervirán como relatores os profesores e investigadores do Campus de Lugo da USC Ramiro Fouz, Fernando Pardo, Patricia López, Manuel Vázquez e Sandra Castro, abrirá o programa. A xornada continuará cun relato sobre os Intereses e prioridades das empresas no sector lácteo galego, a cargo do CIO de Galacteum, Ángel  Pereira; así como dos CEO de Innolact, Sergio Martínez, e de PSVET, Iván Cid. A presentación das convocatorias de financiamento existentes para proxectos colaborativos e experiencias previas do Clusaga, a cargo da coordinadora de innovación do Clusaga, Noelia Dosil, pechará a quenda de relatorios deste foro de impulso á innovación no sector lácteo galego. Visita ás instalacións da Aula de Produtos Lácteos A xornada, que durará toda a mañá, terá continuidade cun obradoiro colaborativo no que as empresas representadas terán a ocasión de interactuar cos grupos de investigación implicados neste foro, a fin de procurar e definir oportunidades concretas de colaboración. Unha vez rematada esta sesión, as persoas inscritas poderán completar unha visita ás instalacións da Aula de Produtos Lácteos e Tecnoloxías Alimentarias (APLTA) da USC ou aos laboratorios da empresa de tecnoloxía de análise sensorial TasteLab. As persoas interesadas en tomar parte na xornada poden formalizar a súa incrición de balde ata o 31 de xaneiro a través do formulario online habilitado ao efecto. Pódese obter máis información a través do número de teléfono 981 55 60 62 ou no enderezo de correo electrónico industria@clusaga.org.

A innovación e o compromiso co sector da alimentación foron recoñecidos, un ano máis, nos Premios Galicia Alimentación. O Clúster Alimentario de Galicia (Clusaga) distinguiu, esta mañá, estas dúas calidades, presentes nos proxectos galardoados na oitava edición. Nesta ocasión, as distincións recaeron en mans das seguintes compañías: Real Conservera Española, Hijos de Rivera, Grupo Leche Río, Alibós Galicia, Quescrem, Gadisa, Larsa e Pereira Produtos del Mar. A entrega dos Premios foi o broche de ouro do VII Foro Galicia Alimentación, cuxa inauguración correu a cargo do presidente de Clusaga, Juan José de la Cerda, e do presidente da Xunta de Galicia, Alfonso Rueda. A entrega dos VIII Premios Galicia Alimentación 2022 contou coa presenza do conselleiro do Medio Rural, José González, da conselleira do Mar, Rosa Quintana, e do director do Instituto Galego de Promoción Económica, Fernando Guldrís. Nesta oitava convocatoria, foron oito as compañías, proxectos e iniciativas que recibiron algún dos premios por parte do Clúster Alimentario de Galicia nas seguintes categorías: produto excelente, produto innovador, proxecto empresarial e estratexia de mercado. A relación de galardoados é a que, a continuación, se detalla:

1. Produto excelente. A pesar de ser unha categoría de nova creación, foi a que máis candidaturas recibiu, alcanzando a cifra de 24.

Real Conservera Española S.L. por Navajas de las Rías Gallegas ao natural. O xurado destacou que o produto se elabora cunha previa selección manual dos mellores exemplares que, directamente, sométense a un proceso de depuración natural en auga de mar para eliminar a area. As navallas se enlatan unha a unha, a man e con todo o coidado que require este excelente produto. Recoñécese con todo isto un produto final excelente, con historia, carisma, artesanal e natural que ten a orixe na mellor materia prima e que é un embaixador da excelencia dos produtos galegos.

2. Produto innovador, que na presente edición conta con dúas premiadas ex aequo:

Hijos de Rivera S.A. por Fontarel Zero Sodio. Grazas á aplicación de tecnoloxía avanzada de ósmose inversa e a reconstitución da composición mineral orixinal da auga eliminouse o sodio, obtendo un produto recoñecido pola Fundación Española del Corazón polo seu beneficio para a saúde. Grupo Leche Río S.L. por Optipro. O tribunal sinala que este produto está elaborado con leite ultrafiltrado con alto contido en proteína, baixo en graxas, sen azucres engadidos e sen lactosa. Estas bebidas de base láctea e hiperproteica están dirixidas a persoas que realicen algún tipo de deporte ou actividade física.

3. Proxecto empresarial, tamén con dúas compañías galardoadas ex aequo:

Alibós Galicia, dedicada á produción, elaboración e comercialización da castaña pelada e ultraconxelada e derivados para a súa venda a industrias do mercado internacional. O xurado sinalou que a empresa incentiva o sector primario e repercute no consumidor, garantindo un produto ecolóxico, seguro e saudable. Quescrem pola súa planta de biogás baseada en permeato, a primeira do seu tipo en España. Destácase a súa preocupación pola sustentabilidade ambiental, buscando a incorporación de medidas que reduzan o consumo de recursos á vez que minoran a xeración de residuos, potenciando a circularidade dos procesos.

4. Estratexia de mercado, con tres marcas galardoadas ex aequo:

Gadisa Retail S.L.U. por Gadis, coa alimentación saudable. O tribunal apuntou que a marca emprega as súas redes sociais para levar a cabo diferentes accións para achegar un estilo de vida saudable aos seus seguidores publicando, ademais, contidos para a divulgación de coñecementos sobre distintos temas relacionados coa alimentación saudable e o consumo responsable. Corporación Alimentación Peñasanta S.A. por Larsa, a marca de Pastoreo vinculada a Galicia desde fai case medio século. Ponse en valor o seu propósito para defender o patrimonio natural de Galicia para poder seguir gozando das súas paisaxes e sabores. O xurado indica que a estratexia seguida pola marca foi un éxito en termos de venda, imaxe de marca e brand equity. Pereira Produtos del Mar S.A. por Gastronomía en el Camino de Santiago. Trátase dun receitario con 12 elaboracións que os peregrinos medievais incluían nas súas comidas. Neste caso, destácase a iniciativa, que cobre un baleiro bibliográfico sobre a gastronomía do Camiño durante os primeiros anos da peregrinaxe, unindo nun mesmo documento rigor histórico e científico, usos e costumes e gastronomía. A maiores, a xunta directiva do Clúster Alimentario de Galicia decidiu entregar, por unanimidade, o Premio Honorífico Galicia Alimentación a Juan Vieites, quen foi secretario xeral de Anfaco-Cecopesca desde o 1991 até o ano 2022. Con este galardón búscase recoñecer a súa contribución ao Clúster Alimentario de Galicia como socio fundador, así como o seu labor a favor do impulso do desenvolvemento e á I+D+i no sector alimentario galego, en particular no complexo mar industria. Durante a súa intervención, o presidente de Clusaga felicitou aos galardoados, aos que cualificou como "grandes expoñentes e exemplos da riqueza e o talento do sector en Galicia". De la Cerda incidiu en que o da alimentación ?segue sendo un sector de gran importancia dentro da economía de Galicia, tanto en termos produtivos como sociais".

VII Foro Galicia Alimentación

Antes da entrega de galardóns celebrouse o programa do VII Foro Galicia Alimentación, que reuniu a expertos e profesionais dentro da industria que analizaron e puxeron en común as súas reflexións e ideas acerca dos retos e o futuro do sector. Para lograr un achegamento ao presente e ao futuro, o evento ofreceu tres relatorios e unha mesa redonda sobre estas cuestións: tendencias globais no ano 2022, a nanotecnoloxía e a súa aplicación no sector, as estratexias de futuro e a mercadotecnia de transformación social e, por último, os desafíos nunha contorna cambiante como o actual. Estas temáticas foron abordadas polos seguintes relatores: a Customer Success Manager de Innova Market Insights, Marta Delgado do Río; o Chair of the Research Office en International Iberian Nanotechnology Laboratory, Lorenzo Pastrana Castro; o presidente de AGR Food Mercadotecnia e AGR Transformación Social, Mateo Blay Berto; o director de Palafox Food & Wine, Jaime Palafox Gamir; o director de Entrepinares, José Manuel García-Bejines; a directora de Casa Grande de Xanceda; Cristina Fernández-Armesto; a directora de ODS Protein, Iría Varela Campo; e o director de Cafés Candeas, Ramón Alonso Castro.

A innovación e a transición ecolóxica no sector da alimentación serán dúas dos temas centrais do VII Foro Galicia Alimentación do Clúster Alimentario de Galicia (Clusaga). Para abordar estas temáticas en profundidade, a cita reunirá a expertos e profesionais dentro da industria que analizarán, debaterán e porán en común as súas reflexións e ideas acerca dos retos e o futuro do sector. Para lograr un achegamento ao presente e ao futuro da industria, o evento ofrecerá tres relatorios e unha mesa redonda sobre estas cuestións: tendencias globais no ano 2022, a nanotecnoloxía e a súa aplicación no sector, as estratexias de futuro e a mercadotecnia de transformación social e, por último, os desafíos nunha contorna cambiante como o actual. Todas estas temáticas serán abordadas polos seguintes relatores: a Customer Success Manager de Innova Market Insights, Marta Delgado del Río; o Chair of the Research Office en International Iberian Nanotechnology Laboratory, Lorenzo Pastrana Castro; o presidente de AGR Food Mercadotecnia e AGR Transformación Social, Mateo Blay Berto; o director de Palafox Food & Wine, Jaime Palafox Gamir; o director de Entrepinares, José Manuel García-Bejines; a directora de Casa Grande de Xanceda; Cristina Fernández-Armesto; a directora de ODS Protein, Iría Varela Campo; e o director de Cafés Candeas, Ramón Alonso Castro. O Foro preséntase, non só como unha oportunidade para escoitar as opinións de diferentes expertos, senón tamén como un punto de encontro único para crear sinerxías. Aquelas persoas que queiran asistir ao encontro poderán facelo inscribíndose a través do formulario que o Clúster habilitou na súa páxina web https://bit.ly/39mz7nx. O programa completo do Foro está dispoñible na páxina web https://www.galiciafoodforum.info/.

Unha vez pechado o prazo de presentación de candidaturas aos VIII Premios Galicia Alimentación que organiza o Clúster Alimentario de Galicia (Clusaga), nesta VIII edición recibíronse un total de 63 candidaturas. Con estes galardóns, que se entregarán o 29 de xuño na Cidade da Cultura, búscase recoñecer e visibilizar as propostas empresariais que xeran un impacto positivo na industria dos alimentos e as bebidas. Con respecto ás convocatorias anteriores, o Clúster apostou, nesta edición, por confeccionar novas categorías dos Premios. En concreto, entregaranse os seguintes recoñecementos: ao Produto Innovador, ao Produto Excelente, ao Proxecto Empresarial ou Institucional e á Estratexia de Mercado. Dentro da cifra de propostas presentadas, a do Produto Excelente, de nova creación, foi a que recibiu un maior número de solicitudes (24 en total). O xurado, composto por representantes das tres universidades galegas, das Consellerías do Mar, do Medio Rural e Economía, representantes de empresas destacadas do sector, de Galicia Calidade e do Centro Superior de Hostalería de Galicia, reuniuse o pasado 8 de xuño para seleccionar aos gañadores. Estes daranse a coñecer, como é habitual, na gala dos Premios Galicia Alimentación. Foro Galicia Alimentación A Cidade da Cultura acollerá, tamén ese día, a celebración do VII Foro Galicia Alimentación. A cita contará con tres relatorios e unha mesa redonda nos que participarán profesionais da alimentación e as bebidas. O Foro preséntase como unha oportunidade única para crear novas sinerxias e explorar en profundidade as oportunidades dun sector que se adaptou a pasos axigantados a unha situación inesperada como foi a pandemia e que agora visualiza xa os novos horizontes. Aquelas persoas que queiran asistir ao encontro poderán facelo inscribíndose a través do formulario que o Clúster habilitou na súa páxina web. O Clúster Alimentario de Galicia é unha asociación sen ánimo de lucro integrada por máis de 100 socios, entre os que se atopan as principais empresas produtoras e transformadoras do sector, así como universidades e centros tecnolóxicos da comunidade. O seu obxectivo é contribuír ao fortalecemento, potenciación, crecemento sostible e mellora da competitividade e internacionalización do sector dos alimentos e as bebidas na comunidade.

Ante o agravamento do paro do transporte, as asociacións e entidades que integran á cadea de valor alimentaria – a Asociación Galega de Cooperativas Agrarias (AGACA) e a Agrupación industrial Alimentaria de Galicia (Clusaga)- alertan de que a situación xa é, nestes momentos, insostible e instan a acabar inmediatamente cun conflito que está a ter elevados custos para a economía e o conxunto da sociedade. Numerosas industrias e cooperativas tiveron que interromper os seus procesos de fabricación e víronse obrigadas a pechar temporalmente as súas plantas ante a falta de subministración, mentres que outras anunciaron que deberán facelo proximamente. Ademais, ante esta situación, as empresas de distribución traballan con grandes dificultades. Cando se cumpren nove días desde o inicio do paro, desde a cadea de valor agroalimentaria e do gran consumo consideran “inaprazable poñer fin a esta situación que está a poñer en claro risco o abastecemento de produtos, así como a continuidade de miles de empresas e empregos”. Agaca e Clusaga fan un chamamento ao Goberno de España a “unha intervención urxente nun conflito que se converteu nun problema de Estado cun impacto sobre a economía e os cidadáns que non admite demora”. Esixen, así mesmo, que se garanta a seguridade, coas medidas que sexan necesarias, e o dereito para traballar dos transportistas que non queren sumarse ao paro, e que quen o secunda non coaccione ao resto dos sectores da cadea nin impidan a libre circulación de mercadorías.