Galego
Máis de 5.000 gandeiros reclamarán, da man de Unións Agrarias, compensación económica polo diferencial entre o prezo percibido polo leite vendido entre 2000 e 2013 e o que deberían ter cobrado de non ser polas prácticas ilícitas das que as industrias se valeron para manter os prezos en orixe anormalmente baixos durante eses anos.
Mediante a presentación das interrupcións da prescrición correspondentes, a organización vén de iniciar un procedemento ao que se teñen sumado afectados de Galicia, Castela e León, Estremadura e Asturias. Un volume de reclamantes que dá mostra da magnitude do problema, pero que de seguro se incrementará nos vindeiros dous meses. Ese é o obxectivo da organización agraria, que ata setembro impulsará unha campaña informativa para chegar ao maior número posible de afectados.
Unións Agrarias agradece a confianza depositada na organización polos arredor de 5.200 gandeiros que teñen decidido efectuar as súas reclamacións ás industrias lácteas a través do seu equipo xurídico. A 11 de xullo, data na que inicialmente expiraba o prazo legal para que os afectados manifestasen a súa vontade de exercer o seu dereito a reclamar; son 4.500 gandeiros galegos; 300 de Castela e León; algo máis de 300 de Asturias; e outros 50 de Estremadura os que xa decidiron impulsar as correspondentes reclamacións a través da organización agraria que, no 2011, impulsou a denuncia diante de Competencia grazas á que hoxe se abre a posibilidade de que os titulares das explotacións opten a estas compensacións económicas.
O prazo aínda non rematou
De calquera xeito, Unións Agrarias confía en que o número de reclamantes se incremente aínda ata setembro; pois se ben o período para interromper a prescrición remataba o 11 de xullo, este tense incrementado debido á interrupción dos prazos establecida polo Real Decreto 463/2020 polo que se declarou o Estado de Alarma. Así as cousas, a organización anima a todos os gandeiros que entre 2000 e 2013 se dedicasen á venda de leite a non deixar pasar a ocasión de recuperar os ingresos que lles foron detraídos debido ás prácticas colusorias das industrias. Unha reclamación que poden efectuar sigan ou non en activo; e que, no caso de que os titulares da explotación teñan falecido, tamén teñen dereito a impulsar os seus herdeiros.
UUAA é a organización que a día de hoxe aglutina un maior número de follas de encargo de gandeiros en todo o territorio nacional. Unha cifra que confía en incrementar nos vindeiros dous meses. Co trámite realizado neste momento mediante a presentación da solicitude de interrupción da prescrición iníciase un procedemento que demorará no tempo, pero que supón, a xuízo do sindicato, “unha oportunidade histórica para que os gandeiros sexan compensados polas prácticas ilícitas impulsadas durante anos polas industrias e para comezar a impulsar unha relación máis xusta”.
No ano 2000 o número de explotacións existentes en Galicia roldaba as 35.000. Unións lembra que todas elas teñen dereito a reclamar e anima aos gandeiros que xa se teñan xubilado a non resignarse e a exercer o seu dereito a recuperar os ingresos que o “cártel” lles quitou do peto “cunhas manobras que conseguiron que os prezos do leite en orixe en Galicia se mantivesen conxelados durante anos e moi por debaixo da media estatal e europea”.
