Galego
Unións Agrarias presentou o pasado 16 de xullo unha denuncia diante da Axencia de Información y Control Alimentarios (AICA), dependente do Ministerio de Agricultura, contra a empresa Inleit Ingredients por “modificar de xeito unilateral os contratos cos gandeiros para forzar a baixa no prezo do leite en orixe”.
A firma situada no Polígono de Teixeiro-Curtis, veu enviando ás arredor de 150 ganderías galegas ás que lle recolle o leite notificacións nas que informa que cancela os acordos asinados nos meses de abril e maio que tiñan unha duración dun ano e unha cotización fixa de 295 euros por cada 1.000 litros vendidos.
“Modifica o tipo de prezo, de fixo a variable, impoñendo unilateralmente unha baixada de 2 céntimos. Establece como data de entrada en vigor o 1 de xullo de 2020, posterior en moitos casos á recepción da comunicación por parte do gandeiro ,e modifica a data de finalización do contrato ao reducir a duración a 3 meses, renovables automáticamente incumprindo a duración mínima dun ano. Tendo en conta estas anomalías é evidente que non reúne as condicións formais, establecidas no RD95/2019 para as ofertas de contrato”, argumentan dende Unións.
Ante esta situación, que considera “contraria a normativa vixente que se recolle na Lei de Cadea Alimentaria”, a organización agraria solicita á AICA que realice todas as comprobacións necesarias e se poña fin á conducta denunciada, que se declare a validez dos contratos vixentes o 30 de xuño de 2020, e se anulen os que teñen data de entrada en vigor el 1 de xullo de 2020.
Do mesmo xeito UUAA, pide que se investigue, garantindo o anonimato dos gandeiros para evitar represalias, a maneira na que Inleit Ingredients SLU obtivo a sinatura por parte dos produtores e se comprobe a veracidade do “mutuo acordo” e a incoación dos correspondentes procedementos sancionadores. Tamén se solicita que a organización denunciante sexa notificada de cantas actuacións se realicen así como das resolucións que se diten.
