Presentan un proxecto para mellorar os pastos de montaña en Galicia, Asturias e Cantabria

Publicidade
Presentan un proxecto para mellorar os pastos de montaña en Galicia, Asturias e Cantabria

Reunión no CIAM con representantes do SERIDA, do Centro Tecnolóxico da Carne e do CIFA

Representantes do Centro de Investigacións Agrarias de Mabegondo (CIAM) veñen de reunirse cos seus homólogos dos centros de investigación públicos SERIDA asturiano e do CIFA cántabro, así como con membros do Centro Tecnolóxico da Carne, para avanzar no desenvolvemento dun proxecto que busca fomentar o pastoreo na montaña como medio para anticiparse aos incendios forestais e mellorar a produtividade animal.

O encontro, que tivo lugar no centro dependente da Axencia Galega da Calidade Alimentaria (Agacal), concluíu cunha visita á Estación Experimental Agrogandeira de Montaña do Marco da Curra, onde se están a levar a cabo iniciativas con distintos animais.

En concreto, este proxecto de ámbito nacional ten como obxectivo integrar e mellorar o coñecemento científico e técnico de aspectos relacionados coa xestión dos pastos na montaña cantábrica e galega. Así, non só se persegue previr os lumes forestais e contribuír á produción animal, senón tamén traballar na mellora do solo, incrementar a biodiversidade e impulsar a gandaría en extensivo.

A idea é implicar tanto aos propietarios das terras como aos xestores e gandeiros, aos que se lles ofrecerán ferramentas para que escollan a opción de pastoreo máis axeitada en cada caso, tendo en conta as condicións do terreo ou os obxectivos de produción, así como factores ambientais.

Proxecto de seguimento do gando en pastoreo

A maiores, o CIAM participa xunto co Servizo Rexional de Investigación e Desenvolvemento Agroalimentario (SERIDA) de Asturias e o Centro de Investigación e Formacións Agrarias (CIFA) de Cantabria nun proxecto liderado por unha empresa de base tecnolóxica na Universidade de Alcalá que busca mellorar o manexo do gando en extensivo e a xestión dos pasteiros mediante unha ferramenta de seguimento. Así, por unha banda, pódese comprobar o estado dos pastos, e por outra, detectar por onde pastan os animais.

Deste xeito, perséguese poñer a disposición do sector unha ferramenta operativa que cumpra coas necesidades dos técnicos, gandeiros e xestores para posibilitar unha adecuada toma de decisións na organización dos montes e no manexo do gando. Todo para lograr unha xestión axeitada dos pastos diminuíndo os custos de produción e deixando patente o beneficio medioambiental que pode proporcionar a gandaría en extensivo.

pastos_CIAM_Asturias_Cantabria_02

Visita á Estación Experimental Agrogandeira de Montaña do Marco da Curra

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información