Galego
A Consellería do Medio Rural, a través da Axencia Galega da Calidade Alimentaria (Agacal), organiza a semana vindeira en Narón un curso sobre o nivel cualificado da aplicación e manipulación de produtos fitosanitarios. Cunha duración de 37 horas ao longo de oito días, a acción prolongaranse dende o luns 27 de setembro ao mércores 6 de outubro na sede da cooperativa do Val e impartirase en horario de tarde.
A iniciativa, que será impartida pola Oficina Agraria Comarcal de Ferrol, está dirixida a usuarios profesionais de fitosanitarios que teñen o carné de nivel básico necesario para exercer esta actividade en Galicia e no resto de España e que queren ampliar coñecementos. Tamén ás persoas con responsabilidades na aplicación e na comercialización deste tipo de produtos, capacitándoas para proporcionar a información axeitada sobre o seu uso, os seus riscos para a saúde e o medio ambiente e as instrucións para mitigar ditos riscos.
Así, no programa constan contidos sobre pragas e enfermidades dos cultivos e sobre os métodos de control máis axeitados, sobre os distintos produtos fitosanitarios e sobre a súa secuencia correcta de transporte, almacenamento, manipulación e aplicación. Ao tempo, incidirase en conceptos como a perigosidade dos produtos fitosanitarios para a saúde das persoas, a súa dosificación, os equipos apropiados para a súa aplicación e a normativa relacionada, ademais da rastrexabilidade e das estratexias e técnicas para a xestión integrada de pragas.
Para anotarse pódense descargar as solicitudes na páxina web de Medio Rural , que deberán remitirse cubertas ao enderezo electrónico alejandro.martinez.verez@xunta.gal. Os interesados en asistir poderán solicitar calquera información adicional chamando ao teléfono 981337044.
