Un total de 225 granxas de ovino e cabrún galegas recibirán axudas pola Covid

As axudas polo coronavirus destinadas a granxas de ovino e cabrún chegarán en Galicia a 225 beneficiarios, que percibirán unha media de 9,25 euros por femia elixible, segundo os datos que manexa a Consellería do Medio Rural. Cómpre lembrar que estas axudas, convocadas pola Xunta en base a unha liña do Ministerio de Agricultura, abonaránselle finalmente en Galicia a un pequeno grupo das explotacións, pois para a maioría de granxas é complicado cumprir cos requisitos esixidos para o cobro.

As axudas en Galicia foron convocadas no mes de agosto e tras os correspondentes trámites e controis, resultaron beneficiados 225 solicitantes, que suman un total de 6.779 animais. De media, cada granxa beneficiaria dos apoios recibirá arredor de 278 euros. É unha cantidade que desde o sector se ve como insuficiente para paliar as perdas sufridas polas granxas, que durante meses non tiveron capacidade para sacar cordeiros e cabritos, ó pecharse a hostelaría e as tradicionais vías de comercialización.

Os apoios para o ovino palidecen aínda máis se se comparan cos que recibirán as granxas de vacún de carne, para as que a Xunta lanzou unha liña de axudas que establece en principio un mínimo de 900 euros por beneficiario, cun máximo de 7.000 euros por granxa, en función do seu tamaño.