Galego
A asociación Amigas das Árbores impulsou esta fin de semana unha sementeira de centeo en montes queimados de Cualedro (Ourense), de cara a que as plantas que nazan contribúan a reducir a erosión e os arrastres de terras e cinzas.
A acción, que se desenvolveu coa colaboración de persoas voluntarias, logrou recabar previamente 20 sacos de centeo, grazas a achegas procedentes de puntos diversos, desde o mesmo Cualedro ou Xinzo e Verín (Ourense), ata cidades do resto de España (Madrid, Bilbao, Alicante, etc.).
Centeo antes da sementeira.
O colectivo ambientalista considera urxente acometer traballos de restauración dos montes afectados pola vaga de lumes de setembro, pois entende que son necesarios para reducir a erosión e protexer das cinzas os mananciais e as captacións de auga.
A asociación, por último, lamenta que a Administración galega non estea a acometer este tipo de traballos de urxencia, que lle foron requeridos semanas atrás por unha decena de colectivos ecoloxistas, forestais e agrarios. “Os ecosistemas precisan coidados axeitados en tempo e forma. Hai experiencia, medios materiais e humanos suficientes”, valora o colectivo.
