Galego
A Cátedra do Pan e do Cereal da USC impulsa xunto coa Misión Biolóxica de Galicia do CSIC e o grupo Panadería Da Cunha un proxecto piloto de recuperación de variedades autóctonas de millo para a obtención de pan de millo de calidade iniciado no 2019. O estudo partiu de 14 variedades que foran preseleccionadas e conservadas ata chegar a unha selección de tres delas, debido ás súas propiedades organolépticas, nutricionais e físicas.
A directora da Cátedra do Pan, Ángeles Romero, afirma que “este proxecto pretende recuperar en Galicia o cultivo de millo autóctono apto para panificación, ao tempo que busca a obtención de fariña de máxima calidade”. Cabe destacar que, na actualidade, a fariña de millo de que se dispón procede de variedades de Francia ou de Portugal.
Pola súa parte, o empresario Manuel Da Cunha, salienta que “a recuperación de variedades locais de millo antóllase como unha alternativa rendible nos procesos de rotación de cultivos e incluso favorece o consumo de fariñas con baixo índice de glute”.
Primeiros pasos
A través dunha primeira fase desta investigación, fixéronse ensaios agronómicos en distintas localidades -Ribeira, Carral, Pontevedra (ecolóxico e convencional), Ponte Caldelas, Sarria e, entre outras Xinzo de Limia-, nos que se avaliaron 14 variedades galegas de millo amarelo, branco e negro.
Logo deste primeiro estudo, no que se obtiveron resultados positivos das variedades ‘Osoro’ e ‘Tuy’ (millo amarelo), ‘Oubiña’ (negro), así como doutras tres variedades de millo branco, a Cátedra do Pan procedeu “á realización de análises físico-químicas e organolépticas dos cereais e, posteriormente, das fariñas obtidas e dos pans elaborados nos obradoiros de Panadería Da Cunha”, adianta Ángeles Romero.
Os primeiros resultados indican que a variedade ‘Tuy’ presenta moi boa calidade panadeira, ao tempo que sinalan ‘Rebordanes’ entre a poboación de millo branco con mellor comportamento agronómico. Os estudos cualitativos da variedade ‘Oubiña’ aínda non están rematados, pero os primeiros resultados indican un gran parecido coa variedade de millo negro ‘Carballeira’, que ten un menor rendemento agronómico.
A xefa do grupo Xenética e Mellora do Millo da Misión Biolóxica da Graña, Rosa Ana Malvar, salienta como principal logro deste proxecto a “elección de variedades de millo de distintas características adaptadas a distintos ambientes”, un feito que, na súa opinión, “permitirá diversificar o campo galego e facelo máis rendible e sustentable”.
Cultivo ecolóxico
“O cultivo ecolóxico das distintas variedades de millo obxecto de estudo nesta actuación ofrece peores rendementos que os obtidos cultivando de forma convencional”, precisa Malvar, quen ve necesario optimizar o manexo ecolóxico para acadar producións sostibles e viables no plano económico.
Os resultados acadados no marco deste proxecto e logo de dous anos de traballo chaman ao optimismo, segundo subliñas as tres entidades implicadas, que poñen en valor tanto o coñecemento das características organolépticas, nutricionais e físicas dos pans de millo elaborados ao abeiro deste proxecto, ao tempo que salientan que os resultados xa obtidos constitúen un acicate para fomentar o cultivo de variedades autóctonas de millo panificable e para recuperar a produción e o consumo dun produto tradicional.
