Galego
A Consellería de Economía e Emprego abriu por primeira vez un procedemento para recoñecer a experiencia laboral das persoas que teñan traballado na loita contra incendios forestais. O proceso diríxise a aquelas persoas que carezan dun título acreditativo das súas competencias, pero que teñan anos de experiencia e cursos de formación realizados sobre a materia. O prazo para acceder ó proceso abriu o 1 de marzo e remata o 31 de marzo.
A convocatoria aberta busca validar a experiencia laboral dos solicitantes de cara a facilitarlles un título acreditativo das súas competencias, ben un certificado de profesionalidade en ‘Operacións de vixilancia e extinción de incendios forestais e apoio a continxencias no medio natural e rural’, ben un título de formación profesional de técnico de emerxencias e protección civil.
O proceso consiste en dúas fases, unha primeira de asesoramento ó candidato, con dúas reunións, unha grupal e outra individual; e unha segunda fase de avaliación.
Os candidatos que superen de xeito positivo a fase de avaliación recibirán unha acreditación profesional das súas competencias, válida para todo o territorio nacional, e se cumpren os requisitos para obter un certificado de profesionalidade ou un título de formación profesional explicaránselles os trámites que deben seguir.
As persoas interesadas poden obter toda a información necesaria sobre o proceso (documentación a presentar, requisitos, etc.) nalgún dos seguintes puntos:
– Instituto Galego de Cualificacións, dependente da Consellería de Economía e Emprego.
– Nas xefaturas territoriais da Consellería de Economía.
– Nas oficinas do Servizo Público de Emprego de Galicia.
– Nos centros propios de formación profesional para o emprego da Consellería de Economía.
Máis información
– Convocatoria do Diario Oficial de Galicia (DOG) sobre o procedemento para recoñecer as competencias profesionais adquiridas a través da experiencia laboral.
