Galego
A Axencia Galega de Emerxencias, que xestiona o teléfono de emerxencias 112, elaborou, a petición do Sindicato Labrego, un informe sobre o tractor queimado a pasada semana en Guitiriz nunha parcela agrícola da parroquia de Labrada. O caso xerara polémica, logo de que o Sindicato Labrego acusara ó Concello de non contar con medios para atender a emerxencia. O Goberno local, pola súa banda, asegurara que non fora informado do suceso polo 112.
A consultas de ‘Campo Galego’, a Axencia Galega de Emerxencias informara do protocolo seguido no caso, pero agora no documento que lle remitiu ó Sindicato Labrego, aparecen novos datos. A cronoloxía de xestión do suceso, segundo ese informe da Axencia, foi a seguinte:
16.13 horas – O 112 avisa ós bombeiros de Vilalba.
16.16 h. – Infórmase á Guardia Civil.
16.16 h. – Recíbese chamada dos bombeiros de Vilalba, advertindo de que están a media hora e de que é posible que o seu camión non dea accedido ó punto.
16.16 h. – Chámase á Agrupación de Protección Civil de Guitiriz, que indica que van consultar co Concello e que informarán.
16.17 h. – Chámase á Policía Local de Guitiriz, pero salta o contestador automático.
16.23 h. – Recíbese chamada da Agrupación de Protección Civil indicando que non hai persoal no Concello para ir ao incendio.
16.24 h. – Chaman os bombeiros de Vilalba e indican que tardarán 35 minutos en chegar e solicitan que se avise a medios do Concello. Desde o 112 trasládaselles que non hai medios do Concello.
Pódese acceder ó informe completo neste enlace.
Agora que quedan aclarados os feitos, o Sindicato Labrego acusa ó Concello de Guitiriz de neglixencia e pide que asuma a responsabilidade, compensando á familia afectada polas perdas sufridas.
Fragmento do informe do 112.
