Dende este martes pódense presentar as solicitudes para as axudas do Leader

As persoas interesadas nas axudas do Plan Leader que xestionan os Grupos de Desenvolvemento Rural (Gdr) poden presentar dende mañá martes as súas solicitudes. A convocatoria está dotada con 21,1 millóns de euros para os anos 2017 e 2018

As axudas do Leader deberían destinarse a investimentos produtivos no rural, como queixerías

A partir de mañá, martes, día 31, poderán presentarse xa as solicitudes das axudas europeas do Leader que serán xestionadas polos diferentes grupos de desenvolvemento rural (GDR). O Diario Oficial de Galicia (DOG) publicou hoxe a convocatoria destas subvencións para as anualidades 2017 e 2018.

En total, está prevista unha achega de 21,15 millóns de euros nestes dous anos, a razón de 13,52 millóns de euros en 2017 e outros 7,63 millóns en 2018. Estas achegas están cofinanciadas co Feader no marco do Programa de desenvolvemento rural (PDR) de Galicia 2014-2020.

O prazo de presentación será de, como mínimo, un mes

O prazo de presentación de solicitudes será dun mes, como mínimo, e iniciarase este martes, permanecendo aberto durante todo o período de execución da medida Leader, coa data límite que determine cada un dos 24 grupos en función da dispoñibilidade de fondos. A distribución por GDR aparece publicada, como anexo, na convocatoria do DOG.

Distribución por GDR para o financiamento da submedida 19.2 de Leader
(apoio para a realización de operacións conforme a estratexia de desenvolvemento local) Convocatoria 2017-2018

Número e nome do GDR	Anualidade 2017	Anualidade 2018	Suma de anualidades 2017 e 2018
GDR 01: Terras de Miranda	563.337,58	278.567,66	841.905,24
GDR 02: Terra Chá	563.337,58	370.536,91	933.874,49
GDR 03: Montes e Vales Orientais	563.337,58	431.381,93	994.719,51
GDR 04: Comarca de Lugo	563.337,58	283.041,43	846.379,01
GDR 05: Miño Ulla	563.337,58	324.698,13	888.035,71
GDR 06: Ribeira Sacra	563.337,58	406.098,17	969.435,75
GDR 07: Valdeorras	563.337,58	330.137,56	893.475,14
GDR 08: Sil Bibei Navea	563.337,58	420.721,75	984.059,33
GDR 09: Monteval	563.337,58	319.860,05	883.197,63
GDR 10: A Limia Arnoia	563.337,58	354.628,64	917.966,22
GDR 11: Adercou	563.337,58	283.041,43	846.379,01
GDR 12: O Carballiño-O Ribeiro	563.337,58	301.819,75	865.157,33
GDR 13: Condado Paradanta	563.337,58	278.567,66	841.905,24
GDR 14: Baixo Miño	563.337,58	281.702,08	845.039,66
GDR 15: Pontevedra-O Morrazo	563.337,58	291.323,57	854.661,15
GDR 16: Pontevedra Norte	563.337,58	343.968,46	907.306,04
GDR 17: O Salnés-Ulla-Umia	563.337,58	278.567,66	841.905,24
GDR 18: Deloa	563.337,58	278.567,66	841.905,24
GDR 19: Terras de Compostela	563.337,58	278.567,66	841.905,24
GDR 20: Ulla-Tambre-Mandeo	563.337,58	302.339,09	865.676,67
GDR 21: Ordes	563.337,58	279.816,05	843.153,63
GDR 22: Costa da Morte	563.337,58	315.295,31	878.632,89
GDR 23: Mariñas Betanzos	563.337,58	292.662,93	856.000,51
GDR 24: Seitura 22	563.337,66	304.088,46	867.426,12
Importes totais	13.520.102	7.630.000	21.150.102

A conselleira do Medio Rural, Ángeles Vázquez, destacou a importancia destas axudas, que –sinalou– suporán a inxección de 84 millóns de euros para o agro galego ata o final do período de vixencia (ata o 2020). Ademais, lembrou o enfoque Leader de “abaixo cara arriba”, que garante a participación dos axentes locais no deseño e execución das estratexias de desenvolvemento rural e que se plasma na xestión que levan a cabo os GDR.