Galego
Os banzados, pequenas presas para desviar a auga de ríos para a rega de prados, poderán manterse na montaña lucense e non serán derrubados. É máis, a Confederación Hidrográfica do Cantábrico facilitará o proceso de regularización de todos aqueles que estean nunha situación de alegalidade e que estean a ser empregados. É o compromiso que Unións Agrarias conseguiu este mércores na xuntanza mantida en Oviedo co presidente e o comisario de Augas dese organismo. Un encontro que a organización agrogandeira propiciou, tendo en conta a preocupación xerada polo posible derrube dunhas estruturas, moi importantes para o mantemento das praderías, das que depende a gandería dos concellos de Pedrafita, As Nogais, Becerreá, Cervantes e Navia de Suarna.
O secretario xeral de Unións Agrarias, Roberto García, e o responsable de Coordinación Sectorial da organización, Félix Porto, desprazáronse este mércores ata Oviedo para defender o mantemento dos banzados existentes nos municipios da Reserva da Biosfera dos Ancares Lucenses e Montes de Cervantes, Navia e Becerreá. Son unhas estruturas imprescindibles para as explotacións da zona, pois grazas a elas poden manter os prados de rega e contar con alimento para o gando nos meses de seca, dende abril ata outubro.
Reunión de Unións Agrarias coa Confederación Hidrográfica.
Os representantes de Unións Agrarias saíron do encontro co compromiso explícito da Confederación de respectar o mantemento de todos os banzados en uso. Ademais, ambos organismos colaborarán para facilitar a regularización de todos aqueles que estean a ser empregados por agricultores e gandeiros pero non conten coa necesaria concesión administrativa. Con ese obxectivo, procederase ao inicio dun expediente de legalización no que Unións Agrarias se implicará facilitando aos peticionarios a elaboración de toda a documentación e a execución dos trámites precisos.
Os banzados son elementos fundamentais para a actividade agrogandeira na zona da montaña lucense. Trátase de sistemas de rego centenarios rexidos por quendas de uso establecidas dende máis de 200 anos atrás que garanten o mantemento das praderías, fundamentais para a gandería tradicional en extensivo sobre a que se asenta boa parte da economía da zona.
Son estruturas de non máis de metro e medio de alto construídas na súa maioría en pedra que permiten o tránsito da fauna acuática e que garanten un uso sustentable dos recursos naturais, xa que o caudal de auga que subministran permite o mantemento dos prados.
O número de banzados existentes na área afectada é altísimo e dá boa mostra da importancia dos mesmos, podendo existir máis de 300. A súa eliminación suporía a perda de superficies de labor e de pasto imprescindibles para as explotacións gandeiras da zona e implicaría un importante golpe para a economía do sector, xa moi castigado polos altos custos de produción e os baixos prezos.
