Galego
A Central Agropecuaria de Galicia rexistra este martes unha nova baixada xeral dos prezos dos becerros, tanto da recría coma nos de cebo. No vacún maior a tendencia tamén foi á baixa, aínda que con excepcións nalgunhas categorías.
O mercado porcino mantívose esta semana sen cambios, mentres que no ovo continúan as baixadas en boa parte das categorías.
Prezos do vacún
Facemos un repaso polas distintas seccións do vacún para coñecer a evolución dos prezos, aínda que cómpre ter en conta que se trata de prezos medios e que o valor dos exemplares estará condicionado tamén por outros factores.
Na recría frisoa, os becerros máis novos cotizáronse a un prezo medio de 110 euros, é dicir 4 euros menos que na última feira. Nos tenreiros de entre 20 e 50 días, o valor de referencia situouse nos 142 euros, o que supón 30 euros menos. Nos machos de máis de 50 días o prezo medio foi de 168 euros, cunha baixada de 20 euros.
A tendencia foi semellante nos tenreiros de recría de cruces industriais. Os becerros máis novos cotizáronse a 311 euros, é dicir 62 euros menos que a semana pasada. Nas femias houbo xa unha baixada de 13 euros, ata os 274 euros. Nos machos de entre 20 e 50 días, o valor de referencia foi de 383 euros, é dicir 5 euros menos. As femias descontaron 40 euros, xa que tiveron un prezo medio de 285 euros. Nos machos de máis de 50 días, o prezo medio foi de 563 euros, o que supón unha baixada de 4 euros. As femias tiveron unha baixada de 91 no prezo de referencia, que queda agora nos 414 euros.
Nos becerros carniceiros, os machos frisóns tiveron un valor medio de 873 euros, é dicir 72 euros menos que a semana pasada. Os machos de cruces industriais descontaron 4 euros ata os 1.154 euros. Mentres, as femias foron a excepción deste tipo de gando, cunha suba de 81 euros no prezo de referencia con respecto do valor da semana pasada e acadan os 981 euros. Nos animais de Rubia Galega, a tendencia foi á baixa. Os machos descontaron 74 euros ata quedar nos 1.180 euros e nas femias houbo unha baixada de 42 euros, polo que agora teñen un valor de referencia de 1.084 euros. Pola súa banda, os animais comercializados baixo o selo de Ternera Galega Suprema mantivéronse nos 1.265 euros.
No vacún maior a tendencia foi á baixa, con excepcións nalgunhas categorías. Os animais da extra tiveron un valor medio de 2.204 euros, é dicir, 40 euros máis. As vacas de primeira cotizáronse a 1.149 euros, o que amosa unha baixada de 28 euros. As vacas de segunda descontaron 31 euros, e quedan cun prezo de referencia de 736 euros. Nos animais de desfeito o valor medio foi de 479 euros, polo que sumaron 1 euro con respecto da última feira. Os animais comercializados baixo o selo Vaca e Boi de Galicia foron outra das excepcións e o seu valor medio incrementouse 916 euros con respecto da semana pasada e pasan a cotizarse de media a 2.821 euros.
Continúan á baixa os ovos
As mesas de cotizacións do porcino mantivéronse esta semana sen cambios no porco cebado e no leitón. Nos animais cebados, o porco selecto e o normal teñen un valor de 2,055 e 2,03 euros o quilo, respectivamente. Os porcos de Canal II están a 2,636 euros. Os animais de descarte cotízanse entre 1,37 e 1,43 euros o quilo.
Nos leitóns, os exemplares chegados dunha única granxa están nos 97 euros (cun prezo de 4,85 euros o quilo) e os animais procedentes de varias ganderías cotízanse a 92 euros e cun prezo por quilo de 4,6 euros.
O mercado do ovo continúa esta semana con baixadas en boa parte das categorías. Só os ovos da XL se manteñen sen cambios e están a 2,94 euros a ducia. Mentres, os da L tiveron unha baixada de 0,01 euros e quedaron en 2,61 euros a ducia. Nos ovos da M e da S a baixada foi de 0,02 euros e páganse a 2,21 e 1,96 euros respectivamente. As galiñas de descarte semipesadas descontan tamén 0,02 euros e cotízanse entre os 0,30 e os 0,38 euros o quilo.
O prezo do coello está nos 2,45 euros o quilo segundo a Mesa de Prezos Nacional do Coello (Loncun).
