Galego
O conselleiro do Medio Rural en funcións, José González, reafirmou hoxe a aposta da Xunta polo sector vitivinícola galego, unha aposta que -dixo- se materializa en medidas concretas como o préstamo vendima, dotado con ata 60 millóns de euros e concibido para permitir a todas as adegas galegas afrontar a compra da totalidade da uva da colleita deste ano en condicións normais de mercado.
Moitas adegas enfróntanse a problemas de liquidez ao reducir considerablemente as súas vendas a causa do parón da hostalaría e do turismo causado polo coronavirus, unha situación que fai temer que non podan afrontar a compra de uva na mesma cantidade e cos mesmos prezos que en anos anteriores.
O conselleiro explicou que esta iniciativa forma parte dunha nova liña de financiamento impulsada pola Xunta para axudar aos autónomos, microempresas e pemes máis afectados pola emerxencia sanitaria. Fíxoo tras participar en Cambados na apertura de sobres dos premiados na XXII edición da Cata Concurso Rías Baixas Albariño 2019.
Segundo José González, o préstamo vendima é un instrumento financeiro deseñado de xeito coordinado entre as consellerías de Economía, Emprego e Industria e do Medio Rural. “Terá unhas condicións moi vantaxosas no que se refire ao custo financeiro e ao prazo de devolución coa posibilidade de ter un período de carencia de 1 ano e unha amortización de ata 4 anos”, avanzou.
