O conselleiro do Medio Rural visitará a vindeira semana a Bretaña francesa, un referente europeo en produción agrogandeira

Publicidade
O conselleiro do Medio Rural visitará a vindeira semana a Bretaña francesa, un referente europeo en produción agrogandeira

Vacas nunha pradeira da Bretaña francesa

O conselleiro do Medio Rural, José González, acompañado polo director xeral de Gandaría, Agricultura e Industrias Agroalimentarias, José Balseiros, realizará a vindeira semana unha visita institucional á Bretaña francesa para estreitar os lazos de colaboración entre Galicia e esta rexión en materia agrogandeira.

A delegación galega manterá diversas xuntanzas de traballo con autoridades rexionais e con representantes do sector e visitará tamén cooperativas e explotacións. Así, xa o propio luns están previstos contactos co presidente da rexión, Loïg Chesnais-Girard, así como co vicepresidente de Agricultura, Agroalimentación e Alimentación, Arnaud Lécuyer.

A continuación, o conselleiro e o director xeral reuniranse con representantes da Federación Rexional das Maisons Familiales Rurales (MFR) da Bretaña (equivalentes ás escolas familiares agrarias -EFA- galegas). O encontro xirará arredor da cooperación entre ambos territorios en materia de intercambio de experiencias e estadías a través dos proxectos de mobilidade Erasmus. Deica o mércores están previstas tamén visitas a cooperativas e explotacións lácteas, así como xuntanzas con produtores de pataca, entre outros actos.

A viaxe do conselleiro e o director xeral estará centrada especialmente no sector leiteiro, tendo en conta que a Bretaña é a segunda rexión europea en produción de leite, con 5,54 millóns de toneladas no ano 2021, sendo só superada pola irlandesa Southerm, que acadou os 6,46 millóns de toneladas. Neste ranking, Galicia ocupa a día de hoxe o noveno posto, cun crecemento constante ano tras ano, sendo a que máis aumenta das que teñen producións similares, polo que, de manterse esta tendencia, podería escalar postos dentro da UE.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información