Galego
A Federación Española del Vino (FEV) actualizou os resultados do seu cuestionario sobre os efectos da crise do Covid19 nas adegas españolas, coincidindo co fin do Estado de Alarma. Dous meses despois da primeira enquisa, o 93,9% das adegas segue considerando que se viron afectados “bastante”, “gravemente” ou “moi gravemente”, só un 2% menos que na anterior enquisa. Ademais, as empresas sinalan que a súa facturación durante o primeiro semestre reduciuse de media nun 38,7%.
Por tamaño de empresa, as microempresas (menos de 10 traballadores e de 2 millóns de euros de facturación), son as que máis se están a ver afectadas por esta crise, cunha caída media do 54% na súa facturación no seis primeiros meses do ano, mentres que o resto pequenas, medianas e grandes- sofren tamén unha importante redución de aproximadamente o 30%.
De media prevén que a súa facturación se reduza un 28% en 2020
Respecto das previsións de futuro, as adegas estiman que para o exercicio 2020 a súa facturación sufrirá de media unha redución en torno ao 28% e só un 35% delas cre que poderá recuperar os niveis de facturación previos á crise en 2021, mentres que un 56% cre que isto non ocorrerá até 2022.
Por canles, a hostalaría foi sen dúbida o máis afectado tras máis de dous meses de peche total e a súa posterior reapertura gradual con límites de aforamento. Isto provocou caídas de vendas das adegas de até o 65% a nivel nacional e do 49% a nivel internacional. Tamén se viu afectado, aínda que en menor medida, a canle Alimentación, cunha redución da facturación de entre o 12% (nacional) e o 23% (exportación).
Con estes datos enriba da mesa, para a FEV “é necesario que a administración siga apoiando con iniciativas concretas a un sector que é vital para a economía e para o desenvolvemento rural e social de moitos territorios de toda España e que se está vendo moi prexudicado pola actual crise”.
Neste sentido, a entidade considera que as recentes medidas extraordinarias de apoio ao sector publicadas polo Ministerio de Agricultura (destilación de crise, almacenamento de viño e colleita en verde) “van na boa dirección e supoñen unha axuda importante, pero as cantidades destinadas a iso son insuficientes para as necesidades actuais e, nalgún caso, non se adaptan ben á tipoloxía de empresas máis pequenas”.
Igualmente, unha das principais preocupacións das adegas atópase no ámbito laboral, tanto pola necesidade de ampliación de ERTEs como pola posible falta de man de obra para a vendima que está a piques de comezar. Por iso, desde a FEV apoian a reivindicación de FIAB ao Goberno para ampliar os ERTE en todas aquelas empresas da industria de alimentación e bebidas e distribuidores que acrediten unha porcentaxe do 40% da súa facturación dependente da canle HORECA.
“Tamén é necesario que o Goberno poña en marcha accións e campañas para recuperar a confianza do consumidor nacional, como xa está a facer o propio sector a través da plataforma Xuntos coa hostalaría, e do visitante estranxeiro, de modo que siga consumindo os nosos produtos tanto en España como nos seus países de orixe”, sinalan desde a FEV.
Recuperación dalgúns mercados de exportación e incremento da venda online
Os datos positivos do cuestionario chegan das vendas exteriores e online. En canto á exportación, malia unha caída do 12% en abril, o 61% das adegas afirma que empeza a notar certa melloría nalgúns mercados de exportación, en primeiro lugar do mercado asiático e posteriormente en países europeos como Alemaña, Países Baixos e os países nórdicos.
Agora ben, a FEV defende que “no ámbito internacional, é fundamental que o Goberno español, da man dos seus socios europeos, siga a traballar para chegar a un acordo con Reino Unido que evite un Brexit duro e para eliminar os aranceis adicionais impostos por Estados Unidos o ano pasado”. Ambos son os dous mercados exteriores máis importante para o viño español e é necesario despexar incertezas sobre eles na actual conxuntura de crise global.
Con respecto ás vendas online, o 81,7% das adegas manifesta que vende nesta canle, cuxa facturación aumentou de media un 161% desde mediados de marzo, aínda que supón unha porcentaxe moi pequena das vendas para a gran maioría delas. Porén, un 84% das adegas que comercializan online manifestan que intensificaron a súa estratexia no mercado de venda online debido á situación provocada polo Covid19.
