Galego
As instalacións de Horta Daterra do País, antigo serradoiro na Ponte Baxoi Miño (A Coruña), acolleron hoxe unha cata única en Galicia cunha selección de 30 viños premiados como Gran Ouro en edicións anteriores da Guía Paadín.
Para esta cata especial, contouse con algúns dos técnicos de maior prestixio das DOPs de España: Rioja, Ribera del Duero, Bierzo e León; así como os das 5 DO´s de Galicia: Monterrei, Rías Baixas, Ribeira Sacra, Ribeiro e Valdeorras. Xunto coa dirección da guía, ratificaron cales son os Mellores viños de Galicia da Guía Paadín 2024.
Con esta recata dos Grandes Ouros entre os que se atopaban algúns dos viños de máis alta gama de viticultores e adegueiros de gran proxección internacional como Rafael Palacios, O Luar do Sil, Luís Ánxo Rodríguez, Xurxo Alba, Emilio Rojo, José Luís Mateo, Forjas del Salnés, Guímaro ou Do Ferreiro, púxose de manifesto o altísimo nivel de calidade dos viños galegos.
Este evento, polos viños, os catadores e o momento doce de recoñecemento mundial dos viños de Galicia, converteron por un día á Reserva de Biosfera Mariñas Coruñesas e Terras do Mandeo na capital do viño.
Con esta Cata Final para a “Guía de Viños, Destilados e Adegas de Galicia 2024” danse por terminadas practicamente as catas. Para esta edición, nas catas previas, participaron preto dos 1.000 viños e uns 50 catadores procedentes de toda Galicia, así como técnicos doutras DD.OO. máis aló do ámbito galego.
Para a Guía Paadín participan adegas de longa e contrastada traxectoria e con viños de gran prestixio que non participan en ningunha outra guía ou concurso; e alén da copa moitos dos catadores participantes nesta Guía, aínda non sendo mediáticos, son algúns dos máis expertos coñecedores.
Da guía, que vai pola súa edición número catorce, publícanse 1.500/2.000 exemplares todos os anos. Este próximo ano haberá unha edición a maiores de 1.500 exemplares en inglés e segue sendo a única guía de viños sen publicidade.
Panel de catadores:
Agustín Lago – Director técnico da D.O. Rías Baixas
Alberto Tobes – Director técnico de Viticultura e Enoloxía da D.O. Ribera Del Duero
Alejandro Paadín – Editor da Guía de Vinos, Destilados y Bodegas de Galicia
Ana Belén López – Técnica da D.O. Ribeira Sacra
Carmen Gómez – Directora técnica da D.O. Bierzo
Javier Facal – Director de Catas da Guía Paadín
Jorge Mazaira – Director técnico da D.O. Valdeorras
Luis Miguel López – Director técnico da D.O. Monterrei
Luis Paadín – Director da Guía Paadín
María Graña – Tecnóloga investigadora da EVEGA (en representación da D.O. Ribeiro)
Pablo Franco – Director técnico da D.O.Ca. Rioja
Rafael Blanco – Presidente da D.O. León
Control OJD
