Galego
A multinacional holandesa De Heus utilizou as súas décadas de experiencia e coñecemento especializado na área de avicultura para crear ONE®, un novo plan para a produción avícola co que a compañía ofrece un amplo e completo portafolio de produtos específicos para cada tipo de produción, priorizando o benestar e a saúde animal en cada momento do seu ciclo de vida, para así obter os mellores resultados produtivos.
“ONE® xorde para dar resposta ás novas demandas sociais e de mercado e en coherencia cos valores da nosa compañía, fundamentados na saúde e o benestar animal e en ofrecer solucións nutricionais adaptadas ás necesidades dos nosos clientes de maneira que estes poidan alcanzar os seus obxectivos previstos. Non hai que esquecer que o 50% do volume de negocio mundial de De Heus está na avicultura; precisamente foi a nosa experiencia e liderado o que nos levou a crear ONE®”, explica Luis Sevilla, xefe de produto de Avicultura e Cunicultura da compañía.
A avicultura representa o 50% do volume de negocio mundial de De Heus
Un total de 8 programas de alimentación desenvoltos por un equipo multidisciplinar de expertos compoñen o plan nutricional ONE®: Programa para recría de poliñas, para produción campeira, para avicultura de posta, para ovo XL, para broilers, para pito amarelo, para pito alternativo e para pavos. No deseño de cada un deles tívose en conta “a variabilidade dos factores de produción e os diferentes retos que expón cada tipo de produción”.
Por exemplo, abordando o maior risco de picaxe no caso da produción en sistemas alternativos libres de gaiolas. Así o explica Luis Sevilla: “A achega de fibra e unha boa estrutura e presentación do produto son clave pola súa relación directa coa capacidade de inxesta, contribuíndo ademais a unha boa saúde intestinal grazas a un mellor desenvolvemento da mollexa”.
Nutrición de precisión
“Baseándonos no concepto de Nutrición de Precisión, lanzamos ONE® como a ferramenta que mellora a eficiencia no aproveitamento dos diferentes nutrintes por parte das aves. Isto conseguímolo grazas a un coidado e estudado balance da composición dos nosos produtos en función das necesidades en cada fase de produción (arranques, crecemento, recría, etc… ), o tipo de produción (broiler industrial, broiler amarelo, posta en sistemas alternativos, etc…), e as necesidades puntuais do cliente, que atendemos mediante programas de alimentación personalizados”, detalla o xefe de produto de Avicultura e Cunicultura de De Heus.
Desde a compañía holandesa, fortemente implantada en España, destacan que ONE® é froito de analizar resultados de numerosos proxectos de I+D+i e do coñecemento acumulado grazas ao seu programa de formulación DTF® (Dynamic Total Feed). “Baixo a marca ONE®, en De Heus desenvolvemos produtos que promoven e melloran a saúde intestinal das aves, co que contribuímos á redución do uso de antibióticos e a unha maior seguridade alimentaria. Todo isto co obxectivo final de seguir obtendo uns excelentes resultados técnico-económicos a nivel de granxa e dunha forma sostible, contando sempre co apoio dos nosos asesores e expertos en nutrición. Queremos que os nosos clientes estean ben preparados e acompañados para o futuro da man de De Heus, por iso creamos ONE®, para unha avicultura de primeira”, insistiu.
