Rías Baixas pecha a vendima con máis de 40 millóns de quilos, a terceira máis abundante da súa historia
Vendima cuantiosa e de gran calidade na Denominación de Orixe (DO) Rías Baixas con 40.904.676 quilos recollidoos, un 6,62% menos que a campaña anterior, considerada a máis abundante da súa historia. Aínda así, as cifras converten á vendima de 2022 na terceira de maior cantidade ata a data nesta Denominación de Orixe. Unha campaña que se prolongou durante 51 días e na que participaron 167 adegas e 4.690 viticultores.
A vendima na DO Rías Baixas comezou o pasado 25 de agosto coa uva destinada á elaboración de espumosos e finalizou o 14 de outubro. “No período comprendido entre o 7 e o 21 de setembro, de 15 días, recolleuse o 80% da colleita, resaltando o 10 de setembro cunha cifra récord de 5 millóns de quilos”, explica o informe do Departamento Técnico. Dito informe tamén dá conta de que se tratou "dunha vendima tranquila cunha entrada da uva en adega cunha elevada calidade, perfecto estado de madurez e unha boa gradación alcohólica”.
O rendemento medio por hectárea nesta campaña foi de 9.466 q/ha, moi parecido á colleita de 2018. Trátase dun valor superior á media dos últimos 10 anos, que foi de 8.600 quilos por hectárea. As expectativas para os viños da anada 2022 son moi boas.
Produción por variedades e subzonas da DO Rías Baixas. // Fonte. Consello Regulador.