A Consellería do Medio Rural permite desde hoxe tramitar de novo permisos para facer queimas, despois de que fosen prohibidas dende finais de xaneiro debido ás condicións meteorolóxicas. Deste xeito, o mércores 23 será o primeiro día para realizar queimas previamente comunicadas.
Os interesados poderán realizar as comunicacións e solicitudes de autorización de queimas a través da web do Medio Rural de acordo co establecido no artigo 34 da Lei 3/2007, do 9 de abril, de prevención e defensa contra os incendios forestais de Galicia. Ademais, en días laborables, tamén estará a disposición dos cidadáns o teléfono 012 para comunicar as queimas.
Os cidadáns que desexen queimar restos agrícolas amoreados nas zonas que determina a devandita lei nos períodos habilitados deberán comunicalo dous días antes. No caso de queimas de restos forestais amoreados, deberase solicitar unha autorización debido ao risco da actuación, sendo maior o proceso de tramitación.
Cómpre ter presente que as autorizacións e comunicacións deixan de ter validez nos días de vento e altas temperaturas.