Inaugurado un espazo divulgativo sobre insectos polinizadores en Negueira de Muñiz

Un momento da inauguración do Xardín de Polinizadores Fernando Fueyo en Pena da Nogueira

A inauguración do Xardín de Polinizadores Fernando Fueyo, un espazo creado pola Asociación Corripa na contorna do ecomuseo El País del Abeyeiro, en Negueira de Muñiz, puxo o final á segunda edición das Xornadas de Desenvolvemento Rural Ciencia na aldea, que se celebraron desde o venres neste emprazamento.

Trátase duns 3.500 metros cadrados de terreo dedicado á conservación, coñecemento e divulgación sobre os insectos polinizadores. Na inauguración, destapouse unha representación dunha mariposa de catro colas, unha especie característica de climas mediterráneos, ligada aos érbedos, que tamén habita esta zona polas súas singulares condicións climáticas do val do río Navia.

Durante a maña, presentouse tamén a Guía do Xardín de Polinizadores Fernando Fueyo, que compila a información sobre este espazo científico e divulgativo.

Unhas 100 persoas asistiron ao longo da fin de semana aos relatorios, mesas redondas e visitas guiadas das Xornadas, que reuniron persoas expertas en educación ambiental, custodia do territorio, bioloxía, botánica ou comunicación.