A Xunta expoñerá publicamente a futura Lei de montes veciñais en man común de Galicia para que os cidadáns poidan facer achegas antes da aprobación desta actualización do texto legal. Tal e como anunciou o presidente da Xunta, Alberto Núñez Feijóo, a nova normativa busca converterse nunha ferramenta de utilidade contra o abandono do rural e a infrautilización do monte. Galicia conta con máis de 3.300 montes veciñais en man común.
“Estamos a falar, en definitiva, dun texto que sirva para acometer con eficacia iniciativas de activación da xestión forestal privada e que mellore a gobernanza nos órganos de decisión e representación das comunidades”, sinala Feijóo. Tamén adiantou que o novo texto legal actualizará conceptos como a condición de comuneiro á par que incide na necesidade de regular de xeito realista este tipo de propiedade.
Feijóo aseverou que coa nova normativa a Administración autonómica cumpre as previsións do Plan Forestal e a recomendación do ditame da comisión Forestal do Parlamento.