Tras a primeira xornada técnica da IXP Vaca e Boi de Galicia, realizada a finais de xuño en Lugo, o Consello Regulador da nova IXP inicia unha serie de charlas comarcais para achegarlles ós produtores información práctica sobre normativa, vantaxes, procedemento e características dos animais amparados. Estas sesións, que se inician hoxe en Ribadeo e Melide, terán continuidade nos próximos días en Vilalba e Pontemaceira (Ames).
O director técnico do Consello Regulador, Antonio Xende, e o secretario executivo, José Gómez, serán os encargados de impartir as xornadas técnicas, que se inician en colaboración coas cooperativas Clun (Os Irmandiños, Melisanto e Feiraco) e Almoga, de Vilalba.
O calendario das sesións é o seguinte:
- Ribadeo, mércores 6 de setembro, ás 10.15 horas, no salón de actos da cooperativa Os Irmandiños.
- Melide, mércores 6 de setembro, ás 16.15 horas, no salón de actos da cooperativa Melisanto.
- Pontemaceira (Ames): luns 11 de setembro, 16.15 horas, no salón de actos da cooperativa Feiraco.
- Vilalba: xoves 14 de setembro, 10.30 horas, no centro cultural e recreativo de Vilalba.