O actual escenario de excedentes lácteos, que empeorará cos aumentos de produción de cada primavera, preocupa e moito nas granxas galegas. Na primavera do 2015, houbo arredor de 500 granxas en Galicia que tiveron que vender a súa produción a prezos de leite en po, no entorno dos 20 céntimos. O sector non quere que ese problema se repita e busca solucións para a xestión de excedentes. A organización de produtores Ulega, ligada a Unións Agrarias, vén de facer unha proposta para o envío de leite en po como axuda humanitaria.
Ulega propón que a Administración publique unha liña de axudas que permitan a retirada de leite a prezos de mercado para o seu procesado como leite en po e o seu posterior envío como axuda humanitaria a terceiros países. A organización de produtores declárase disposta, a través deste mecanismo, a facerse cargo e xestionar a retirada do leite que non atope comprador no mercado, como pode ser agora o caso do que move a cooperativa Codegui ou Lácteos de Riotorto.
Contexto do problema
En Galicia, arredor dun 30% da recollida de leite está en mans de primeiros compradores intermediarios que lle compran ás granxas e lle venden ás industrias. Cando sobra leite no mercado, os primeiros compradores atópanse con problemas para colocar nas industrias os volumes que xestionan.
O sector teme que os casos de Codegui, Lácteos de Riotorto ou Leitigal sexan só a punta de lanza do que se aveciña
Ao caso da cooperativa Codegui, que leva todo febreiro vendendo a súa produción para leite en po a 18-20 céntimos, sumaranse en marzo os problemas que se anuncian para o cento de granxas que traballan con Lácteos de Riotorto e para outras que operan con Leitigal.
Valoracións
A iniciativa de Ulega para asumir a xestión de excedentes foi presentada esta mañá en Lugo en rolda de prensa polo secretario xeral de Unións Agrarias, Roberto García, e por Óscar Pose, da executiva de Unións. “Estamos ante un problema de mercado que pode ir a máis na primavera e vemos que nin a Administración central nin a autonómica teñen ningún plan para solucionalo” -cuestiona Óscar Pose.- “Ulega podería xestionar ese leite, procesándoo a maquila en torres de leite en po, sempre que haxa un apoio da Administración”, apunta.
Unións xa lle trasladara ó Ministerio de Agricultura unha proposta en agosto pasado para a retirada de 40.000 toneladas de leite con destino a axuda humanitaria, se ben daquela iniciativa, que o Ministerio se comprometera a estudar, nada máis se soubo.
"A Leite Río xa a coñecemos, cada pouco inventa novas xustificacións para baixar o prezo do leite de xeito arbitrario" (Óscar Pose)
Leite Río
A organización agraria aproveitou tamén a rolda de prensa para anunciar unha denuncia contra Leite Río por baixadas arbitrarias dos prezos, á marxe do pactado nos contratos. “Está a baixarlle ata 5 céntimos ás explotacións que non acadan o 3,10 de proteína. Os contratos establecen unha serie de penalizacións por baixa proteína que, nalgúns casos, poderían chegar ata 1 céntimo litro, pero nunca ás cantidades que está a baixar Leite Río”, critica Óscar Pose.
Unións trasladará unha denuncia ante a Xunta e ante a Agencia de Inspección y Calidad Agroalimentaria (AICA) para que investigue estas prácticas. “Non é a primeira vez que Leite Río aplica baixadas arbitrarias” -lembra Pose.- “Anteriormente tiña imposto penalizacións unilaterais por cuestións como o punto crioscópico ou a graxa. Son xustificacións que inventa a empresa para baixar o prezo”, sostén.
A organización pedirá tamén un control sobre os primeiros compradores que lle pagan ás granxas a prezos de leite en po, pois considera que non hai garantías de que esa produción vaia efectivamente para un destino de po.