As cotizacións deste martes da Central Agropecuaria de Galicia /Abanca caracterizáronse pola suba dos prezos dos becerros de recría de Cruce e pola irregularidade nos de Frisona, mentres que no vacún maior a tendencia foi a unha lixeira baixada. A afluencia foi menor que noutras ocasións ao coincidir en día festivo. Nas mesas de prezos acordouse baixar as cotizacións do porco cebado, subir as de leitóns e a dos ovos.
Nos becerros de recría de raza Frisona a tendencia foi irregular. Así, na categoría dos de menos de 20 días, a cotización media subiu e foi de 106 euros, fronte aos 92 da pasada semana. Con todo, a cifra representativa é a dos de 21 a 50 días, a categoría máis numerosa, onde a media foi de 122 euros por xato, prácticamente igual aos 123 euros do pasado martes. E nos tenreiros de máis de 51 días os prezos baixaron: unha media de 149 euros fronte aos 169 euros da semana anterior.
Pola contra, nos becerros de Cruzamento industrial as oscilacións nos prezos esta semana foron claramente á alza. A categoría de menos de 20 días foi a excepción, cunhas cotizacións medias que se situaron nos 304 euros, iguais ás da pasada semana. Pola contra, na categoría máis numerosa e representativa, a de 21 a 50 días, o prezo medio dos machos subiu, neste caso ata os 348 euros, 19 máis que na última poxa. Nas femias, tamén houbo suba: 260 euros de media, fronte aos 245 do pasado martes. E nos xatos de máis de 51 días o prezo medio tamén subiu ata os 423 euros, fronte aos 399 euros de media da pasada semana.
En canto ao vacún maior, a tendencia xeral foi a unha lixeira baixada. Deste xeito, quedaron en 1.058 euros de media en categoría primeira, 709 en segunda -a máis numerosa- e 397 na de desvelle. A pasada semana as cotizacións foron de 1.060, 717 e 427 euros, respectivamente.
As cotizacións quedaron da seguinte maneira:
Suba dos ovos
Polo que respecta ás mesas de prezos, nos ovos acordouse manter os prezos da pasa semana na categoría XL nos 1,38 euros a ducia. Pero para as restantes acordouse unha suba do 0,010% ata os 1,26 euros para a categoría L, 1,17 euros para a M e 0,98 euros a ducia na categoría S.
Nos coellos, en Madrid, onde se marcan os prezos para Galicia, acordouse manter as cotizacións nos 1,80 euros o kilo.
Suba dos leitóns e baixada do porco cebado
En canto ao porco cebado, a mesa de prezos acordou seguir coa baixada dos prezos das semanas pasadas, aínda que aplicando un descenso menor. Así, nas categorías Selecta e Normal a baixada foi do 0,010%, quedando nos 1,197 e 1,170 euros por quilo, respectivamente; a Canle II caeu un 0,013% ata os 1,519 euros por quilo, e na categoría de desvelle o intervalo de prezos quedou sen cambios entre 0,71 e 0,77 euros o quilo.
En Alemaña, o referente europeo para os prezos do porcino, as cotizacións mantivéronse estables nos 1,520 euros o quilo, mentres que no resto de países da Unión Europea a tendencia foi á baixa.
En canto aos leitóns, acordouse unha nova suba das cotizacións, desta volta dun 1%. Deste xeito quedaron nos 40 euros os procedentes de varias explotacións e nos 45 euros os procedentes dunha única explotación.
Os prezos do porcino quedaron da seguinte maneira:
