A denominación de orixe de viño Rías Baixas sitúase no oitavo lugar entre as 69 de toda España, segundo o informe anual do mercado realizado por The Nielsen Company e que presentou este mércores o Consello Regulador da DO.
A presentación realizouse na sede do organismo no Pazo de Mugartegui de Pontevedra, e á xornada asistiron profesionais de 24 adegas da denominación. O director xeral, Ramón Huidobro, destacou que a diversificación das vendas entre os mercados nacional e internacional é unha das claves do éxito dos viños de Rías Baixas.
Á espera de que se fagan públicas as cifras de exportación de 2016, Huidobro adiantou que o "crecemento foi importante" e confirmou que se segue con "esa forza de venda do 30% en mercado de exportación".
Ademais, o director xeral do Consello Regulador valorou os datos do Informe Nielsen como "positivos, halagüeños e esperanzadores" polo feito de frear a tendencia de estabilidade que tiña Rías Baixas.
Deben os viños de Rías Baixas entrar nos segmentos de menor prezo?
Segundo resumiu Ricardo Alcón, comercial manager de The Nielsen Company, a denominación de orixe durante o ano 2016 mantén a liña iniciada en 2014 cun maior crecemento na venda de viño que "consolida o cambio na tendencia que marcara os últimos anos".
O viño con denominación de orixe continúa a súa liña de crecemento, de forma que volve ampliar o seu protagonismo fronte aos viños sen indicación xeográfica, principalmente grazas ao sector da hostalería.
En canto á canle de alimentación, Rías Baixas tamén aumenta a súa cota de mercado ata un novo máximo de participación, a pesar de que os viños de Rías Baixas atópanse sometidos á presión dunha oferta diversa e lixeiramente máis económica no mercado dos viños brancos.
Isto provoca unha redución na cota de mercado ao desenvolverse o crecemento da categoría en niveis de prezo afastados do posicionamento de prezo dos viños de Rías Baixas. Neste sentido, Ricardo Alcón apuntou que con esta contorna "cabe preguntarse se é interesante para Rías Baixas estar neste desenvolvemento de mercado máis económico ou se pola contra é preferible desenvolver o mesmo segmento de prezo intermedios".