Xuño é un mes de intensa actividade na nosa horta xa que coincide a recolleita de cultivos de primavera (chícharos, patacas temperás..) coa plantación e coidado dos cultivos do verán.
Velaquí algúns consellos xerais:
-Coa humidade que hai na terra e as choivas que se aveciñan, as herbas competidoras inzarán nas nosas hortas, polo que deberemos facer varias sachas nos nosos cultivos.
-A humidade e as elevadas temperaturas crearán as condicións idóneas para pragas de fungos, especialmente o mildeu. Recoméndase facer un tratamento de fumigación a base de caldo bordelés (cobre) cada 10 días como mínimo nos cultivos máis sensibles: pataca, tomateiras, allos e cebolas.
-Sementeiras: Pódese facer alcoube ao aire libre de leitugas, acelgas e remolacha vermella que plantaremos no mes de xullo-agosto. Asemade, podemos facer a sementeira das verduras de inverno (repolo, couveflor, verza...) que plantaremos no verán.
-Tamén podemos facer sementeira directa de cenouras para os meses de setembro-outubro, así como de xudías, que recolleremos cara o meses de agosto-setembro.
-Transplante: podemos transplantar remolacha vermella, coles, leitugas, porros, cebolas, acelga,...etc.
-Tomateiras: durante este mes prestarémoslle especial atención a estas plantas, facendo as podas periódicas dos gromos das partes baixas e medias da plantas e entitorándoas. Cada dúas semanas aplicarémoslles un tratamento de cobre para evitar problemas de mildeu.
-Entitorados: xudías, pementos e berenxenas precisarán de entitorado para un correcto desenvolvemento da planta.