Sete de cada dez concellos de Galicia xa emprenderon a revisión catastral. O proceso estaba en marcha ou rematado en 183 municipios, ós que se veñen a sumar agora outros 46, que teñen de prazo para acometer a renovación do Catastro ata agosto do 2017. A revisión porá ó día novas vivendas e ampliacións das existentes e, a maiores, incluirá no Imposto de Bens Inmobles (IBI) todo tipo de instalacións agrarias, como cortes, naves e pendellos.
Esa inclusión das instalacións agrarias no IBI, coñecido popularmente como contribución, preocupa no sector. Unións Agrarias demanda dos Concellos a aplicación da taxa mínima para as granxas e a posta en marcha de bonificacións fiscais, que poden chegar a ser de ata o 90%. Xa hai Concellos embarcados no proceso que confirmaron que aplicarán esas bonificacións, caso do de Santiago de Compostela.
Os novos Concellos que inician a renovación do Catastro, segundo publicou o Boletín Oficial del Estado esta semana, son os seguintes:
- A Coruña: Abegondo, Arteixo, Camariñas, Cambre, Carballo, Cee, Lousame, Narón, Negreira, Ordes, Padrón, Pontedeume, Rianxo, Santiago de Compostela.
- Lugo: Carballedo, Sarria.
- Ourense: O Barco de Valdeorras, A Bola, O Bolo, Castrelo de Miño, Castro Caldelas, A Gudiña, Larouco, Manzaneda, Nogueira de Ramuín, Ourense, Piñor, A Rúa, Rubiá, San Amaro, San Xoán de Río, Sandiás, A Teixeira, Viana do Bolo, Vilar de Santos, Vilariño de Conso, Xunqueira de Espadanedo.
- Pontevedra: Dozón, Lalín, Mos, As Neves, Nigrán, Poio, Portas, Ribadumia, Silleda.