Os gandeiros do colectivo Agromuralla manterán os tractores na súa localización actual ao redor da Muralla de Lugo, a pesar das presións de comerciantes e empresarios do centro da cidade que denuncian os prexuízos económicos que, tras case un mes, está a causarlles a protesta.
En declaracións a Campo Galego, o portavoz de Agromuralla asegurou que “seguiremos alí” de forma indefinida ata lograr o seu obxectivo, que non é outro que unha subida dos prezos do leite aos gandeiros. “Desde a Subdelegación do Goberno dinnos que estamos autorizados a manter a protesta na localización actual -ao redor da muralla de Lugo-, sempre que non haxa ningún problema de orde pública”, asegura.
Os empresarios apelan á “Lei Mordaza” para poñer fin á protesta
Mentres tanto, a Confederación de Empresarios de Lugo (CEL), Federación de Comercio e Asociación Provincial de Hostalería anunciaron que poñerán o asunto en mans dos seus servizos xurídicos, tras expirar o ultimato que lles deron aos gandeiros para que cambiasen os tractores de localización.
Segundo informan os diarios La Voz de Galicia e El Progreso, as asociacións patronais presentaron un informe na Subdelegación baseado na Lei de Seguridade Cidadá, a coñecida como Lei Mordaza, que establece a retirada de vehículos que invaden a vía pública en concentracións e protestas, o que a xuízo da CEL é o caso dos tractores estacionados na Rolda dá Muralla, nos que se producen problemas de circulación e de seguridade viaria.
Reunión este luns de Agromuralla
Esta situación creada será analizada, entre outros puntos, na reunión cos gandeiros convocada por Agromuralla para este luns, día 11, ás 15:30 horas no hotel Torre de Núñez.
A reunión está aberta “aos gandeiros que teñades algo que achegar para contrastar as diferentes formas de reivindicar o futuro do sector lácteo”, reza a convocatoria.