A gama de vermús Nordesía fórmula orixinal Tinto e Branco foron galardoados con senllas medallas de ouro no prestixioso certame mundial de viños e espirituosos, Concours Mondial de Bruxelles, que se deron a coñecer este martes.
O xurado composto por 53 expertos internacionais de 29 países diferentes, catou ao redor de 10.000 viños e espirituosos de todo o mundo, e puxo en valor o saber facer de Nordesía que se ve reflectido na personalidade dos seus vermús.
En 2013, Xoán Torres, José Luis Méndez e Pepe Albela decidiron sacar, tras o éxito conseguido previamente coa xenebra Nordés, o primeiro vermú elaborado en Galicia baixo a marca Nordesía baseado na mesma filosofía que os seus anteriores produtos, apostaron pola elaboración dun vermú vínico baseado na orixe.
Tras anos de investigación, decidiron lanzar un vermú propio e comezaron coa elaboración do vermú branco, aproveitando as características propias do Albariño, un vermú afrutado que homenaxease aos brancos galegos máis clásicos e máis recoñecidos internacionalmente. Tras el chegou o Tinto, que xeraba máis sorpresa, pois tratábase do primeiro vermú feito con Mencía, rompía co corte de vermú tradicional, pois o uso dunha uva tinta non é o habitual. “O resultado, desde a cor en copa, ata a cata, cos toques de cereixa e froita vermella tan característicos da variedade, sorprenderon moito inicialmente”, comenta Pepe Albela que lembra como hai dous anos o branco foi recoñecido neste mesmo concurso cunha medalla de prata. “Estamos moi contentos con que ambos fosen galardoados cun ouro nesta ocasión”, asegura Pepe Albela.