O Acordo Lácteo, asinado en setembro do 2015 tras intensas mobilizacións gandeiras, comezou cunha declaración de bos propósitos por parte de industrias e distribución, pero parte dos compromisos fóronse diluíndo co paso dos meses. Se en novembro do 2015, un par de meses despois da sinatura do Acordo, só un 23,8 % do leite se vendía no supermercado a menos de 60 céntimos, no outono pasado a cifra era do 36,8%.
Os compromisos de revalorización do leite no supermercado tamén se plasmaran no 2015 na baixada das ofertas de leite a menos de 55 céntimos, que volveron repuntar nos últimos meses, aínda que sen chegar a niveis de campañas previas ó 2015.
Para as promocións a prezos excesivamente baixos, a Interprofesional Láctea puxo en marcha conxuntamente coas cadeas da distribución un protocolo de resolución de incidencias. Desde o Ministerio de Agricultura sinalan que o protocolo se activou en 24 ocasións ao longo do 2017, obténdose sempre resposta das cadeas de distribución ás incidencias presentadas.
Posturas
As cadeas de supermercados teñen argumentado que a progresiva baixada de consumo de leite líquido obriga a manter prezos competitivos nos puntos de venda. Desde a perspectiva do sector agrario, esa baixada no consumo de leite líquido, que foi dun 0,9% no periodo setembro 2016 – setembro 2017, non xustifica a baixada de prezos, pois entenden que contribúe a desprestixiar o produto. Destacan ademais as organizacións agrarias que hai outros derivados lácteos con aumentos de consumo, o que compensa en parte a caída do leite envasado.
Orixe do leite
Outro apartado que se trataba de mellorar co Acordo Lácteo é o da identificación da orixe do leite na etiquetaxe. Se cando se asinou o acordo, máis do 70% do leite non incluía referencias á orixe, na actualidade esa porcentaxe baixou ó 48%, en boa medida porque as industrias xa se están anticipando á normativa de etiquetaxe obrigatoria da orixe que ultima o Ministerio de Agricultura. As previsións apuntan a que o decreto sairá publicado nas próximas semanas.
Por parte do Ministerio de Agricultura, valórase en positivo a marcha do Acordo Lácteo e destácase que desde setembro do 2015 houbo 13 reunións entre gandeiros, industrias lácteas e cadeas de distribución con presenza do Ministerio, creándose así un foro estable onde abordar as diferenzas entre as partes.