O Consello Regulador da Denominación de Orixe Monterrei prevé enviar nos próximos días máscaras de autoprotección contra o Covid-19 a viticultores e adegas. A medida inclúese dentro do procedemento de actuación desenvolvido polo Consello para evitar os contaxios.
O plan de actuación implica tanto ós técnicos como ós viticultores, así como ó persoal das adegas. Ademais conta coa colaboración da Xunta de Galicia. Á marxe deste reparto de material de protección, tamén levan aplicando medidas preventivas nos últimos meses para reducir o risco de contaxio.
“Debemos ser responsables, polos demais e por nós mesmos, e cumprir cos protocolos de seguridade que se implantaron nas nosas oficinas”, destaca a presidenta do Consello Regulador de Monterrei, Lara Da Silva. Á parte, Da Silva tamén incide en que “é fundamental a colaboración de tódolos implicados, xa que a nosa prioridade segue sendo a atención e servizo ós nosos operadores”, sinala.