A presidenta do Consello Regulador da DO Monterrei, Lara Da Silva, e a xerente do Inorde, Emma González, visitaron a finca de experimentación e investigación (viñedo) que a Deputación de Ourense ten no municipio de Monterrei e na que traballa o Centro de Desenvolvemento Agrogandeiro do Inorde. Durante a visita, coñeceron ‘in situ’ as actuacións que se están desenvolvendo na actualidade neste viñedo experimental, situado nunha contorna privilexiada, aos pés do Castelo de Monterrei.
Aproveitando o acto, a presidenta do C.R.D.O. Monterrei propúxolle á xerente do Inorde a reconversión deste espazo nun centro vitivinícola e o deseño dun proxecto “respectuoso coa contorna e o medio ambiente, que sexa un referente enoturístico, educativo e, como non, que sirva de apoio ao propio Consello Regulador”, dixo Lara da Silva.
Pola súa banda, a xerente do Inorde indicou que este proxecto podería ser “estratéxico” para a dinamización turística da comarca.
A base deste proxecto incluiría a interacción coa Asociación Ruta do Viño Monterrei, coa idea de mostrar todo o ciclo do viño, “é dicir, desde a vide até a copa, contando tamén con elementos divulgativos da tradición e historia vitivinícola en Monterrei”; sinalou Lara da Silva, quen agradeceu á xerente do Inorde a súa atención e predisposición a colaborar na dinamización da comarca de Monterrei.