O Consello Regulador da Denominación de Orixe Monterrei organiza un curso sobre os solos vitícolas no que tratar a importancia do solo e o terroir, así como o seu manexo.
Nas xornadas abordaranse cuestións referentes ós solos vitícolas e ós factores de calidade que poden transmitir ós viños. Trataranse as diferenzas entre o solo e o terroir e reflexionarase sobre a utilización do terroir como unha unidade de análise da viticultura.
Tamén se inclúen no programa cuestións como a variabilidade vertical e horizontal, os mapas de xestión e de execución, así como, o manexo do perfil ou as propiedades químicas e físico-químicas dos solos. “No curso centrarémonos nos distintos tipos de solo e como inflúen no produto final. Sen dúbida, coñecer a nosa terra e as distintas posibilidades axudaranos na procura dunha maior singularidade nos nosos viños”, apunta a presidenta do Consello Regulador, Lara Da Silva.
O curso é gratuíto e está destinado a un máximo de 20 alumnos. A formación desenvolverase na tarde do venres 26 de abril, (en horario de 18.00 a 21.00 horas) e durante a mañá do sábado 27 (de 10.00 a 13:00 horas). Celebrarase na sede do consello regulador de Monterrei, situada na Avenida Luís Espada, á altura do número 73, en Verín.
A sesión formativa será impartida por Vicente D. Gómez Miguel, doutor enxeñeiro agrónomo e profesor da Universidade Politécnica de Madrid, que conta con numerosas publicacións sobre os solos vitícolas. Gómez dirixiu máis dun cento de congresos e seminarios sobre esta materia.
Para poder asistir ó curso é preciso inscribirse previamente na sede do Consello Regulador, no teléfono 988 590 007 ou enviando un email a info@domonterrei.com. A inscrición realizarase por orde de presentación das solicitudes.