A decisión da Plataforma en Defensa do Sector Lácteo de iniciar un boicot e mobilizacións contra Lactalis é considerada “inxustificada” pola industria francesa. A empresa sostén que “compartirá co sector produtor as revalorizacións de prezo xa realizadas” polas cadeas da distribución, así como as futuras actualizacións dos prezos de compra que poidan facer os operadores, conforme ó estipulado no acordo lácteo. Lactalis, sen embargo, non aclara nin cando nin canto vai subir o leite.
Na reunión mantida a pasada semana cos gandeiros, a industria asegurara que aplicaría unha suba de prezos en abril, pero tampouco concretou de canto sería esa mellora de prezos. Aquel encontro, que fora xestionado a través da organización de produtores Ulega, pois a normativa de Competencia só permite negociacións de prezos entre industrias e organizacións de produtores recoñecidas, rematou sen ningún acordo nin perspectivas de que o vaia haber. Os gandeiros amosáronse especialmente molestos da actitude da empresa, que consideran que amosou escasa empatía cara os problemas que atravesan as granxas.
Desde o sector produtor non se entende por que Lactalis non lle quere trasladar ós gandeiros a suba aplicada pola distribución en decembro. A industria, pola súa banda, en resposta a Campo Galego, asegura que ten a “total determinación” de cumprir os compromisos do acordo lácteo e dos contratos de aprovisionamento suscritos cos gandeiros, pero non aclara máis.