Unha trintena de gandeiros galegos e asturianos procedentes das comarcas do Eo-Navia e da Mariña Lucense manteñen dende onte ás doce da noite bloqueada a planta da multinacional francesa Reny Picot en Navia, Asturias.
O bloqueo produciuse formando unha cadea humana na entrada da fábrica, sen tractores, e segundo o responsable de gandería de Unións Agrarias, “proseguirá o longo da tarde” . Esta acción supón un salto cualitativo xa que é a primeira industria láctea que se bloquea fóra de Galicia dentro da campaña de mobilizacións dos gandeiros galegos para esixir prezos sostibles e estables para o leite.
Segundo Javier Iglesias, “o bloqueo de Reny Picot obedece a que é a segunda industria en recollida de leite de Galicia”, gran parte do cal se transforma en leite en pó, con baixos prezos para os gandeiros.
Iglesias anima aos gandeiros a seguir mantendo os bloqueos e a folga de entregas de leite: “Nada de renderse; a industria e a distribución están dando pasos positivos pero insuficientes e temos que manter a mobilización”, asegura.