As exportacións vitivinícolas españolas bateron marcas históricas en 2017 a nivel de ingresos con preto de 3.200 millóns de euros, facturando 260 millóns máis que en 2016, segundo datos de Aduanas analizados polo Observatorio Español do Mercado do Viño (OeMv). Isto supón un 8,9% máis en valor e un 3,2% máis en volume que no ano anterior.
No caso concreto de Galicia, en 2017 exportou 50,6 millóns de euros en viño, o que supón unha suba do 17,1%, e en volume 29 millóns de litros, un 8,3% máis. Isto dá un prezo medio de 1,72 euros o litro. A media española é de 1,11 euros o litro.
As vendas exteriores españolas están a enfocarse progresivamente cara aos produtos con maior valor engadido, como son viños tranquilos con DOP e cavas, o que, unido á mellor evolución dos graneis máis caros, propicia que 14 das 17 comunidades autónomas aumentasen os seus ingresos en 2017. 9 delas reduciron no entanto o volume comercializado, con suba xeneralizada de prezos: só a Comunidade de Madrid e Cantabria venderon a prezos máis económicos
Por comunidades autónomas
Un ano máis, Castela-A Mancha, Cataluña e A Rioxa foron as que máis gañaron en exportación vitivinícola, o tres mellorando as súas cifras de 2016. En volume, Castela-A Mancha representou algo máis da metade das vendas españolas, seguida da Comunidade Valenciana e de Cataluña, as tres tamén con datos positivos neste aspecto.
Gran ano para Estremadura, Castela e León, Murcia, Galicia e a Comunidade de Madrid, entre outras. Só Andalucía, Canarias e Asturias facturaron menos o pasado ano.
As rexións insulares seguen rexistrando prezos moi superiores ao resto, con 9,30 euros/litro Baleares e 8,75 euros Canarias. Tras elas, aparecen Castela e León (5,27 €), Asturias (3,74 €), o País Vasco (3,60 €) e A Rioxa (3,11 €). No polo oposto atopamos a Estremadura (51 céntimos por litro), Castela-A Mancha (54 céntimos) e a Comunidade Valenciana (81 céntimos), onde os produtos máis económicos teñen bastante cota, aínda que o tres subiron de prezo moi por encima da media española.