Nesta visita, Aboal puxo en valor que a Xunta vén de resolver as axudas aos investimentos en tecnoloxías forestais, procesamento, mobilización e comercialización de produtos forestais e as achegas á valorización e á segunda transformación da industria forestal galega e do contract. Na última convocatoria aprobáronse un total de 150 expedientes de axuda por importe total de case 16,5 millóns de euros que mobilizarán arredor de 48 millóns de euros (investimento público e privado).
Os beneficiarios foron pequenas e medianas empresas -incluídos os autónomos- da industria forestal e do contract radicadas en Galicia que utilicen a madeira e os seus derivados, así como asociacións, organizacións, fundacións e entidades sen ánimo de lucro.
Ambas liñas de axudas están encadradas dentro dos obxectivos da Axenda de impulso da industria forestal-madeira, coa que se busca consolidar ás pemes que conforman este sector.
O director da axencia estivo nas plantas que a Industrias Guerra ten en Vila de Cruces e en Silleda, nas que se adican, entre outras, a tarefas de enxeñaría, produción e montaxe de grúas, cabezais procesadores, taladoras e outra maquinaria forestal.
A empresa galega, que conta cunha facturación anual duns 18 millóns de euros, dispón de catro plantas propias en Galicia, unha filial en Portugal e dúas sedes en Arxentina. En total, suma máis de 30.500 metros cadrados nos que desempeñan o seu labor máis de 150 traballadores.
Por outra banda, esta empresa familiar exporta arredor do 50% da súa produción fóra do territorio, chegando incluso nalgúns momentos ata o 70%. Estas cifras evidencian a importancia da industria forestal en Galicia, onde ten un gran peso este sector. Ademais, no territorio galego rexístranse anualmente a metade das cortas de madeira de España.
"O futuro para loitar contra os incendios forestais pasa pola xestión do territorio, gandeira, agrícola e forestal. O maior perigo que temos é o abandono" (José González, conselleiro do Medio Rural)“O futuro para loitar contra os incendios forestais pasa pola xestión do territorio, con tres patas: gandería, agricultura e forestal”, valorou González, que avogou por unha estratexia de planificación do territorio que inclúa a creación de discontinuidades nas masas forestais. “Non estou de acordo cos que propugnan que o mellor é deixar que o monte se xestione a si mesmo” (o chamado ‘rewilding’). “O enemigo do rural é o abandono, que aumenta os riscos derivados dos lumes. Se alguén tiña algunha dúbida, xa se lle quitaría despois do sucedido este verán”, concluíu. Nova normativa de montes veciñais Doutro lado, a deputada popular Elena Candia anunciou onte no Parlamento que a Xunta está a traballar no borrador do Libro branco dos montes veciñais, que recollerá a nova normativa que regulará ás comunidades de montes. Este Libro branco seralle trasladado ó Consello Forestal de Galicia no primeitro trimestre do 2023, a fin de iniciar un “proceso participativo” co sector para pechar a nova normativa, segundo sinalou a deputada popular. https://www.campogalego.gal/saca-da-madeira-queimada-arrefria-o-mercado-de-pineiro-en-tanto-o-eucalipto-mantense-estable/
A empresa finlandesa Infinited Fibers desenvolveu un proceso químico polo cal a roupa vella pode transformarse en nova fibra e, asímesmo, en fío. Isto permitirá substituír unha parte da demanda de materias primas virxes no sector da moda, creando unha economía circular. A galega Inditex vén de selar este mes un acordo multianual de subministro con Infinited Fiber.
A reciclaxe de fibras téxtiles está ademais de actualidade en Galicia por ser unha das liñas de negocio previstas para a planta de Altri. A pasteira lusa proxecta en Palas de Rei (Lugo) unha planta de fibras téxtiles a partir de madeira, pero ten intención tamén de crear unha liña de reciclaxe de roupa usada.
Falamos con Kirsi Terho, directora de contas de Infinited Fiber, quen recentemente visitou Santiago de Compostela para participar no Foro Esenciais en Bioeconomía, organizado pola Axencia Galega da Industria Forestal.
Podería explicar en que consiste a actividade de Infinited Fiber?
A nosa empresa está collendo vellos téxtiles como vellos pantalóns vaqueiros, por exemplo, e converténdoos nunha nova fibra que logo permite facer fío, e de novo roupa. Para facer isto temos un proceso especial que manexamos nós mesmos, e que consiste nun proceso de reciclaxe químico co que podemos converter a roupa vella nun líquido de celulosa, e a partir del, rexeneramos de novo as fibras. En definitiva, a nosa compañía basease na tecnoloxía para converter todos os téxtiles nunha nova fibra, que despois dará lugar a novos fíos e novas prendas.
En que se basea esa tecnoloxía e como chega á súa empresa?
A tecnoloxía fundaméntase en investigacións desenvolvidas en Alabama nos anos 20 do século pasado. Unha vez comezamos a mirar no que podía ser utilizada esa tecnoloxía converteuse nalgo vital para nós. O noso fundador, Ali Harlin, comezou a probala en caixas, logo co papel, e despois con vellos vaqueiros, para ver se podía ser algo co que xerar novas fibras.
Cando isto se demostrou posible, o centro de investigación de ETT en Finlandia comezou a estudalo moi rapidamente. Entón deuse de conta da viabilidade e de que ademais había unha demanda real para a reciclaxe de téxtiles. A partir de aí, a nosa empresa xurdiu no 2016 para comercializar o produto en si.
Cal é a situación das materias primas tradicionais, como o algodón, en relación á demanda de téxtiles eco-friendly?
Esta é unha gran pregunta se se pensa nos tecidos máis tradicionais, como o algodón. A súa demanda é enorme neste momento, e cada día necesítase máis algodón. Para ser precisos, existen iniciativas que buscan alternativas, como o algodón orgánico, pero é unha opción pouco dispoñible, e ademais, cómpre ter en conta que non podemos seguir utilizando cada vez máis terra para cultivar algodón.
A maiores, é un produto que necesita moita auga e plaguicidas; por iso nós somos unha solución para esta parte.
En canto ao poliéster, todo o mundo o sabe: nalgún momento quedaremos sen petróleo e esa é unha vella fibra baseada nel, por non falar de que a sociedade estase desprendendo de moitos plásticos de microfibras.
Polo tanto, hai moitas cuestións que están nesa área, e ao mesmo tempo creo que as novas xeracións están desexando avanzar neste tema.
Como ve o futuro dos materiais téxtiles?
Nun mundo ideal serían reciclados, renovados e compostables, pero para ser honesta, creo que vai ser unha mestura de moitas cousas. Por suposto que haberá máis e máis cantidades destas prendas ideais en circulación, pero creo que fan falta anos ata que esteamos alí.
Pola nosa parte, as instalacións teñen unha produción pequena, e por agora tan só podemos proporcionar o material suficiente para probas. Nun futuro, no 2024, teremos unha gran fábrica en Finlandia, para enfocarnos á comercialización, que producirá sobre 30.000 toneladas ao ano, aínda que iso é unha fracción do que se necesita.
Se pensamos no número de tendas que ten Inditex, por exemplo, para ter un par de camisas e un par de vaqueiros deste tipo en cada tenda necesitaríanse moitas fibras. A industria téxtil é tan grande que hai un sen fin de posibilidades.
De onde xorde o seu interese no mundo das fibras téxtiles?
O meu interese nace por herdanza familiar. Son unha fabricante de fibra de terceira xeración. O meu avó e o meu pai estiveron vencellados a unha fábrica de viscosa, para a que despois rematei traballando. A min sempre me interesou a química e dalgunha maneira busquei levala ao ámbito téxtil e realmente entender a fibra en si, o que é.
Tras deixar a fábrica de viscosa, decidín continuar polo camiño da fibra. Daquela estaba nun grupo de estudo vencellado ás tecnoloxías téxtiles para o cal acabei facendo de consultora e interactuando coa empresa para a cal hoxe traballo.
O vicepresidente primeiro e conselleiro de Economía, Francisco Conde, visitou esta semana as instalacións de Maderas Gómez, en Piñor (Ourense), onde destacou os valores da industria forestal galega: “compromiso co territorio e sustentabilidade”.
Maderas Gómez, que conta con 117 empregados e factura 13,9 millóns de euros, prima en todos os seus procesos madeira quilómetro cero, procedente da contorna. Ademais, no seu compromiso pola sustentabilidade e a eficiencia enerxética, dispón de caldeiras de biomasa e paneis fotovoltaicos.
Conde subliñou que a Xunta quere estar ao carón das empresas do sector forestal impulsando unha industria sustentable e estratéxica, comprometida co medio rural e o emprego e que faga máis produtivo o monte. Nese marco, a Axencia Galega da Industria Forestal estase centrando na modernización do sector; na busca de valor engadido a través da innovación, a formación e a promoción dos novos usos da madeira. Así, as liñas de axuda postas en marcha o pasado ano chegaron a 143 empresas e asociacións e mobilizaron 37 millóns de euros.
A Xunta sinala que conta tamén coa Axenda da Industria Forestal 2022-2024 para seguir apostando por esta industria, composta por 3.000 empresas que, como Maderas Gómez, xeran riqueza e representan o 12% do emprego industrial e o 1,8% do PIB galego.
A cadea da madeira conta cunha importante presenza da muller na maioría dos seus segmentos, desde a explotación forestal en monte ata o traballo en aserradoiro, o deseño de mobles ou a dirección de obra, entre outros. Son traballos nos que, en ocasións, a muller aínda ten pendente lograr unha maior visibilidade, así como unha equiparación do recoñecemento social ó seu labor.
De cara a avanzar nestes ámbitos, un grupo de traballo, constituído por profesionais da industria forestal e da madeira, está a desenvolver periódicas xuntanzas, a última celebrada o pasado venres en Pontevedra con asistentes de xeito presencial e online.
No encontro de Pontevedra, no que participaron maioritariamente mulleres pero tamén homes, abordáronse cuestións como a importancia de visibilizar o traballo da muller nos distintos subsectores da cadea, algúns deles tradicionalmente con maioría laboral de homes. Retos como a mellora da conciliación familiar para mulleres e homes ou a necesidade de avanzar no recoñecemento ós roles que desempeñan as mulleres na industria foron outras das cuestións xurdidas nos debates.
O grupo de traballo fixo tamén repaso a accións de comunicación realizadas por distintas profesionais e empresas nos últimos meses para visibilizar e recoñecer o traballo das mulleres na industria, unha liña na que se quere seguir a traballar. O obxectivo último é que o papel da muller na industria forestal, así como as súas interaccións no entorno laboral, continúen a normalizarse, na senda do cambio cultural que se vén producindo desde hai anos, de xeito que idealmente chegue un momento no que as accións pola igualdade de xénero xa non sexan precisas.
Os encontros do grupo de traballo da industria forestal sobre a muller están promovidos por XERA Axencia Galega da Industria Forestal, e contan co apoio de numerosas empresas e industrias do sector, así como do conxunto de profesionais da cadea forestal e da madeira. Está previsto que a iniciativa do grupo de traballo, que leva por nome #ElasXeranSector, manteña unha nova reunión no mes de decembro.
A superficie de monte baixo instrumentos de ordenación ou xestión forestal acadou no ano 2019 as 262.175,96 hectáreas en Galicia, case un 8% máis ca no exercicio anterior. Así se desprende dos datos da última actualización do Anuario de Estatística Forestal de Galicia.
Outro dato salientable é que o pasado ano o volume de aproveitamento, en montes de xestión pública e de xestión privada, acadou os 9.703.422 m³ de madeira-máis do 50% de toda España-, dos que o 97% son montes ou terreos en xestión privada e o 3% baixo montes de xestión pública. En conxunto, o 84,14% pertencen ás provincias da Coruña (45,66%) e Lugo (38,48%).
Do volume de aproveitamento total, o 39,15% foron coníferas (3.798.769 m³) e o 60,85% frondosas (5.904.653 m³) . Con relación ás coníferas, as maiores porcentaxes corresponderon a Pinus pinaster (47,64%) e a Pinus radiata (44,86%). En frondosas, o 95,2% corresponde a Eucalyptus spp.
En Galicia por cada m³ de coníferas aproveitáronse 1,55 m³ de corta de frondosas. A maior porcentaxe de aproveitamento de frondosas sitúase no Distrito I Ferrol. A maior porcentaxe de solicitude de corta de coníferas rexístrase no Distrito IX Lugo – Sarria.
Número e volume de aproveitamentos: O 85% da madeira cortada é nas provincias da Coruña e Lugo
No ano 2019 rexistráronse en Galicia 93.921 declaracións e solicitudes de aproveitamentos en montes ou terreos de xestión privada para un volume total de 9.442.623 m³, cunha media de 100,54 m³ por expediente. Destacan datos como os das provincias da Coruña e Lugo, que representan conxuntamente o 69,28% do número de declaracións e solicitudes e o 85,08% do total do volume de aproveitamento solicitado.
Por tipoloxía de modalidade, as solicitudes realizadas por “declaración responsable” foron as maioritarias, tanto por número (63.435) como por volume (5.530.134 m³, cun incremento do 45,23% respecto a 2018). En número de declaracións e solicitudes, a maior porcentaxe corresponde ao Distrito II Bergantiños – Mariñas Coruñesas (11,5% sobre o total). En volume, a maior porcentaxe rexístraa o Distrito I Ferrol (14,2% sobre o total).
Superficie: Unha media de 0,5 hectáreas por aproveitamento
No ano 2019 en Galicia estas declaracións e solicitudes de aproveitamento afectaron unha superficie total de 46.740 hectáreas e un total de 88.630 referencias catastrais. O 33,37% desta superficie e o 41,68% do total das referencias catastrais corresponden á provincia da Coruña (15.595 hectáreas e 36.943 referencias).
O termo medio de Galicia de superficie por declaración ou solicitude de aproveitamento é de 0,50 hectáreas (0,44 ha no caso das declaracións responsables e 0,61 ha no das autorizacións). A provincia de Ourense ten o maior termo medio e acada as 0,70 hectáreas por expediente (0,60 ha no caso das declaracións responsables e 1,01 ha no das autorizacións). Os distritos II, III, VI, IX e XIV representan en conxunto o 41% do total da superficie de aproveitamento declarado e solicitado en montes ou terreos de xestión privada.
Especies: Arredor do 60% son cortas de eucalipto
O 37,60% dos aproveitamentos declarados e solicitados en montes ou terreos de xestión privada en 2019 (9.442.622 m³) refírense a coníferas e o 62,40% a frondosas.
Con relación ás coníferas (3.550.617,67 m³), o 45,8% e o 47,1% refírense a aproveitamentos de Pinus radiata e Pinus pinaster, respectivamente. Nas frondosas (5.892.005 m³) o 95,20% correspóndese con Eucalyptus spp.
A nivel galego, do volume de aproveitamento total en montes de xestión privada, o 59,4% é corta de Eucalyptus spp. As maiores porcentaxes de corta de Eucalyptus spp. sobre o total rexístranse nos distritos I, VI, II, XIX e III (entre o 89% e o 67%).
O maior volume de declaracións e solicitudes de aproveitamento privado de frondosas corresponde ao Distrito I Ferrol (20,09% do total de frondosas) e de coníferas ao Distrito IX Lugo – Sarria (19,41% do total de coníferas).
Estado da madeira:
En 2019, dos 9.442.622,64 m³ de aproveitamentos en montes ou terreos en xestión privada de Galicia, 9.305.149,33 m³ corresponde a madeira verde (98,54%), 34.417,54 m³ a madeira seca (0,36%) e 103.055,77 m³ a madeira queimada (1,09%).
En madeira verde, os maiores volumes de aproveitamento fanse na provincia da Coruña (46,95%) e Lugo (38,78%). Mentres, o maior volume de aproveitamento de madeira queimada e seca en montes ou terreos privados corresponde a Pontevedra (46,95% e 51,43%, respectivamente).
En 2019 descenderon con respecto ao ano anterior un 51,53% os aproveitamentos procedentes de madeira queimada, ao terse retirado en 2018 a meirande parte do calcinado en 2017.
Afectacións: Sobre todo a zona de policía de augas e estradas
Durante 2019 en Galicia as solicitudes con algunha ou varias afectacións foron o 27,65% do conxunto de solicitudes de aproveitamento en montes ou terreos de xestión privada (93.921). A Coruña e Lugo son as provincias onde maior número de solicitudes teñen algunha afección (unha ou varias), cun 28,6% e un 30,02%, respectivamente.
A maior incidencia de afectacións, cun 50,82% sobre o total, correspóndese á afección de zona de policía de augas, seguida de estradas cun 22,78%.
No conxunto de Galicia, por cada solicitude con algunha afectación (unha o varias), rexístranse 2,61 solicitudes sen ningunha afectación (en 2018 eran 3,91). Os distritos onde se concentra maior número de solicitudes con afección sobre o total son I Ferrol (15%), II Bergantiños – As Mariñas Coruñesas (12,2%) e VI A Mariña Lucense (13,9%).
Respecto a 2018, as solicitudes con afectación que máis se incrementaron foron: patrimonio cun 46,97%, estradas cun 31,70% e costas cun 31,70%.
Forma de presentación:
Das 93.921 declaracións e solicitudes de aproveitamento en montes ou terreos de xestión privada realizadas en Galicia, un 39,44% tramitáronse en formato papel (32.742), e as tramitadas por sede electrónica acadaron un 60,56% do total (61.179). As declaracións e solicitudes presentadas por sede electrónica superan as realizadas por medio de papel en todas as provincias (arredor do 70%), excepto no caso da provincia de Ourense, onde un 76,15% se presentou en formato papel. En 2018 as presentadas en formato papel superaban ás de sede electrónica (52,25% fronte a 47,75%, respectivamente).
No conxunto de Galicia, por cada declaración ou solicitude tramitada en papel, tramítanse 1,87 por sede electrónica. O distrito que destaca por solicitudes presentadas por sede electrónica fronte ás realizadas por papel é o Distrito VI A Mariña Lucense.
O volume de aproveitamento en montes de xestión pública acadou no ano 2019 os 260.800,29 m³. Destacan datos como que o 42,64% corresponde a Lugo e o 36,29% se localiza en Ourense.
Especies:
Destes 260.800,29 m³, o 95,15% corresponde a coníferas e só o 4,85% a frondosas. Respecto ás coníferas, o 55,32% do total é Pinus pinaster e o 30,77% é Pinus radiata. Do volume de frondosas, o 95% é de Eucalyptus spp.
A maior porcentaxe de aproveitamento en montes de xestión pública de coníferas sitúase no VIII Terra de Lemos (14,3%) e XIV Verín – Viana (12,3%), e a maior porcentaxe de frondosas no Distrito IV Barbanza (31%).
Estado da madeira:
Dos 260.800,29 m³ totais de aproveitamentos en montes ou terreos en xestión pública, 223.304,02 m³ corresponden a madeira verde (85,62%), 4.166,06 m³ a madeira seca (1,60%) e 33.330,22 m³ a madeira queimada (12,78%). En madeira verde e seca os maiores volumes de aproveitamento fanse na provincia de Lugo (46,69% e 64,71% respectivamente).
O aproveitamento procedente de madeira verde increméntase un 3,54% con respecto a 2018, ao tempo que descenden un 72,97 e un 74,17% os aproveitamentos procedentes de madeira queimada e seca, respectivamente.
No ano 2019, o número de montes que regulan os seus aproveitamentos de pasto segundo o Rexistro Público de Terreos Forestais de Pastoreo acadaron un total de 38, dos cales 8 corresponden ao Plan silvopastoril (6 de Montes Veciñais en Man Común -MVMC- e 2 de particulares), que representan o 21,05% do total. Os outros 30 corresponden a Instrumentos de Ordenación ou Xestión Forestal (IOXF), dos cales 29 son MVMC e 1 pertence ao catálogo de Montes de Utilidade Pública (UP), que representan o 78,95% do total.
Por provincias, as maiores porcentaxes en número corresponden a Ourense (39,47%) e Pontevedra (28,95%). Segundo o tipo de propiedade, é maioritario o MVMC cun 92,11%. Os distritos con maior número de montes con aproveitamentos de pasto regulados son o IV Barbanza (7), XIV Verín – Viana (6) e XII Miño – Arnoia (5).
Algo máis de 6.000 hectáreas de superficie
No ano 2019 a superficie dos 38 montes que regulan os seus aproveitamentos de pasto segundo o Rexistro Público de Terreos Forestais de Pastoreo acadaron un total de 6.038,85 hectáreas, das cales 5.410,83 corresponden aos IOXF e 628,02 ao Plan silvopastoril.
A práctica totalidade, 5.808,67 hectáreas (96,19%), fai referencia aos MVMC, dos cales 5.232,64 ha corresponden a IOXF.
As maiores porcentaxes en superficie corresponden ás provincias da Coruña, Pontevedra e Ourense (34,72%, 33,94% e 39,25%). A provincia de Lugo só representa o 2,09% do total. Os distritos con maior superficie son o IV Barbanza (1.888,4 ha) e o XIV Verín – Viana (1.347,5 ha).
Prohibicións de aproveitamento de pastos
31 montes cunha superficie total de 6.097,75 hectáreas tiñan prohibidos os aproveitamentos de pastos no monte en 2019 e debían inscribir dita prohibición no Rexistro Público de Terreos Forestais de Pastoreo.
ÇCase a totalidade destes montes corresponden a MVMC (30 e 6.024,44 ha). A provincia coa maior porcentaxe en número e superficie é a de Pontevedra con 28 montes e 5.947,36 ha (90,32% e 97,53%, respectivamente). Os distritos con maior número e superficie con prohibición de pastos rexistrada en montes son o XVIII Vigo – Baixo Miño (12 e 3.309,70 ha) e o XIX Caldas – O Salnés (14 e 2.346,38).
Ata o ano 2019, 24 montes ou terreos forestais de xestión privada fixeran unha comunicación de acoutamento para aproveitamento micolóxico, cunha superficie total de 8.013,38 hectáreas.
Por provincias, Lugo, cun 46,88% e 3.756,79 ha, é a que maior superficie ten acoutada para aproveitamento micolóxico, seguida de Ourense e A Coruña, cunha superficie arredor das 2.000 ha cada unha.
O distrito con maior superficie é o IX Terra Chá, con 5 montes e 3.018,75 ha.