O Imposto sobre a Renda das Persoas Físicas (IRPF), o Imposto sobre o Valor Engadido (IVE) e o Imposto de Sociedades (IS) son os tres principais tributos ós que teñen que enfrontarse propietarios forestais e comunidades de montes veciñais. Analizamos en que casos aplican e como varían as contías en función das características do propietario. Este artigo resume unha recente xornada sobre fiscalidade forestal que impartiron en Lugo o economista Daniel Rodríguez (Asociación Forestal de Galicia, AFG) e Santos Gabriel Arenas, ex-profesor asociado da USC, con algúns apuntes adicionais.A xornada foi organizada polo Distrito Forestal IX Lugo - Sarria.

Impacto na declaración da renda

Existen dous posibles réximes para tributar: Réxime de Estimación Obxectiva (EO), coñecido popularmente como ‘módulos’, e Réxime de Estimación Directa (ED). Na Estimación Obxectiva entran en xeral agricultores, gandeiros e todas aquelas persoas que non teñan outra actividade en estimación directa, polo que toda persoa asalariada, xubilada ou sen traballo tributaría baixo este réxime. Pola súa banda, a Estimación Directa aplícase a todos aqueles empresarios ou profesionais que teñan outra actividade en estimación directa (transportistas autónomos como taxistas ou camioneiros, profesións liberais, etc.). En xeral, a estimación obxectiva é máis beneficiosa para o propietario no caso da tributación forestal. Na estimación directa, para optimizar as deduccións, sería aconsellable que o propietario tivese todas as facturas de gastos imputables á xestión da masa forestal durante toda a súa quenda de corta (gastos de plantación, rozas, podas, abonos, etc.), algo que con frecuencia non se conserva. Variación por especies forestais A normativa distingue dúas quendas de corta das especies forestais: máis de 30 anos e menos de 30 anos. Na práctica, a Axencia Tributaria estableceu as especies que están en cada un dos tramos, xustificando que a porcentaxe de rendemento neto previo “non deriva da idade de corta senón do crecemento e da produtividade da especie”. Así fíxase un período medio de corta superior aos 30 anos, cunha tributación do 13% para frondosas caducifolias e coníferas (menos o pino insigne ou radiata); e un período medio de corta inferior a 30 anos, cunha tributación do 26%, para eucalipto, chopo e pino insigne. A Axencia Tributaria verifica as especies realmente cortadas a partir dos permisos de corta e "é necesario que haxa congruencia entre os permisos de corta e as facturas". No índice de rendemento neto (tributación por módulos), Arenas aclarou que nas ordes anuais que o desenvolven especifícase que ó piñeiro do país (‘Pinus pinaster’) pódeselle aplicar tanto o índice 0,13 como o 0,26. Daniel Rodríguez (AFG), durante a exposición da súa charla en Lugo

Como quedaría a tributación no Réxime de estimación obxectiva (módulos)?

Á hora de tributar, aplícase unha redución do rendemento neto previo do 20 % en caso de que a superficie conte cun instrumento de ordenación aprobado (non sirve a comunicación dun modelo de silvícola á Administración) e a quenda media das especies sexa superior a 20 anos, non podendo aplicarse, polo tanto, en montes con presenza maioritaria de eucaliptos a quendas curtas. No caso de cumprir estas condicións, tamén se aplica unha exención das subvencións. En caso de non contar con instrumento de ordenación aprobado, as subvencións consideraríanse como un ingreso ao que se aplicaría o rendemento neto previo fixado para as cortas de madeira (13 ou 26 %, dependendo da masa para a que se recibise a subvención). A maiores, aplícase unha redución adicional do 30 % en caso de renda de carácter irregular, que ten que ver coa periodicidade da declaración de ingresos por curtas de madeira. Na gran maioría dos casos, a tributación final sitúase entre o 4 e o 8 % do importe final facturado.

Exemplo de venda de madeira dun propietario en réxime de estimación obxectiva Caso: venda de 1.000 toneladas de madeira de piñeiro do país a 30 euros/tonelada: 30.000,00 euros. - IVE 12 %: 3.600,00 € (Sobre a cantidade total descóntase un 2% de IRPF) - Total ingreso: 33.600,00 € (base impoñible + IVE compensatorio) - Rendemento neto previo: 3.900,00 € (13 % do ingreso total) - Redución por Instrumento de Ordenación aprobado: 780,00 € (20% do rendemento neto previo) - Redución por renda irregular: 936,00 euros (30 %) - Importe a trasladar á base xeral do imposto: 2.184,00 euros, importe ao que habería que aplicar o tipo marxinal que lle corresponda ao propietario no IRPF.

Como quedaría a tributación no réxime de estimación directa?

O resultado contable é, de xeito xeral, superior ó resultado real de beneficios para o propietario, pois estase ante unhas quendas prolongadas de corta e non se actualizan os custos de produción do arborado. Rodríguez apunta que se está traballando por parte da Asociación Forestal de Galicia nunhas propostas de mellora, como son a de propoñer unha exención parcial dos ingresos por vendas de madeira de especies de máis de 30 anos, ou ben solicitar a elaboración dun plan sectorial contable. Igual que en módulos, aplícase a exención das subvencións no caso de que a superficie conte cun instrumento de ordenación aprobado e a quenda media das especies sexa superior a 20 anos. Tamén hai unha redución adicional do 30 % en caso de renda de carácter irregular. A cantidade do rendemento neto sobre a que se aplica a redución do 30 % non superará o importe de 300.030 euros anuais. A tributación final adoita ser elevada, por riba do 20 % sobre o ingreso final recibido.

Exemplo de venda de madeira dun propietario en estimación directa Caso: venda de 1.000 toneladas de madeira de piñeiro do país a 30 euros/tonelada: 30.000 euros - IVE 21 %: 6.300 € (Descóntase o 2% de IRPF) - Total ingresos: 30.000 € - Gastos soportados vinculados coa actividade: 5.000 € - Rendemento da actividade: 25.000 € (Ingresos – gastos) - Redución por renda irregular: -7.500 € (30 %) - Importe a trasladar á base xeral do imposto: 17.500 euros, importe ao que habería que aplicar o tipo marxinal que lle corresponda ao propietario no IRPF.

Imposto sobre o Valor Engadido

No caso das vendas de madeira de particulares, as empresas madeireiras deben emitir recibos que asinarán os propietarios que non teñan outra actividade en estimación directa. Nos recibos consígnase o Ive abonado ó vendedor (propietario forestal), co desconto do Irpf (2%). Esta práctica simplifica os trámites para o propietario. Réxime xeral Dentro deste réxime, permítese recuperar todo o IVE soportado nas facturas recibidas, repercutindo o IVE ao tipo que corresponda segundo produto ou servizo. É incompatible co Réxime de Estimación Obxectiva en IRPF. Conta con varias obrigas formais, como emitir facturas, presentar autoliquidacións trimestrais, dispoñer dun Libro Rexistro de Facturas emitidas e un Libro rexistro de Facturas Recibidas. Se queremos deducir o IVE dunha factura terá que ter relación directa con algunha das actividades na que repercutamos o IVE no Réxime Xeral e estar suficientemente desagregado na factura, tanto tipo impositivo como importe de IVE que corresponda. Réxime Especial de Agricultura, Gandería e Pesca O Réxime Especial da Agricultura, Gandería e Pesca (REAGP) trata de simplificar os requisitos formais e os trámites administrativos das persoas que poidan acollerse a el. Cabe detallar que é incompatible co uso do Réxime de Estimación Directa para calcular o resultado do IRPF. O tipo impositivo é do 12 % e coñécese como IVA compensatorio porque “compensa as cotas de IVE soportado nas facturas de gastos, que non se poderían deducir neste réxime”. Este criterio pode ser empregado de referencia á hora de tomar a decisión de renunciar, ou non, ao REAGP.

Exemplo de venda de madeira no Réxime Especial de Agricultura, Gandería e Pesca Caso: venda de 1.000 toneladas de madeira de piñeiro do país a 30 euros/ tonelada 30.000 € - IVE 12 %: 3.600 € (o propietario quédase con este importe, sen ter que ingresalo á Axencia Tributaria, a modo de compensación do IVE soportado que non puido deducir por estar no REAGP).

Santos Arenas, na formación impartida no Distrito Forestal IX

Imposto sobre Sociedades

É un imposto aplicable ás comunidades de montes veciñais, ás SAT e ás sociedades civís con personalidade xurídica e obxecto mercantil, como son as cooperativas e as SOFOR, que tributan polo imposto de sociedades. Non están suxeitos ó imposto de sociedades os montes de varas. Tribútase a tipo xeral do imposto: 25 % (23 % a partir do ano 2023). Aplícanse exencións das subvencións en caso de que a superficie conte cun instrumento de ordenación aprobado e a quenda media das especies sexa superior a 20 anos. Cabe destacar que o resultado contable é superior ao resultado real, como consecuencia das quendas de corta moi prolongadas e a imposibilidade de actualizar o custe de produción do arborado. Tamén conta con grandes dificultades para estimar o valor de certos bens que deben reflexarse contablemente no activo do Balance, ao que hai que sumar a dobre imposición de dividendos, que aumenta moito a tributación final do socio ou partícipe. As comunidades de montes desfrutan dun réxime especial. Poden reducir a base impoñible do imposto no importe que reinvistan no propio exercicio ou nos catro anos seguintes en mellora do monte ou en gastos de interese social. Unha comunidade que non reparta dividendo entre os comuneiros non debería pagar nada en concepto de impostos sobre sociedades, salvo que a súa pretensión sexa acumular os ingresos na conta bancaria sen gastalos de xeito regular. Tamén se pode ampliar o prazo de catro anos, de ser necesario, mediante un Plan Especial de inversións e Gastos.

O IVE do aceite quedará fixado no 0% tras a votación sobre o paquete de medidas anticrisis que sacou  adiante  onte o Goberno. De feito, a baixada do IVE do aceite do 5% ao 0% era unha de as peticións ao Executivo dos nacionalistas cataláns de JxCat. Esta suspensión do IVE aprobada polo Goberno súmase a outros alimentos básicos como o pan, as fariñas panificables, cereais, leite, queixo, ovos, froitas, verduras, hortalizas, legumes e patacas. Esta medida para axudar aos consumidores a paliar os efectos da inflación está previsto que se prolongue até xuño deste ano. Porén, dous alimentos básicos que forman parte da cesta da compra e dunha dieta saudable e equilibrada como son a carne e o peixe son os únicos que se manterán cun IVE do 10%. No caso da carne, tanto desde o sector produtor como desde a industria cárnica veñen reclamando desde hai tempo esta medida, en especial no caso da carne de vacún, cuxo consumo descendeu nos últimos anos, polo que entenden que a suspensión do IVE axudaría a unha recuperación das vendas. Desde a Xunta de Galicia, a Consellería de Medio Rural tamén saíu ao paso da supresión do IVE para o aceite de oliva e consideran "unha decisión arbitraria e un auténtico despropósito" que non se aplique tamén para a carne e os produtos do mar. "Levamos moitos meses esixindo a inclusión dos produtos do mar e da carne na prórroga temporal da rebaixa do IVE aos alimentos básicos. E tamén levamos moitos meses preguntando cales poderían ser os criterios do Goberno para manter leste veto, tan prexudicial para os nosos produtores. E hoxe quedou ben clara a resposta: polos votos dos socios secesionistas... O Executivo baixará o IVE do aceite ao 0%, pero fronte ás demandas de gobernos autonómicos leais como a Xunta, aos estudos das nosas universidades, as recomendacións dos expertos, a postura da UE, ou o exemplo de países como Portugal... cero", sinalan desde a Consellería do Medio Rural.

O Ministerio de Agricultura adoptou unha serie de medidas anticrise no sector primario para afrontar as consecuencias económicas e sociais derivadas dos conflitos en Ucraína e Oriente Próximo, así como para paliar os efectos da seca. Medidas tributarias para 2024

• IRPF

Agricultores e gandeiros que declaran no Imposto sobre a Renda das Persoas Físicas (IRPF) que se queiran acoller ao método de estimación obxectiva, mantense o límite máximo de 250.000 euros que se aplica tanto no volume de rendementos íntegros do ano inmediatamente anterior coma no volume de compras de bens e servizos. O mesmo límite elévase tamén para o sector dos mexilloeiros. O sistema de estimación obxectiva do IRPF, coñecido como sistema de módulos, para agricultores e gandeiros é máis beneficioso porque, entre outras cuestións, require de menor carga documental. Uns 800.000 agricultores e gandeiros tributan anualmente mediante este sistema.

• Réxime de IVE

Mantense a posibilidade de optar por varios réximes na tributación deste imposto. Dous son os máis comúns en número: o Réxime Simplificado e o Réxime Especial da Agricultura, Gandaría e Pesca. Aínda que, para acceder a estes réximes establécense determinados límites, por ser menos esixentes documentalmente. Así, limítanse os importes de compras en bens e servizos e o de ingresos no ano 2023, que non poden ser superados, en ambos os casos, en 250.000 euros anuais.

• IVE dos alimentos

Prorrógase a medida excepcional de redución do IVE a determinados alimentos durante o primeiro semestre de 2024. Así o tipo de aplicación no Imposto sobre o Valor Engadido (IVE) rebáixase do 4 % ao 0 % nos produtos básicos de alimentación (pan común e pan común conxelado; fariñas panificables; queixos; ovos; froitas, verduras e hortalizas frescas, legumes, tubérculos e cereais). Igualmente mantense no 5 % o gravame dos aceites de oliva e de sementes e as pastas alimenticias, que anteriormente era do 10 %, para contribuír á redución do prezo final destes alimentos. Medidas enerxéticas O Ministerio mantén a flexibilización de contratos de subministración de enerxía eléctrica até o 31 de xuño de 2024. Esta medida foi recollida no Real de Decreto de 2022, polo que se aprobaron medidas de reforzo da protección dos consumidores de enerxía e de contribución á redución do consumo de gas natural en aplicación do "Plan + seguridade para a túa enerxía (+SE)". No sector agrario, en concreto, esta medida supón para os titulares de explotacións agrarias, sexan autónomos ou empresas, incluídas as cooperativas agrarias e as comunidades de regadores poderanse realizar cambios da potencia contratada nese período sen custo adicional. Medidas ante a seca Aplícase unha exención do canon de regulación e da tarifa de utilización da auga aos usuarios que sufriron reducións nas dotacións por efecto das secas nas demarcacións hidrográficas do Guadiana, Guadalquivir, Segura e Ebro para o período impositivo de 2024.

Unión de Uniones de Agricultores y Ganaderos, tras analizar os datos históricos da axuda á devolución do Imposto Especial de Hidrocarburos aos que tivo acceso, pon en evidencia como as solicitudes se han ido reducindo ata caer nun 40% en 2022 con respecto ao ano de implementación. Unión de Uniones destaca que un dos motivos que disuade aos agricultores e é a súa complexidade, o ter que pedila unha vez que se realizou o gasto e a provisión de múltiple información para iso que hai que entregar á Axencia Tributaria. “Estamos a ver que o deseño da axuda non está feito para incentivar a que se pida senón claramente ao contrario”, comentan desde a organización. “Ademais, ao tratar coa Axencia Tributaria todo é máis sensible e unha inspección, por moito que se fagan ben as cousas, ninguén a quere”, engaden. Pola súa banda, o importe devolto tamén seguiu, polo xeral, unha tendencia á baixa a un ritmo similar ao do número de solicitudes, o que supuxo unha redución do 24,4% con respecto ao ano 2007: Así mesmo, os datos que puido estudar a organización agraria están desagregados por CC.AA. Neles resáltase que Asturias, Baleares e Extremadura lideran as caídas, cunha redución do 71,2%; 54,9% e 47,2% respectivamente no número de solicitudes, mentres que Andalucía é a CCAA que menos caída ten, aínda que o fixo un 16,8%. En canto ao importe total devolto, en cada CCAA volven destacar en canto ás reducións Canarias, Asturias e Baleares (-72,8%, -53,8% e -44,3%), mentres que Murcia, Cantabria e Galicia ven ampliado o seu importe devolto (11,5%, 5,3% e 2,6%). Finalmente, respecto ao volume de gasóleo a situación é dispar: mentres que Canarias, Asturias e Baleares reduciron o seu volume (-64,2%; -42,4% e -31,0%), Murcia, Cantabria e Galicia incrementárono substancialmente (un 35,0%; 30,2% e 26,1% respectivamente). Unión de Uniones insiste en que o aumento do prezo do combustible dos últimos anos, cun prezo medio a nivel estatal por encima do euro o litro, moi superior ao prezo que viña dando nos últimos oito anos, xustifican modificar este sistema de axudas e adaptalo ás novas realidades co fin de que, de verdade, sexa unha axuda e non unha “molestia burocrática”. Así mesmo lembra que actualmente a normativa europea permite unha porcentaxe de devolución do IEH maior ao que se está aplicando, o que inxectaría outros case 14 millóns de euros como apoio ao sector. Unión de Uniones reclama que, por tanto, auméntese o importe da devolución a 75,71 €/1000 litros, o máximo que permitiría agora a UE e que con iso contribuiríase a relaxar os elevados custos de produción aos que se enfronta o sector por máis de dous anos. A organización reitera a importancia de poñer en marcha un verdadeiro gasóleo agrícola profesional coa menor imposición fiscal posible e que goce dun mecanismo de devolución do IEH áxil, sendo o máis adecuado que o mesmo se desconte no momento da adquisición do gasóleo para mellorar a competitividade das explotacións e evitar as trabas burocráticas innecesarias.

O Boletín Oficial do Estado publicou hoxe a orde do Ministerio de Facenda e Función Pública pola que se reducen os Índices de Rendemento Neto aplicables en 2022 no sistema de estimación obxectiva do Imposto sobre a Renda das Persoas Físicas (IRPF), o denominado sistema de módulos, para agricultores e gandeiros. Esta orde recolle a proposta do Ministerio de Agricultura, Pesca e Alimentación (MAPA) de minoración dos devanditos índices e ten en conta a incidencia da seca e outras circunstancias excepcionais que afectaron á rendibilidade de moitas explotacións agrícolas e gandeiras durante 2022, como a guerra en Ucraína, que causou un encarecemento dos custos de produción. A orde establece unha redución xeral do rendemento neto do 25 % que poderán aplicarse os aproximadamente 800.000 agricultores e gandeiros que tributan polo sistema de módulos. Determinados sectores en situación máis vulnerable benefícianse ademais de reducións específicas, que son do 50 % no caso do oliveiral, a amendoeira e a apicultura, e do 30 % para cereais, oleaxinosas e leguminosas, castiñeiro, pexego, nectarina, albaricoque e os demais sectores gandeiros. Estímase que o conxunto das reducións contempladas na orde publicada hoxe supón unha rebaixa da base impoñible da orde de 1.807 millóns de euros, e é a de maior alcance da última década.

Redución no rendemento neto do 35 % pola adquisición de gasóleo agrícola, e do 15 % pola compra de fertilizantes

A orde permite tamén que os declarantes en Estimación obxectiva agraria do IRPF poidan minorar o rendemento neto previo un 35 % por adquisición de gasóleo agrícola, e un 15 % por compra de fertilizantes, segundo o establecido na Orde HFP/1172/2022, de 29 de novembro, que desenvolve o método de estimación obxectiva do IRPF para 2023. Ademais, mantéñense as reducións dos índices correctores que se estableceron o ano pasado por pensos adquiridos a terceiros e por cultivos en terras de regadío que utilicen enerxía eléctrica. Concretamente establécese nun 0,5 o índice aplicable ás actividades gandeiras que alimenten o gando con pensos e outros produtos adquiridos a terceiros, sempre que representen máis do 50 % do importe dos produtos alimenticios consumidos, e aplícase tanto aos sectores gandeiros intensivos como a extensivos. O índice corrector por cultivos en terras de regadío que utilicen enerxía eléctrica redúcese a 0,75. As reducións dos índices de rendemento neto establecidas con carácter nacional para a declaración da renda 2022 son as seguintes:

Sectores agrícolas:

- Cereais, leguminosas e oleaxinosas de 0,26 a 0,18 - Produtos da oliveira de 0,26 a 0,13 - Albaricoque, pexego e nectarino de 0,37 a 0,26 - Améndoa de 0,26 a 0,13 - Castaña de 0,26 a 0,18

Sectores gandeiros:

- Avicultura de 0,13 a 0,09 - Bovino de leite de 0,20 a 0,14 - Bovino de carne de 0,13 a 0,09 - Bovino de cría de 0,26 a 0,18 - Cunicultura de 0,13 a 0,09 - Equino de 0,32 a 0,22 - Ovino e caprino de carne de 0,13 a 0,09 - Ovino e caprino de leite de 0,26 a 0,18 - Porcino de carne de 0,13 a 0,09 - Porcino de cría de 0,26 a 0,18 - Apicultura de 0,26 a 0,13 Ademais efectuáronse un elevado número de reducións a nivel autonómico, provincial ou municipal noutras producións, entre as que destacan as aprobadas para as froiteiras non cítricos en importantes áreas produtoras.

Deducións específicas para os agricultores e gandeiros de 112 concellos galegos

A orde do Ministerio de Facenda e Función Pública recolle, ademais, deducións maiores a nivel autonómico, provincial ou municipal noutras producións que están a sufrir especialmente as consecuencias da seca e do encarecemento de insumos. En Galicia poderán beneficiarse destas deducións os agricultores de 21 municipios de Lugo e de 91 de Ourense que se dediquen á apicultura, o bovino de carne, a castaña ou a viticultura En concreto, na provincia de Lugo as gandarías de Carballedo, Chantada, Monforte e O Saviñao que cultiven millo terán un índice de rendemento neto do 0,19, mentres que para os de uva para viño será do 0,22. En Cervantes, aos de millo aplicaráselles un 0,26 e aos de castaña un 0,05, mentres que en Folgoso do Courel os produtores de castaña terán un índice do 0,13. Aos de millo de Guntín, Lugo, Láncara, Palas de Rei e Sarria aplicaráselles o 0,26, mentres que para os produtores de castaña de Navia de Suarna terán un índice do 0,05. En Negreira de Muñiz, A Pobra de Brollón e Quiroga reduciranse os índices para o cultivo de castaña (0,13) e para o de uva para viño con denominación de orixe (0,22). Este último será o mesmo que se aplicará aos viticultores de Patón, Ribas de Sil, Sober e Taboada, mentres que os que cultiven millo en Baralla e Pedrafita terán un índice de rendemento neto do 0,19. Até un total de 68 municipios da provincia de Ourense poderán beneficiarse dunha redución na tributación se se dedican á apicultura. O índice a aplicar aquí é dos máis baixos, do 0,05, e del poderán beneficiarse os apicultores de Allariz, Amoeiro, A Arnoia, Avión, Baltar, Barbadás, Baños de Molgas, Beariz, Os Blancos, Boborás, A Bola, O Bolo , Calvos de Randín, Carballeda de Avia, O Carballiño, Cartelle, Castrelo do Val, Celanova, Cenlle, Coles, Cortegada, Cualedro, Esgos, Gomesende, O Irixo, Larouco, Laza, Leiro, Maceda, Maside, Melón, A Merca, Monterrei, Nogueira de Ramuín, Ourense, Paderne de Allariz, Padrenda, Parada de Sil, O Pereiro de Aguiar, A Peroxa, Petín, Piñor, Pontedeva, Porqueira, Punxín, Quintela de Leirado, Rairiz de Veiga, Ramirás, Ribadavia, Riós, A Rúa, San Amaro, San Cibrao das Viñas, San Cristovo de Cea, Sandiás, Sarreaus, Taboadela, A Teixeira, Toén, Trasmiras, Verea, Vilamarín, Vilar de Barrio, Vilar de Santos, Vilardevós, Xinzo de Limia, Xunqueira de Ambía e Xunqueira de Espadanedo. O mesmo índice aplicarase aos apicultores de Bande, Castro Caldelas, Chandrexa de Queixa, Entrimo, A Gudiña, Lobeira, Lobios, Manzaneda, A Mezquita, Montederramo, Muíños, A Pobra de Trives, San Xoán de Río, A Veiga, Viana do Bolo e Vilariño de Conso. Nestas localidades tamén se reduce o índice do bovino de carne, que queda no 0,07. En O Barco, Carballeda de Valdeorras e Vilamartín aplicarase o mesmo índice para a apicultura que en todas as localidades anteriores, pero haberá tamén rebaixas para os cultivadores de castaña (0,05) e para os de uva (0,06). En Castrelo de Miño, Oímbra e Verín poderán beneficiarse de rebaixas na tributación os apicultores (0,05), e os viticultores (0,06). Por último, en Rubiá aplicarase o mesmo índice aos apicultores e o 0,06 para o cultivo da castaña.

A asociación de gandeiras e gandeiros Agromuralla denuncia que algunhas das medidas aprobadas polo Goberno central para facer fronte á inflacción supoñen "unha trampa para as explotacións leiteiras".  Como consecuencia da rebaixa do IVE do leite do 4% ao 0%, as empresas están deixando de pagar o IVE aos gandeiros nas súas facturas pola compra do leite, mentres que as explotacións teñen que seguir pagando o imposto nas súas compras de medicamentos ou outros insumos, sen ter posibilidade de compensalo nas declaracións trimestrais coas cantidades cobradas por este concepto. Esta situación, vai provocar un "desaxuste financieiro importante nas granxas", denuncia Agromuralla, xa que se trata de cantidades importantes que as explotacións non van poder recuperar até dentro de máis dun ano. "No trimestre ingrésase a diferencia resultante do IVE repercutido menos o soportado, polo que a cantidade a abonar non vai esar compensada e imos ter que agardar ata o 31 de decembro para poder solicitar a devolución, que non o cobraremos ata maio de 2024", denuncia Agromuralla. 

Diferenzas entre explotacións

Esta medida supón ademais unha "discriminación entre explotacións", xa que a aplicación da rebaixa do IVE vai depender do rexime no que se atopen encadradas á hora de determinar o rendemento da súa actividade. Esta situación de IVE ao 0% afecta unicamente ás explotacións que están en Estimación Directa, un sistema ao que están obrigadas aquelas que facturan máis de 250.000 euros ao ano, pero polo que apostan cada vez máis ganderías con ingresos inferiores a medida que se van profesionalizando. A modalidade de declaración mensual do IVE non está extendida entre as granxas galegas debido á complexidade na súa xestión e os custes engadidos que acarrea. Pola contra, as explotacións que permanecen no sistema de Módulos, moitas veces ganderías pequenas, seguirían cobrando o IVE pola venda do seu leite, neste caso o 10,5%, xa que non fan declaración trimestral e considérase un ingreso máis da explotación. 

Nestlé xa aplicou a rebaixa no leite do mes de decembro

As industrias que recollen en Galicia están comunicando estes días aos produtores este cambio na facturación do leite de cara á súa aplicación nas compras e recollidas que están a efectuar en xaneiro, aínda que algunha delas, como Nestlé, xa aplicou esta medida no leite do mes de decembro, facturado con data 9 de xaneiro, e ao que a compañía suíza xa aplicou o tipo impositivo do 0%. Esta rebaixa estaría en vigor cando menos no primeiro semestre do ano, segundo o establecido no Real Decreto 20/2022 do pasado 27 de decembro, no que se establece que estas rebaixas tributarias permanecerán en vigor até o 30 de xuño, pero poderían mesmo ser prorrogadas en caso de que a taxa interanual da inflación subxacente (a que exclúe a enerxía e os alimentos non elaborados) permaneza nos niveis altos actuais. 

"Estamos financiando as medidas electorais do Goberno"

Ao igual que no caso da rebaixa do IVE ao leite, o sistema escollido para o mantemento da bonificación de 20 céntimos por litro ao gasóleo agrícola supón "que os gandeiros teñamos que adiantar os cartos", denuncia Agromuralla, xa que a axuda concederase aos agricultores que exerzan o seu dereito á devolución das cotas do Imposto Especial de Hidrocarburos. A devolución poderase solicitar a partir do vindeiro 1 de abril pero non se cobrará até o 2024.  "Os produtores de leite estamos facendo de banco para o Goberno, financiando as súas medidas de cara ás eleccións", quéixanse en Agromuralla. O desaxuste contable provocado en moitas granxas vai facer que teñan problemas de liquidez nun momento de custos de produción elevados como os que se dan neste momento, xa que o feito de non ingresar IVE pola venda do leite vai afectar ao diñeiro circulante do que dispoñen as explotacións para pagar investimentos, créditos e compras.  Do mesmo xeito desde Agromuralla consideran que medidas como a rebaixa do IVE a unha serie de productos considerados básicos "tan só supón prexuizos para os produtores e escasos beneficios para os consumidores", xa que "non está a surtir os efectos pretendidos no abaratamento da cesta da compra porque moitas cadeas de supermercados subiron primeiro artificialmente os prezos, polo que están igual de caros que antes de rebaixarlles o IVE", aseguran. 

Os agricultores e gandeiros españois poderán acollerse neste 2023 a deducións no rendemento neto do Imposto sobre a Renda para as Persoas Físicas (IRPF) pola adquisición de gasóleo agrícola e de fertilizantes, como medida excepcional para paliar os efectos do encarecemento dos custos de produción. Esta medida contémplase na orde do Ministerio de Facenda e Función Pública pola que se desenvolven para o ano 2023 o método de estimación obxectiva do Imposto sobre a Renda das Persoas Físicas e o réxime especial simplificado do Imposto sobre o Valor Engadido, publicada recentemente no Boletín Oficial do Estado. O sistema de estimación obxectiva agraria é o maioritario entre os agricultores e gandeiros, ao que se acollen voluntariamente cada ano uns 850.000 declarantes en España. Como principal novidade cabe destacar a adopción de medidas excepcionais para paliar o efecto producido polo prezo dos insumos de explotación nas actividades agrícolas e gandeiras, que inclúen a redución do 35% do prezo de adquisición do gasóleo agrícola e do 15% dos fertilizantes. En todo caso, ambas as reducións unicamente procederán cando se trate de adquisicións realizadas no exercicio 2022, documentadas en facturas emitidas no devandito período. Ademais, mantéñense os índices correctores aplicables ao rendemento neto minorado que se aplicaron excepcionalmente na declaración da renda de 2021 por pensos adquiridos a terceiros e por cultivos en terras de regadío que utilicen enerxía eléctrica. Concretamente, mantense o índice aplicable ás actividades gandeiras que alimenten o gando con pensos e outros produtos para a alimentación adquiridos a terceiros, sempre que representen máis do 50 % do importe dos consumidos. O índice único para todos os sectores gandeiros será do 0,50. Tamén se mantén nos niveis de 2021 o índice por uso de electricidade para a rega, cunha redución dun 25 % do rendemento neto extensible a todos os regadíos. Cabe destacar tamén que os agricultores e gandeiros, do mesmo xeito que o resto de contribuíntes que tributen en módulos, beneficiaranse dunha redución do rendemento neto do 15% en 2022 e do 10% en 2023, fronte ao 5% en que se fixa habitualmente esta redución. Ademais, para o próximo ano non se modifica o Réxime de Módulos, manténdose, por tanto, os límites existentes para a permanencia no sistema, establecido en 250.000 euros anuais en volume de ingresos. A orde pode consultarse na seguinte ligazón: https://www.boe.es/buscar/pdf/2022/BOE-A-2022-20025-consolidado.pdf

O Boletín Oficial do Estado publicou hoxe a orde do Ministerio de Facenda e Función Pública pola que se reducen, para agricultores e gandeiros, os Índices de Rendemento Neto para o período impositivo 2021 no sistema de estimación obxectiva do Imposto sobre a RPF (ou de módulos). Esta orde recolle a proposta do Ministerio de Agricultura, Pesca e Alimentación (MAPA), tras solicitar os informes das comunidades autónomas, de minoración dos devanditos índices. Esta redución de módulos súmase á do 20 % no rendemento neto aprobada para todo o sector agrario no Real Decreto-Lei 4/2022 de medidas para paliar os efectos da seca e o incremento dos custos de produción. Estímase que o conxunto de todas estas reducións de módulos poida implicar unha rebaixa da base impoñible da orde dos 1.093 millóns de euros, que beneficia aos 900.000 agricultores e gandeiros de todo o Estado que elixen o sistema de módulos do IRPF para tributar. O sistema de estimación obxectiva agraria é o maioritario entre os agricultores e gandeiros. As reducións de módulos aprobadas nesta orde tradúcense nunha diminución proporcional da base impoñible derivada dos rendementos da actividade agraria. Estas reducións reflicten a perda de rendibilidade derivada dos efectos negativos provocados polas adversidades climáticas de 2021, como a borrasca Filomena do mes de xaneiro, as xeadas no mes de marzo e a falta de precipitacións ao longo do ano e, no caso dos gandeiros, o forte encarecemento dos insumos. Precisamente, redúcese o índice aplicable ás actividades gandeiras que alimenten o gando con pensos e outros produtos adquiridos a terceiros, sempre que estes representen máis do 50 % do importe total da alimentación animal. Estímase que a redución por este concepto pode alcanzar 38 millóns de euros. O índice único para todos os sectores gandeiros será do 0,50. Igualmente, e de forma extraordinaria polas dificultades da situación, amplíase en 5 puntos a redución do coeficiente corrector por uso de electricidade para a rega que se aplicou en anos anteriores. Así os agricultores que utilizasen a electricidade para a rega beneficiaranse dunha minoración do 25 % no rendemento neto para cultivos regables (o ano anterior foi o 20 %), extensible a todos os regadíos, e non só aos de consumo estacional. Estímase que esta medida suporá unha rebaixa duns 39 millóns de euros. As reducións establecidas con carácter estatal para a declaración da renda 2021 son as seguintes:

Sectores agrícolas:

- Uva para viño con D.O. de 0,32 a 0,22 - Uva para viño sen D.O. de 0,26 a 0,18

Sectores gandeiros:

- Avicultura de 0,13 a 0,09 - Bovino de leite de 0,20 a 0,14 - Bovino de carne de 0,13 a 0,09 - Bovino de cría de 0,26 a 0,18 - Cunicultura de 0,13 a 0,09 - Equino de 0,32 a 0,22 - Ovino e caprino de carne de 0,13 a 0,09 - Ovino e caprino de leite de 0,26 a 0,18 - Porcino de carne ou de 0,13 a 0,09 - Porcino de cría de 0,26 a 0,18 - Apicultura de 0,26 a 0,13 A orde está dispoñible para a súa consulta na seguinte ligazón: https://www.boe.es/boe/dias/2022/05/11/pdfs/BOE-A-2022-7638.pdf

O Boletín Oficial do Estado publicou hoxe a Orde do Ministerio de Facenda pola que se reducen, para agricultores e gandeiros, os Índices de Rendemento Neto para o período impositivo 2020 no sistema de estimación obxectiva do IRPF (ou de módulos). Esta orde recolle a proposta do Ministerio de Agricultura, Pesca e Alimentación (MAPA), tras solicitar os informes das comunidades autónomas, de minoración dos devanditos índices. As reducións aprobadas hoxe súmanse á do 20 % aplicada de forma horizontal a todos os agricultores e gandeiros de forma excepcional para axudar aos sectores especialmente afectados pola actual situación xerada pola COVID-19 (Real Decreto-lei 35/2020, de 22 de decembro). Esta rebaixa da base impoñible dos declarantes no réxime de estimación obxectiva agraria calcúlase en 1.081 millóns de euros. Uns 534 millóns de euros corresponden á orde aprobada hoxe e outros 547 millóns de euros son debidos á rebaixa do 20 % que beneficia aos 900.000 agricultores e gandeiros de todo o Estado que elixen o sistema de módulos do IRPF para tributar. A redución de módulos é un importante apoio para todos os agricultores e gandeiros españois nun ano difícil como o 2020, no que a produción agraria viuse afectada tamén por problemas de mercado, como os aranceis de Estados Unidos, ou polos derivados do peche da hostalaría como consecuencia da COVID-19. A orde beneficia, a nivel estatal, a agricultores e gandeiros de flor cortada, oliveiral, uva de vinificación, produtores de gando ovino e caprino de carne, porcino ibérico e vacún de carne, ademais de apicultores. Así, por exemplo, a redución de módulos para a flor cortada responde aos graves efectos da pandemia da COVID-19 sobre o sector, que impediu a normal comercialización do produto polas canles habituais nos momentos de maior produción de demanda do ano. No que se refire ao oliveiral, a minoración reflicte descensos de produción en determinadas zonas de cultivo e a complicada conxuntura de mercado que atravesa o sector, agravada polas consecuencias do Panel Airbus e os aranceis en EE.UU. Tamén se reduce o índice de tributación para uva de vinificación, que viu caer a produción de forma relevante en determinadas zonas, ao que se suma que a produción de viño viuse particularmente afectada o peche da canle Horeca por mor da COVID-19. Ademais das reducións a nivel estatal, efectuáronse un elevado número de rebaixas a nivel autonómico, provincial ou municipal.  De forma adicional, para a declaración da renda de 2020 continúase aplicando o coeficiente corrector por uso de electricidade para a rega. Os agricultores que utilicen electricidade para a rega poderán beneficiarse dunha redución dun 20 % do rendemento neto para cultivos regables. As reducións de módulos establecidas con carácter estatal para a declaración da renda 2020 de agricultores e gandeiros son as seguintes: Sectores agrícolas: - Flores e plantas ornamentais: de 0,32 a 0,06 - Oliveiral: de 0,26 a 0,18 - Uva para viño con DOP: de 0,32 a 0,22 - Uva para viño sen DOP: de 0,26 a 0,18 Sectores gandeiros: - Bovino de cría: de 0,26 a 0,18 - Bovino de carne: de 0,13 a 0,09 - Ovino de carne: de 0,13 a 0,09 - Caprino de carne: de 0,13 a 0,09 - Porcino ibérico de carne: de 0,13 a 0,09 - Porcino ibérico de cría: de 0,26 a 0,18 - Apicultura: de 0,26 a 0,13

A orde pódese consultar na seguinte ligazón

O Goberno de España aprobou aumentar a porcentaxe de redución para os agricultores e gandeiros que tributan polo sistema de módulos -a maioría- do IRPF ao pasar do 5% que se aplicaba con carácter xeral, ao 20% que se vai a aplicar na declaración da renda correspondente ao exercicio 2020 para as actividades agropecuarias. Esta medida ten como finalidade contribuír a paliar os efectos económicos do COVID 19 en sectores afectados, como é o agrogandeiro, e recóllese no Real Decreto Lei 35/2020 aprobado no Consello de Ministros do martes 22 de decembro.. Precisar que no réxime de módulos encádranse agricultores e gandeiros que teñan até un máximo de ingresos brutos anuais de 250.000 euros.

Ligazón á orde de redución do IRPF

O Sindicato Labrego Galego advirte de que “do mesmo xeito que aconteceu en Vilalba o ano pasado, neste 2018 a veciñanza de Cospeito vén de recibir 400 notificacións nas que lles reclaman atrasos do IBI de 2016 a bens regularizados ese mesmo ano”, debido a erros masivos na revisión catastral. “Xa non abondaba cos prexuízos económicos do catastrazo -taxas de 60 euros na revisión de cada ben e o correspondente incremento do IBI-, senón que agora castigan aos e ás contribuíntes cunha carreira de obstáculos burocrática innecesaria motivada por erros administrativos”, denuncian dende o SLG. Así, despois de varias comprobacións, no sindicato constan que “moitos deses expedientes correspóndense con cortes e instalacións agrarias e non teñen a obriga de pagar eses atrasos porque as alteracións deberían ter efectos no Catastro Inmobiliario dende o 1 de xaneiro seguinte a aquel no que se publique a resolución do procedemento de regularizacion catastral en cada municipio”. A normativa reguladora especifica di sobre a data de alta para as construcións indispensables para o desenvolvemento das explotacións agrarias que: “Los valores tendrán efectividad el día 1 de enero siguiente a aquel en que se publique la mencionada resolución, con independencia de la fecha en que se notifiquen.” É dicir, o erro radica en que os expedientes foron tramitados como de “regularización” e non como “regularización rústica indispensable”. Só 11 dos 67 municipios lucenses están “vacinados” contra estes cobros indebidos do Catastro No Sindicato Labrego Galego preocúpalles que esta situación se teña dado no pasado en máis concellos ademais de Vilalba e Cospeito, e se estea a producir na actualidade noutros municipios galegos. “Tendo en conta que o problema xorde nos concellos que teñen ponencia de valores anterior ao 1 de xaneiro de 2006, que na provincia de Lugo só 11 concellos dos 67 a teñen actualizada nunha data posterior, e que na actualidade a maioría xa teñen rematado o proceso de regularización, podería haber ducias de municipios afectados en toda Galiza nos que se lles está a cobrar atrasos do IBI indebidamente”, advirten.

 O problema xorde nos concellos que teñen ponencia de valores anterior ao 1 de xaneiro de 2006

Ante esta situación, o Sindicato Labrego Galego rexistrou o día 11 de maio un escrito dirixido á Xerencia Territorial do Catastro preguntándolle se esta situación se deu en máis concellos galegos e, de ter sido así, solicitan a enumeración dos mesmos. Tamén lle preguntas+n cal é a maneira de proceder do Catastro diante desta problemática e se van revisar de oficio os expedientes. “En caso de non terse feito estas comprobacións, dende o SLG urximos ao Catastro a comprobar todos os concellos nos que se puido detectar este problema e a actuar de oficio, informando aos e ás contribuíntes afectados/as”, explican. A maiores, tamén solicitan unha entrevista con responsables da Xerencia Territorial do Catastro para abordar esta problemática.

O Boletín Oficial do Estado publica este luns unha Orde do Ministerio de Facenda e Función Pública pola que se fixan os Índices de Rendemento Neto na declaración do IRPF para estimación obxectiva (módulos), que recollen as propostas do Ministerio de Agricultura e Pesca, Alimentación e Medio Ambiente de minoración na presión fiscal para agricultores e gandeiros afectados, entre outros motivos, pola seca. O réxime de estimación obxectiva agraria (ou de módulos) do IRPF é o maioritario entre os agricultores e gandeiros, sendo o elixido por ao redor dun millón de declarantes. As reducións de módulos aprobadas na Orde publicada hoxe tradúcense nunha diminución proporcional da base impoñible derivada dos rendementos da actividade agraria, e por tanto, do resultado da declaración do IRPF. Desta forma, as reducións establecidas con carácter nacional para a declaración da renda 2017 dos agricultores e gandeiros, son as seguintes:

Sectores gandeiros:

- Apicultura de 0,26 a 0,13 - Bovino de leite de 0,20 a 0,16 - Bovino de carne extensivo de 0,13 a 0,09 - Bovino de cría extensivo de 0,26 a 0,18 - Cunicultura de 0,13 a 0,07 - Ovino e caprino de carne extensivo de 0,13 a 0,09 - Ovino e caprino de leite extensivo de 0,26 a 0,18 - Porcino de carne extensivo de 0,13 a 0,09 - Porcino de cría extensivo de 0,26 a 0,18

Sectores agrícolas:

- Cereais de 0,26 a 0,18 - Leguminosas de 0,26 a 0,18 - Pataca, de 0,26 a 0,13 - Froita de carabuña, de 0,37 a 0,20 A maior parte destas minoracións establécense para dar resposta á seca que afectou a grandes áreas da Península Ibérica, reducíndose o módulo das producións gandeiras extensivas para compensar a redución da dispoñibilidade de pastos. Tamén no ámbito da gandaría, redúcense a nivel nacional os módulos de bovino de leite e a cunicultura, para ter en conta a súa particular situación de mercado. No referente aos cultivos, reduciuse a nivel nacional o módulo dos cereais e as leguminosas, con obxecto de ter conta os efectos da seca. Igualmente redúcese o índice a nivel nacional en modulo do cultivo da pataca e da froita de óso, para ter en conta as dificultades de mercado que atravesan. A redución de módulos tamén ten en conta os efectos da seca sobre outros cultivos, con amplas rebaixas en cítricos, oliveiral, uva, oleaxinosas e forraxes en amplas zonas. Os efectos doutras adversidades climáticas sobre os cultivos en 2017, como a vaga de frío de xaneiro, os episodios de calor extrema que se sucederon no verán e os de precipitacións intensas que puntualmente tiveron lugar ao longo do ano, tamén ven reflectidos na proposta de redución de módulos para aqueles municipios en que a adversidade en cuestión tivo incidencia. Neste contexto, a Orde HFP/1159/2017, de 28 de novembro, xa establecía na súa Disposición adicional quinta unha redución do módulo do arroz para as declaracións de 2017 e seguintes, cuxo índice pasou de 0,37 a 0,32. A partir da información fiscal e agraria dispoñible, estímase que o conxunto de todas estas reducións de módulos pode implicar, con respecto a un ano sen reducións, unha rebaixa da base impoñible da orde de 580 millóns de euros.

Reducións para os agricultores que utilicen electricidade para a rega

Doutra banda, a Orde HAP/2222/2014, de 27 de novembro, introduciu con carácter permanente un coeficiente corrector que poden seguir aplicando os agricultores que utilicen electricidade para a rega sobre o rendemento neto dos cultivos regados, e que supón unha redución dun 20% do mesmo. O Goberno adoptou esta medida, xunto coa exención parcial do 85% do Imposto sobre a Electricidade para os regadores, co obxectivo de compensar o efecto sobre os regadores da subida das tarifas eléctricas do verán de 2013. Finalmente, desde o MAPAMA destacan que a Orde HFP/1823/2016, de 25 de novembro, pola que se desenvolve para o ano 2017 o método de estimación obxectiva do IRPF e o réxime especial simplificado do IVE, establece na súa Disposición adicional primeira unha redución dun 5% do rendemento neto calculado polo método de estimación obxectiva para 2017. Trátase dunha medida extraordinaria de carácter horizontal que afecta á totalidade dos agricultores e gandeiros que tributen en estimación obxectiva. A Orde, cuxa publicación se adiantou en case un mes fronte á publicación da orde do exercicio 2016, pode consultarse na seguinte ligazón.

Os “abusos” fiscais do Ministerio de Hacienda coas axudas de incorporación poderían rematar este ano. Iso foi o que anunciou en Santiago a directora xeral de Desenvolvemento Rural e Política Forestal do Ministerio de Agricultura, Esperanza Orellana, durante a súa intervención este venres na xornada “Incorpórate!” organizada pola Asociación Galega de Cooperativas Agroalimentarias (AGACA) e Obra Social “la Caixa”.

“Estamos traballando co Ministerio de Hacienda para que a axuda á primeira instalación non tribute dun golpe no IRPF no momento en que comunica a resolución. Estou moi esperanzada en que o tema se vai resolver en breve”, asegurou a representante do Ministerio durante a súa intervención.

Esperana Orellana: “En poucas semanas agardamos un acordo con Facenda”

Así, engadiu que “en poucas semanas agardamos un acordo para que non se tribute por esa axuda ata que se cobre realmente e que sexa unha tributación proporcional”.

As organizacións agrarias veñen denunciando dende hai anos tanto a excesiva fiscalidade coa que o departamento que dirixe Cristóbal Montoro grava as axudas de incorporación -para unha axuda de 20.000 euros a Axencia Tributaria pode levarse ata o 30% na declaración do IRPF-, como o criterio de tributar por este imposto cando se concede a axuda e non cando se cobra, que pode ser ata un ano despois.

O ministerio que dirixe Cristóbal Montoro aplica esta fiscalidade dende a campaña 2015, ao considerar que se trata dunha axuda ordinaria de capital destinada a garantir unha renda mínima e non á realización de investimentos na explotación que podan ser desgravables.

Un problema específico de Galicia e dalgunhas provincias

Pero ademais, e só no caso de Galicia e nalgunhas provincias máis, algunhas delegacións fan unha interpretación restritiva da lexislación, de forma que obrigan a aos mozos e mozas incorporados ao agro a tributar por toda a axuda dunha soa vez, no momento en que aparece publicada a concesión no Diario Oficial de Galicia, sen posibilidade de fraccionala en cinco anualidades.

Isto último parece que é o que ten visos dunha solución máis rápida, segundo as declaracións da directora xeral de Desenvolvemento Rural e Política Forestal, de forma que se volvería tributar pola axuda de incorporación cando se cobre, e con posibilidade de fraccionala nos 5 anos ao que se obriga a estar en activo.

A este respecto, a conselleira do Medio Rural, Ángeles Vázquez, tamén destacou na clausura do acto organizado por Agaca e pola Fundación La Caixa, que “esta problemática da fiscalidade das axudas de incorporación trasladeilla ao presidente da Xunta nun expediente e el trasladoullo ao ministro Cristóbal Montoro” na reunión celebrada hai dúas semanas en Madrid.

“Tamén estamos traballando para que non se grave fiscalmente a cesión de explotacións agrogandeiras de pais a fillos, porque non ten sentido”, subliño.

O Sindicato Labrego Galego mantivo este xoves un encontro de traballo coa directora xeral de Gandaría, Agricultura e Industrias Agroalimentarias da Consellería do Medio Rural, Belén do Campo. Neste encontro, denunciaron o que consideran “prácticas abusivas da Axencia Tributaria ao gravar as axudas de incorporación de xente moza á actividade agraria ou o traspaso de granxas entre familiares”. Por parte da organización agraria asistiron ao encontro Conchi Docampo e María Ferreiro, ambas integrantes da Executiva do SLG, que denunciaron que “a Axencia Tributaria está a cobrar fortes impostos en casos nos que non debería sequera aplicalos”. “Por exemplo, cando se traspasa unha granxa aos fillos ou fillas, a Axencia Tributaria considera que os dereitos de pagamento básico da Política Agraria Común (PAC) que van aparellados á explotación son unha ganancia patrimonial, como se fose unha operación de compravenda, polo que lle aplican unha taxa impositiva superior ao 15% sobre o suposto valor deses dereitos. Rizando o rizo, isto tamén acontece entre cónxuxes en réxime de gananciais cando un deles se dá de alta como titular dunha granxa da que, en teoría, xa tiña o 50% da propiedade”, explican dende o Sindicato Labrego. Excesiva fiscalidade para as axudas de incorporación Outro problema que denunciaron ante Belén do Campo foi “o da excesiva fiscalidade que a Axencia Tributaria imputa ás primas de incorporación -os impostos poden chegar a un terzo do importe da axuda- e a enorme carga burocrática que supoñen”. “Coñecemos casos concretos de mozos e mozas a quen se lles concedeu unha prima de incorporación de 22.000 € que, ao ser considerada ganancia patrimonial, tivo que tributar entre 5.000 e 6.000 €. A isto, engádese o agravante de que Facenda cóbrache eses impostos no ano da concesión, cando o ingreso efectivo da prima é no seguinte ano”, aseguran. Unha das cuestións sobre a que incidiron as representantes do SLG no seu encontro con Belén do Campo, é que esta fiscalización excesiva estase aplicando a axudas concedidas no ano 2015. Deste xeito, advertiron de que “en anos posteriores, o importe das axudas de incorporación incrementouse considerablemente, polo que os cartos a pagar polas subvencións concedidas a partir de 2016 poden dispararse e ocasionar problemas de liquidez insalvables para os mozos e mozas que as recibiron”.

SLG: “A Xunta ten que implicarse e buscar coa Administración Central unha solución inmediata”

Segundo o Sindicato Labrego, a resposta por parte da Consellaría de Medio Rural “foi que xa lle transmitiron esta problemática á Axencia Tributaria, Ministerio de Agricultura e Delegación do Goberno”. Sen embargo, dende a organización agraria insisten en que “é necesario que o Goberno da Xunta dea un paso máis á hora de implicarse e incluír esta problemática na axenda de traballo coas institucións centrais para tratar de resolvelo de maneira inmediata (....) porque a realidade é que a pesares de telo explicado e denunciando diante de responsables da Axencia Tributaria, do Ministerio de Agricultura e da Consellaría de Medio Rural, segue sen facerse nada ao respecto”.