A empresa galega Embriovet & Embriomarket acaba de exportar a Estados Unidos os primeiros embrións de gando bovino.
"É a primeira vez que se exporta desde España xenética de gando bovino como embrións a Estados Unidos, o que abre moitas posibilidades de exportación ás gandarías españolas, que nos últimos anos alcanzaron un alto nivel xenético", destacan desde a empresa.
Ademais, é moi significativo que sexa precisamente a Estados Unidos, un referente para os gandeiros españois que levan décadas adquirindo xenética americana e canadense. Neste primeiro envío exportáronse 70 embrións de bovino a TransOva, un centro de recoñecido prestixio a nivel internacional e referente nos centros e equipos veterinarios de transferencia embrionaria. TransOva ocuparase en Estados Unidos de realizar a transferencia dos embrións adquiridos por gandeiros estadounidenses.
"Esta primeira exportación foi froito dun traballo de meses para conseguir que se establecese un Certificado de Exportación de España a Estados Unidos, coa colaboración do Ministerio de Agricultura e das autoridades norteamericanas", explican desde Embriovet & Embriomarket.
"Estamos a traballar na apertura de novos mercados"
Doutra banda, a transcendencia da noticia tivo outro beneficio engadido para a empresa, que está a recibir peticións desde países nos que actualmente España non dispón de certificado de exportación. "Esperamos e traballamos para que este sexa o primeiro de moitos máis envíos de xenética española a Estados Unidos. Queremos que represente unha gran oportunidade para moitos gandeiros españois", destacan desde Embriovet & Embriomarket