A Asociación Galega de Cooperativas Agroalimentarias (Agaca) convoca para o mércores 21 de abril un encontro online dirixido a persoas mozas que desenvolvan a súa actividade profesional no sector agroalimentario ou busquen traballar nesa área.
O encontro celebrarase de modo telemático e terá formato participativo (a través de Zoom), co obxectivo de dar visibilidade a diferentes debates e propostas, a nivel nacional e internacional. “Abordaranse iniciativas dirixidas a apoiar a persoas mozas do medio rural, así como a presentar o cooperativismo como opción viable para satisfacer expectativas laborais e de calidade de vida”, detallan dende Agaca.
Entre os temas que se tratarán atópanse a dixitalización das ganderías, explicacións e resolución de dúbidas acerca da reforma da Política Agraria Común (PAC) e subvencións e fondos europeos que poden ser beneficiosos para persoas mozas e emprendedoras.
Para participar no encontro, que se enmarca na programación 2021 da Rede Eusumo, é imprescindible inscribirse en a través deste enlace, en www.agaca.coop ou no teléfono 981 58 47 83.
A continuación detallamos o programa da xornada:
10:00 horas – Recepción e entrega de documentación.
10:15 horas – Reforma da Política Agraria Común (PAC) e adaptacións necesarias para afrontar os retos futuros.
11:15 horas – Fondos Next Generation. Que son e como poden beneficiar aos emprendedores e mocidade do rural galego.
12:15 horas – Proxecto Erasmus+ Agrario, organización das cooperativas e participación.
12: 45 horas- Participación de Galicia na Comisión Estatal de Mocidade Cooperativa (Cooperativas Agroalimentarias de España)
13:00 horas –Peche do encontro.