O sindicato Unións Agrarias detectou varias ofertas de leite en supermercados da cadea Dinosol, unha cadea rexional das Illas Canarias, a prezos de promoción de 49 céntimos, o litro o que contravén o Protocolo de Banalización aprobado no seo da INLAC para evitar o uso do leite como produto reclamo.
A organización agraria acusa a Dinosol de realizar “prácticas fraudulentas”, polo que de non retirarse de inmediato a citada promoción, anuncia que “vai presentarse a correspondente denuncia na INLAC para poñer freo a este modelo de actuación comercial completamente tóxico para a supervivencia do sector lácteo”.
Petición ao Ministerio e á Xunta para que freen as campañas de banalización do leite
O Protocolo de Banalización forma parte dos acordo lácteo de setembro de 2015 e de acordos posteriores dentro da interprofesional láctea, para mellorar o funcionamento da cadea de valor do leite e evitar a venda ao consumidor de leite a prezos moi por debaixo do considerado prezo sostible, -estimado en 0,60 euros o litro- que poñan en perigo os elos máis febles da cadea.
Unións esixe unha vez máis as administracións que “vaian máis alá das grandes declaracións de apoio o sector e que fagan o seu traballo de fiscalización destas actitudes comerciais devastadoras para a formación dunha cadea xusta de valor para o leite”.
Por último, a organización agraria esixe tanto a ministra de Agricultura en funcións como a conselleira de Medio Rural que “poñan freo as campañas de banalización que teñen como único obxectivo de forzar novas caídas na cotización do leite”. “Unhas baixadas -advirten- que por outra parte son completamente artificiais xa que os movementos internacionais apuntan cara unha recuperación dos prezos e de feito as cisternas Spot de leite líquido en Holanda pasaron de 27,5 euros/litro a 29,5 euros/ litro e en Italia tamén se reflicten subas de 25,7 euros a 32 euros, no mesmo marco temporal dos produtos industriais”.