Caídas do tractor ou do remolque:
- Desprazarse no tractor ou no remolque resulta moi perigoso, debido ás irregularidades do terreo, pendentes da finca...etc. Poden producirse accidentes por xiro, caídas e golpes por aceleracións ou freadas bruscas.
Caídas a distinto nivel en viñedos en bancais:
- Ter especial coidado nas zonas de viñedos en bancais, por exemplo na Ribeira Sacra. As caídas a distinto nivel poden provocar danos de consideración, tanto contra o chan coma contra os arames de suxeición das viñas e contra os postes ou estacas.
Vendima de parras:
- Se necesita acceder a puntos altos traballando en parra é preferible usar plataformas estables ás escaleiras de tesoira, caixas, pacas, etc.
- Nunca use as escaleiras de tesoira pechadas. Asegurarse que dispón de dispositivo de seguridade antiapertura.
[caption id="attachment_14081" align="alignleft" width="300"]
- Non intente mover a escaleira subido nela: baixe e mova a escaleira as veces que faga falta para evitar traballar desprazado lateralmente e aumentar o risco de caída.
- Se traballa con plataformas ou escaleiras, teña en conta que aínda con zapatas longas sempre hai risco de afundimento.
- En terreo natural é moi difícil que asenten ben todos os puntos de apoio será inestable.
Cortes por tesoiras ou ferramentas de corte:
- O acio collerase pola base no momento do corte. Nunca se collerá polo rabo, xa que isto multiplica o risco de corte nos dedos.
- Cada traballador e traballadora comprobará o bo estado das ferramentas antes de usalas, inspeccionando coidadosamente os mangos, fíos cortantes.
- Evitar que o mango estea impregnado de substancias que o fagan escorregadizo.
- As ferramentas deben contar cunha boa suxeición para que o traballador ou traballadora non faga esforzos indebidos, deben ser tesoiras ergonómicas adaptados á forma da man.
- Non levar as ferramentas nos petos.
- Empregar luvas de látex resistentes.
Pisadas sobre obxectos punzantes ou cortantes:
- Recoméndase non deixar os útiles de traballo esquecidos na zona de traballo. Deixalos sempre nun mesmo lugar, colaborando en manter a orde na zona de traballo.
Accidentes oculares por golpes ou picadas das vides:
- A aproximación da cara e ollos ás cepas pode dar lugar a picadas das vides. Aconséllase o uso de protección ocular.
Fatiga postural e sobreesforzos:
- Manipular as caixas ou cestas da vendima polas zonas de agarre que teñan, non as coller doutro xeito.
- Para levantalas do chan: separar os pés ata conseguir unha posición estable, dobrar os xeonllos, achegar o obxecto o máximo ao corpo, levantar o peso gradualmente e sen sacudidas, non xirar o tronco mentres se levante a caixa, cesta... .
Non sobrecargar as caixas, o peso máximo que se recomenda que levante unha persoa soa é de 25 kg.
- Transportar a carga á altura da cadeira e o máis preto do tronco. Se o transporte se fai cun só brazo evitar as inclinacións laterais.
- Non xirar as costas mentres se descargan as caixas. Depositalas, non tiralas.
[caption id="attachment_14085" align="alignleft" width="300"]
- Ordenar as caixas cheas de maneira que estean fóra das zonas de paso.
- Colocalas de maneira que a carga non se veña enriba e non esvare.
- Formarase e informarase o persoal traballador sobre a manipulación de cargas, sobre o manexo correcto das ferramentas e sobre as posturas de seguridade do lombo cando se fagan estas tarefas de vendima que implican adoptar a mesma postura para facer o traballo.
- Intentar traballar a unha altura correcta mantendo as costas ergueitas, evitando as posturas incómodas e forzadas.
- Sempre que sexa posible, substituír os traballos que impliquen facer moito esforzo físico por sistemas automáticos.
- Vendimar a un ritmo de traballo constante adaptado ás condicións individuais, para ter controlada a situación en todo momento.
- Facer descansos curtos e frecuentes cando se fagan traballos que impliquen adoptar posturas forzadas durante moito tempo como estar agachado ou traballos en altura, segundo a altura das cepas que se estean a vendimar.
Riscos biolóxicos:
- A través das feridas, cortes...etc, por contacto con materiais ou substancias contaminadas con restos de produtos fitosanitarios pódense contraer enfermidades.
- Por iso, toda ferida producida durante o traballo ha de ser limpada con abundante auga e xabón e ha de ser curada. Calquera traballador agrícola ten un risco potencial de padecer tétanos, polo que debe vacinarse.
Picaduras de insectos:
- As picaduras de avespas e abellas poden ser graves, sobre todo en persoas alérxicas ao veleno destes insectos. Recoméndase evitar roupas de cores vivas xa que poden atraer avespas e abellas.
- Deberíase dispoñer dun botiquín de primeiros auxilios cos elementos necesarios para realizar as curas e con medicación antialérxica para o tratamento das reaccións alérxicas.
Riscos de caídas asociadas aos labores de carga e descarga de cestas de vendima:
- Dispoñer de escaleiras con chanzos e reixa metálica para efectuar a descarga de cestos de xeito cómodo e seguro. Dotar aos remolques de vendima de asas cómodas e suficientes.