Á gandería Baixo Holstein, ubicada no lugar de Hermida, no concello lucense de Sarria, acumúlanselle os premios nos últimos meses pola súa alta xenética. A súa xovenca, Baixo Castro Sargeant Silly foi elixida como a mellor de España na avaliación de Conafe do pasado mes de novembro, cun GICO, de 4.332 puntos. E máis recentemente foi distinguida por Fefriga como a Mellor explotación de Galicia por ICO na categoría de 17 a 75 reprodutoras, con 2.418 puntos, e tamén logrou un ano máis a distinción á Mellor Explotación de Galicia por cualificación 2015, cunha cualificación de 88,12 puntos, todo un récord a nivel estatal.
Para Antonio Rodríguez, propietario desta gandería xunto coa súa muller Gloria e o seu fillo Yago, estes galardóns “supoñen para nós un orgullo e unha satisfacción que recompensan o traballo ben feito, non só este ano, senón durante moito tempo”.
E é que a historia de Baixo Holstein, como tantas outras ganderías de Galicia, é de esforzo e superación. “A nosa -explica Antonio- é unha explotación familiar que se remonta xa aos meus pais e aos meus avós, e na que hai 25 anos eu e a miña muller nos puxemos ao fronte, e partindo dunhas poucas vacas fomos crecendo pouco a pouco e apostando sempre pola mellora xenética”.
A día de hoxe esta gandería conta cun total de 130 cabezas de gando e unha base territorial de 45 hectáreas, entre fincas propias e alugadas, nas que cultivan herba e millo forraxeiro. Logran unha produción de arredor de 12.000 kilos de leite por vaca e ano, cunhas calidades de 4.38% graxa e 3.28% proteína, e menos de 10 bacterias e de 100 células somáticas. A ración componse de 22 kg de silo de millo, 12 de herba, 12 de concentrado e 1kg de palla.
A venda de xenética: unha importante fonte de ingresos
Para Antonio Rodríguez a mellora xenética, realizada en gran medida a través de programas de Xenética Fontao, foi clave para lograr estes bos índices. “Sempre tivemos claras as vantaxes de mellorar xenéticamente o noso rabaño: os animais duran máis, producen máis leite e durante máis partos, e teñen mellor conformación de ubres, patas estrutura”.
Ademais, a venda de xenética está a ser unha vía complementaria de ingresos para Baixo Holstein. Así, e grazas a un acordo de colaboración, os becerros de vacas con altos índices xenéticos son enviados a Xenética Fontao. “Os investimentos que fixemos en mellora xenética dende hai máis de vinte anos deron os seus froitos e a día de hoxe a venda de xenética é un ingreso moi importante para a nosa explotación, tanto a través da venda de xovencas, como de embrións e de machos para centros de inseminación”, destaca Antonio.
En concreto, esta gandería vende ao ano unha media de 15 xovencas, tanto para Galicia e España como para o estranxeiro, e sobre 70 embrións das súas mellores vacas, así como un número variable de becerros machos, en función dos seus índices xenómicos.
Importancia do manexo e das calidades das forraxes propias
Pero unha boa xenética do gando nunca se expresará plenamente sen un óptimo manexo. Conscientes disto, en Baixo Holstein coidan especialmente a calidade das forraxes propias. realizando cortas máis pequenas pero con moi boas calidades. Tamén prestan especial atención aos protocolos de hixiene no muxido e á limpeza dos cubículos. Tamén fan unha boa cama de palla picada para o gando, que se renova todos os días. E para reducir o estrés por calor, contan cun sistema de ventiladores para mellorar o benestar das vacas.
En canto ao futuro, e nun escenario de baixos prezos, Antonio Rodríguez asegura que a súa estratexia pasa por “intentar facer todo o mellor posible para non ter baixas e un bon manexo para non ter incidencias”. Considera tamén que “as explotacións non deberían incrementar a produción, para reducir a oferta e que suban os prezos, e, como non, temos que intentar producir todo o forraxe posible, coidando a calidade, para depender o menos posible de comprar materia prima de fóra e así poder reducir os custos de alimentación”.
[Best_Wordpress_Gallery id="119" gal_title="Baixo Holstein"]
Baixo Castro Sargeant Silly: mellor xovenca de España
Baixo Holstein logrou que unha das súas xovencas, Baixo Castro Sargeant Silly, fose recoñecida como a número un de España na avaliación de Conafe do mes de novembro. Trátase dun animal nado en xuño de 2014 grazas a un programa financiado pola Deputación Provincial de Lugo e que reúne unhas extraordinarias cualidades xenéticas, de modo que o seu destino é converterse en nai de excelentes produtoras de leite e sementais de alta valoración.
Nas probas de maio de Conafe Baixo Castro Sargeant Silly ocupou a segunda posición como mellor xovenca Holstein de España, ocupando a primeira praza outra novilla galega: Campo 0383 Meridian ET, da gandería Campo de Lucín SC (Dumbría-A Coruña)