A Central Agropecuaria de Galicia – Abanca, que se celebra en Silleda (Pontevedra), rexistrou este martes unha baixada xeral dos prezos medios da recría. Nos becerros carniceiros os de Rubia Galega cotizaron á alza, segundo os prezos medios que proporciona a feira, que serven de referencia para o sector. No vacún maior non houbo tendencia clara e apreciáronse variacións nas diferentes seccións.
As mesas de cotización do porcino mantéñense con subas nos leitóns e estabilízase o prezo do porco cebado. O mercado do ovo mantense cos prezos da semana pasada.
Facemos un repaso detallado polos prezos medios das diferentes seccións e categorías do vacún para coñecer a evolución do mercado. Cómpre ter presente que esta é unha comparativa entre os prezos deste martes e as cotizacións da feira da semana pasada para coñecer as tendencias dos prezos, pero existen factores condicionantes dos mesmos, como a calidade dos exemplares, que determina o prezo de cada animal.
Na recría frisoa, os becerros máis novos, os de menos de 20 días, tiveron un prezo medio de 120 euros, o que amosa unha baixada de 5 euros con respecto da semana pasada. No caso dos tenreiros de entre 20 e 50 días, a sección con maior afluencia de gando; o prezo medio reduciuse en 6 euros e sitúase nos 142 euros. Nos tenreiros de máis de 50 días amósase unha baixada de 55 euros do valor medio con respecto da semana pasada. Así, nesta feira o prezo medio foi de 172 euros.
A tendencia tamén foi á baixa nos becerros de recría de cruzamentos industriais. Porén, os becerros máis novos, os de menos 20 días foron a excepción, cunha suba de 12 euros, de maneira que acadaron os 231 euros. Mentres, nos becerros de entre 20 a 50 días houbo unha baixada de 29 euros e o prezo medio queda nos 278 euros. Nos tenreiros de máis de 50 días, a baixada foi de 48 euros e o prezo medio quedou nos 422 euros.
En canto ós becerros carniceiros, os animais de cruces industriais cotizáronse a un prezo medio de 1.027 euros, cunha baixada de 8 euros. Nas femias a redución foi de 32 euros e agora o valor medio é de 897 euros. Nos tenreiros de Rubia Galega, o prezo medio situouse nos 1.241 euros, logo de sumar 108 euros. Nas femias desta raza produciuse un incremento de 20 euros e o valor medio é de 998 euros. Nos animais comercializados baixo o selo da Indicación Xeográfica Protexida (IXP) Ternera Gallega Suprema, o prezo medio acadou os 1.101 euros, logo dunha suba de 36 euros.
No vacún maior non houbo unha tendencia predominante. As vacas da extra tiveron unha redución de 17 euros e o valor medio queda nos 2.030 euros. Os animais de primeira incrementaron o seu valor en 46 euros e sitúanse nos 1.167 euros. As vacas de segunda reduciron o seu prezo en 20 euros e acadan un valor medio de 765 euros. Os animais de desfeito cotizaron á alza, cunha suba de 77 euros e acadaron os 506 euros. Para os exemplares comercializados baixo a IXP Vaca e Boi de Galicia, o prezo medio acada os 2.200 euros, logo dunha suba de 725 euros.
Subas nos leitóns
Este martes, a mesa de cotizacións do porcino acordou manter os prezos para o porco cebado. No porco selecto e no normal o prezo é de 1,715 e 1,690 euros o quilo, respectivamente. Os porcos de Canal II están a 2,195 euros. Os animais de descarte cotízanse entre os 0,58 e os 0,64 euros o quilo.
Nos leitóns a suba dun euro deixa os exemplares chegados dunha única granxa nos 55 euros (cun prezo de 2,75 euros o quilo) e os animais procedentes de varias ganderías a 50 euros e cun prezo por quilo de 2,5 euros.
O mercado do ovo mantense sen cambios esta semana. Os ovos da XL cotízanse a 2,45 euros a ducia. Mentres, os da L están nos 2,15 euros, os ovos da M atópanse a 1,76 euros e nos ovos da S a ducia págase a 1,53 euros. As galiñas de descarte semipesadas cotízanse entre os 0,29 e os 0,36 euros por quilo.