A Xunta de Galicia publica este mércores no Diario Oficial de Galicia a convocatoria de axudas dirixidas a comunidades de usuarios de augas, asociacións veciñais, colectivos de mulleres rurais e federacións ou unións de asociacións de veciños de Galicia,. As subvencións oriéntanse a financiar investimentos, tanto de obra como de equipacións, en camiños veciñais, traídas de augas e inmobles da súa titularidade ou sobre os que teñen dereito de uso.
A cantidade total prevista para as axudas é de 1,5 millóns de euros. As solicitudes resolveranse por orde de entrada, ó tratarse de subvencións en concorrencia non competitiva.
A axuda económica que se conceda poderá acadar a totalidade do investimento realizado cun límite máximo por entidade de 12.000 euros para a realización de obras e de 5.000 euros para dotación de equipamentos, ata o esgotamento do crédito.
O prazo de presentación de solicitudes será dun mes, contado a partir do día seguinte ao da publicación da orde no Diario Oficial de Galicia. É dicir, ata o 2 de febreiro.