Logo da publicación das axudas para granxas e sector agrícola, o Instituto Enerxético de Galicia (Inega) vén de publicar tamén as convocatorias de axudas de enerxías renovables dirixidas a particulares. Unha delas, dotada de 2,5 millóns de euros, oriéntase á instalación de equipos térmicos (biomasa, xeotermia, aerotermia e solar); en tanto a outra, con 2 millóns de euros, vai destinada á produción eléctrica con paneis fotovoltaicos.
En canto á orde para equipamentos de produción de calor, as coantías divídense do seguinte xeito: caldeiras de biomasa (1.150.000 euros), xeotermia (700.000 euros), aerotermia (600.000 euros) e solar térmica (50.000). A axuda cubrirá o 50% dos custos elixibles, salvo no caso da aerotermia, onde se cubre o 35%.
O prazo de solicitude ábrese o 2 de marzo para a biomasa, o 4 de marzo para xeotermia e solar térmica e o 6 de marzo para aerotermia. As solicitudes resolveranse por orde de entrada, polo que será recomendable presentalas o antes posible.
Enerxía fotovoltaica
A outra orde de axudas para particulares convocada polo Inega diríxese á instalación de paneis fotovoltaicos para a produción de enerxía eléctrica. Poderán optar a esta subvención persoas propietarias dun inmoble residencial, comunidades de veciños ou agrupacións de persoas físicas privadas. A liña de axudas cobre un 50% dos custos da instalación.
O prazo de presentación de solicitudes comezará o 3 de marzo e rematará o 1 de xullo.