As autoridades sanitarias do Reino de Arabia Saudita comunicaron, mediante carta oficial, a autorización de exportacións españolas de carne de vacún, ovino e caprino con destino ao mercado saudita.
Esta autorización é froito das negociacións entre o Ministerio de Agricultura, Alimentación e Medio Ambiente e a Autoridade de Seguridade Alimentaria Saudita (SFDA) que, en novembro de 2015, enviou a España unha delegación de técnicos e representantes con obxecto de comprobar os sistemas de control oficial nas industrias cárnicas e explotacións gandeiras españolas, así como o sistema de certificación oficial para a exportación.
O resultado da visita foi satisfactorio, quedando patente a solidez e seriedade do sistema de control e certificación sanitaria en España, segundo indicou a SFDA. Tras un longo e intenso período de negociacións entre as autoridades españolas e sauditas, chegouse ao acordo sobre os requisitos sanitarios e o modelo de certificado veterinario para a exportación.
As exportacións xa se poden iniciar
Tras esta autorización oficial, serán posibles as exportacións de forma inmediata, estando dispoñibles na aplicación informática do Ministerio para a xestión de exportacións CEXGAN (Comercio Exterior Gandeiro), tanto o modelo de certificado veterinario autorizado como a lista de establecementos autorizados para exportar. Un total de 14 establecementos que solicitaran a súa participación neste mercado foron finalmente aprobados polas autoridades sauditas.
Actualmente é posible exportar fóra da Unión Europea carne e produtos cárnicos de vacún a 74 destinos, mentres que para a carne e produtos cárnicos de ovino e caprino, España conta con 45 mercados abertos. Estas exportacións a terceiros países, que en 2014 alcanzaron as 24.440 toneladas, incrementáronse un 9,25% en 2015 ata as 26.720 toneladas. O vacún representa aproximadamente o 80% das exportacións, sendo os principais destinos Alxeria, Costa do Marfil, Hong Kong e Marrocos.